أشكال وأنواع الحش بالرجال من قبل زوجاتهم00

[..روز..]

عادي .. أرجوا من الجميع أنهم يتقبلون هذي الجملة لأني مليت من كثر ما أسمعها وصارت بالنسبة لي شي عااااااااادي...تقريبا مثل قولة (السلام عليكم)

قبل شهر تقريبا كنا طالعين لإستراحة مع أقاربنا وكانوا الحريم يتقهوون،وأنا جالسة معهم..

طبعا أنواع وأشكال الملل..ليييه؟؟؟

لأن ماعندي للأسف بنات خالات أجلس معهم..فأضطر بكل أسى إني أتقهوى مع الحريم...

المهم.. وحده من الحريم استلمت زوجها..

طول الوقت وهي تسبه وتحش فيه والحريم مبسوطاااااااااااات ويضحكون..

تقول : من رداة هالحظ رجلي مدرس..أربعة وعشرين ساعة بوجهي..!

ردت وحده..يابنت الحلال أي وحدة تعرس ردية حظ سواء كان رجلها مدرس وإلا غيره..!


ثواني بس..إلا كلهن مشتغلات..كل وحدة تسب من جهه وماأتوقع فيه أحد يسمع إلا أنا....

كلهم يتكلمون بوقت واحد..ويسبون بوقت واحد..يضحكون بوقت واحد...فناجيلهم بردت..
نسوا القهوه ..إلا نسوا الدنيا..!

حسيت بقرف واشمئزاز من طريقة كلامهم، كان ودي أرد وأقول وجهة نظري..بس مافيه مجال..

لأني أعتبر انتحاريه إن أقحمت نفسي وسط السالفة..وسبحت عكس التيار..


التفت أدور أمي بينهم..لأني أبغى أشوف انطباعها عن الموضوع...

حسيت براحة يوم شفتها جالسة بهدوء ومن ملامح وجهها ماتقدر تستنتج أي تعليق..

يوم شفتها بهاالشكل ارتفعت معنوياتي وتشجعت إني أرد..أدافع..أقول وجهة نظري..أي شي وحده منهن!!

أخذت نفس وقلت (ترا زوجك مايرضى إنك تقولين عنه هالكلام..من دخلتي وأنتي طايحة فيه سب....)

ماأمداني أكمل جملتي إلا نطوا كلهم بوجهي وأرسلوا قذائفهم..

هذي تصرخ (أنا ماكنت أعاني رجلي! أنا كنت أتكلم عن الرجال عموما!!)

وهذي تقول (وأنت وش يعرفك..؟ وش يعرفك؟؟؟؟؟؟؟؟؟؟) !!!

وكان فيه ثلاث يكلموني معها بنفس الوقت بس ما أدري وش قالوا..

وهذي عيونها بغت تطيح بحجري وهي تقول (هي ماحشت بزوجها..وحنا مانحش بأزواجنا..حنا نتكلم عن مجتمع الرجال!!)

وترجع الأولى وتقول لي (بعدين زوجي محللني وسامح لي أتكلم فيه)


-سبحاااان الله- !!!! قبل شوي كانت تقول(أنا ماكنت أعاني رجلي! أنا كنت أتكلم عن الرجال عموما!!)

وكان فيه حرمه بعييييييييده قاعدة عند الزاوية .. مافيه أمل تسمع النقاش..

قالت بصوت عالي(شفتي!! رجلها سامح لها تتكلم ..هي ما حشت فيه!!)

يوم بردوا حرتهم فيني وخلصوا ..........كملوا السالفة .....

ورجعت الأمور كماكانت..حش وتخطيطات للإنتقام..وطبعا يصاحبه ضحك مفتعل....

أنا ماتحسفت إني تكلمت...صحيح اني ذاك اليوم صرت من فئة المغضوب عليهم...وأصبت بكدمات معنوية...

والقهر إني كنت لحااااااااالي مااحد يفزع معي ....
ولاأحد ولاأحد...

عشان كذا تفردوا فيني....
بس والله ماتحسفت..

بعد مارجعنا البيت قالت لي أمي... (شفتي كلللللللل هالحريم اللي رديتي عليهم؟ترا كل وحدة منهم تموووووت على رجلها ولو يحصل لها تربطه وتخليه ببيتها عشان تقابله طووووول الوقت ماقصرت)

وقالت (يحشون برجالهم عشان يبعدون عيون الناس عنهم!!!!!!!!!!)

طبعا مالقيت شي أقوله....كانت الإستفهامات هي سيدة الموقف...
.
بعد اسبوع تقريبا كنت في بيت خوالي ووحدة من قريباتي كانت تسولف فجأة علا صوتها وهي تقول(

كلللللللللل الرجال حميييييييييير.......كللل الرجال حميييييير..من دون استثنائات ومافيه ولا حرمه يستاهلها رجلها..
كلهم حمير الله يخزيهم!!!!!!!!!!!!)




ابتسمت وهزيت راسي بهدوء كأني هندي يقول :معلوم صديق.......






تحياتي ...العضوه الجديده الي تعرفكم من شهرين ..روز

[فهـــــودي]

اهلا فيك روز

والله اجل يحشون فينا


تعرفون الحريم


لا استلمن الكراث

وحكي

وحش

بس ودهن ايسولفن

لاوبعد شاي نعناع تكمل هع

مشكورة

خيتو روز على

الموضوع

[عبدالله200]

هلا بك خيتووو روز


اجل هالحريم الله يهلك عدوهم طايحين


حش فينا وحنا ما ندري


<<< وانا اقول كل يوم اذني اليسار تون ( ززززززززييييي ) <<< هههه حلووووه زززززي


اثره منكم يالحريم الله يستر هههههههههه



بس تعليق من جد على موضوعك روز


الحين الحرمه تفكر بتصرفاتها هذي انه بتحمي نفسها من العين


ولكن انا ابسئل هالحرمه اللي تسوي هالسوايه لو عرف رجلك ( زوجك )


بالي تسوينه من وراه هل بيسامحك ؟؟؟؟؟؟؟؟؟؟؟؟؟


والله ما ظنيتي ويمكن تنقلب بعد من جد



وترددين يالحرمه كلام الشاعر " ياليت اللي جرى ما كان " >>> خوووش شاعر



ونصيحه كثر الهرج ما يجيب الا وجع الرأس


وتحياتي لك روز ولا عدمناكـ

[حايمتن تسبدي]

السلاااااااااامو عليييييييييييييييكم

لا بصراااااااااااااااااااااااااحه عيب عيب مايصير مايحق لهم يسبون الرجال

<<<< اقاااله سنعه

وش ملحه ابوي وشبوه ؟؟
المشكله ان اللي قالت كل الرجال حمير المفروض تتذكر ان ابوها رجال واخوها رجال وولدها رجال

<<< اقاله تعرف تسكت وخرو بس

وبعدين تعالو يالرجال اقالكم ماقد حشيتو بالحريم انت وياااااااو

<<< قلبت عليكم



ومشكوووره اختي روز

[فهـــــودي]

اقتباس:  المشاركة الأصلية كتبت بواسطة حايمتن تسبدي     وبعدين تعالو يالرجال اقالكم ماقد حشيتو بالحريم انت وياااااااو <<< قلبت عليكم

انا ماسمعت ان فيه رجال يحش بزوجته

طيب لو كان كلامك صحيح


مين الي اكثر حش


الحريم يسمونها ( حشاشه ) >> لاتصدقون انا الي جايب الاسم



وانا اسمع بكلمة ( البادي اضلم )

[روعة مشاعر]

..روز..

في الحقيقه موضوع شيّق ويعالج مشكلة إجتماعيه

وجدير بالقراءه والإهتمام

هذا من جهه

---------------------------

ومن جهة أخرى لا لا تصدّقي إنهم يبغون يبعدون عن أزواجهن العين 000

لا أبــداً ولكن مع الأسف الشديد إن الزوج دائماً مكان تندّر الزوجه لأن ذلك سوف يمنحها زخماً هائلاً

من الكلام اللي يلفت إنتباه الأخريات وكل واحدة تحيك وتلفّق القصّة التي تريد دون حسيب أو رقيب

وأخيراً أستأذنك لتغيير العنوان ليس لعيب فيه ولكن لأهميّة الموضوع000

[معشوق الديره]

[size=5]هههههههههههههههههههههههههههههههه


عاااااااااااادي أختي نرجسيه لا تستغررررررررررررربين


هذووولي الحريم كفارة عشيررر .. .. ولو تجيبلها الدنيا بين أيديهااا كنك ما سويت شئ [/size]

[البراق999]

بصراحه الموضوع اعجبني كثير وماعندي اي رد اقوله الا الله يكون بعون الحريم على كسب الذنوب

اكتفي بهذا الرد والمعذره


تحياتي

[روعة مشاعر]

البراق 999

لا
ما يكفي هالرد

لازم تشارك هذا اللي يخلّينا نحش فيكم 000

ههههههههههههههههههههههههههههه

------------------------------------------------

صح إنقلبت 180 درجه ؟؟؟؟

لا تراي أمزح

مشكور على الرد والمشاركه

[أ هـ م : 001]

ألف شكــــــــــــــــــر أختي روز

[أسامة ..........]

[align=center]اعوذ بالله من الشيطان الرجيم

واااااوك كل ذا حش

عاد الحريم وش خليت

جاهن كراث ( علف حريم )

وش خليت من اشين عامل الاستراحة بقي شوي ويحشنبه بالله يستر ان ما حشنبه ( مهب بعيده )

فل نقاطع الكراث ( علف حريم ) هو المصدر الرئيسي للحش

هههههههههههههههـ

فل نشن على الحريم ( ناقصات عقل ودين )


ههخخخههخهخهحههخه0ه09ه

أسامة ......... .......[/align]

[..روز..]

شكرا (فهودي) على مرورك وتعليقاتك...

عبد الله 200...احمد ربك ..اذنك تون من بعيد أرحم من إنك تكون متواجد في قلب المعركة ...

تعليقاتك في محلها..وما أتوقع إن فيه زوج يسمح لزوجته انها تتكلم فيه..

(ياليت الي جرى ماكان) اعترف!! هذا البيت صح انت سرقته من ديوان قيس مجنون ليلى؟؟

لا عدمناك..


(حايمتن تسبدي)....مشكوره على تفاعلك وحماسك.. والي يقول بأبوك شي أوريه شغله...وبالنسبة للرجال عشان نصير واقعيين.. أكيد انهم يحشون بالحريم..بس مايجي نص ربع عشر حش الحريم فيهم...

[..روز..]

أختي (نرجسية).. بداية أشكرك على أسلوبك المهذب واللبق معي..والذي يدل على أنك انسانة محترمة ...

لك الحق في تغيير العنوان ان كنت ترين بأن عنوانك هو الأنسب مع اني أعتقد أن ما كتبته كان ملفتا أكثر....
بالنسبة لما قلتيه من أن الزوج مكان للتندر من قبل الزوجة،فإني أتبنى وجهة نظرك بالرغم من كوني أتأسى على من كان هذا وضعها..
ومرة أخرى أشكر لك لباقتك...

[Queen of buraydh]

صدقتي والله يا روز ,,,, اغلب اجتماعات الحريم يسبون في الرجال ,,,, وتلاقين الفاظ سوقيه يقولونها مررره تلوع

انا اعاني نفس معاناتك للأسف ,,,,

مشكوره على طرحك الهادف ,,,, وحياك الله معانا ,,,,

[..روز..]

(البراق 999) شكرا لاهتمامك...وجملتك الي كتبتها تكفي وتوفي...

(أهم :001) أللللللف عفو


(أسامة)...شكلك ما صدقت على الله أحد يسب الحريم عشان تبرد حرتك فيهم

وبالسبة للمقاطعة..تقدر تخلي العالم كله يقاطعون البترول !! بس أتحداك تخلي الحريم يقاطعون الكراث!!!
وتشكرااااات على ردك وتعليقك...