اطالب بقيادة المراه وسوف اذكر الاسباب :

[من نساء الشرق]

اطالب بقيادة المراه وراح اذكر لكم معناتي وانتم الي احكموا :

اغراض البقاله مافيه احد يجيبهم يعني اليوم على سبيل المثال لا الحصر اكلت جبنه خربانه !!!! وبطني بيوجعني مووت بسببها
الروحه والجيه طبعا بالقطاره لان مافيه احد بيتفرغ لاموورنا الاساسيه مو عاد الترفيه و ترويح .
مطاعم ممنوع لان اهل الحاره ملاقيف وعملنها انا وخواتي وصرنا كل خميس بنجيب من مطعم وفي اخر خميس جاء امام المسجد وعملنا فضيحه قدام العالم والناس وطلب امي وكلمها عند الباب عاد خذ هذا يجوز وهذا مايجوز ....
اما مسئلة اروحه للمدرسه فهذي تصلح تكون مسلسل مغامرات يعني راح اقولكم مغامره بس يمكن ماراح تصدقونها .
اتفقت مع نقل ياخذوني على المدرسه المهم يوم من الايام تناقشت انا وياهم على الفلوس وقلت لهم انكم غالين ومن ذا الكلاام صار اخذ وعطا انا وياهم في السياره قالت صاحبت النقل انزلي ماراح نوديك وشوفي لك نقل ثااني !!!!!
انا : ياحرمه حنا بوسط المسافه وين انزل
حرم السائق : يالله وقف خلها تذلف
انا : ياناس اتقوا الله وين ترموني بوسط الطريق و بالظهر !!!!
المهم وقفوا وقالوا ماراح نتحرك لحد ماتنزلين
نزلت لان مافيني اتحمل ايهانات وقلت يالله خلينا ننزل الجوا غيوم وحلوا
طبعا خذ هذا يطنب ويستهزء ....وهذا يلج وين اهلك يابنت ... وانا مطنشتهم وماشيه بطريقي وكل الوقت ادعي "يالله ياكريم ابعد الهيئه عني" طبعا الطريق طوووووووويل
مليت من المشي تعبت وماقدرة التحمل خصوصا لما وصلت لمنطقه ماقدر اوصفها من شان ماتعرفون بيتنا
بس من جد منطقه طريقها سريع وعلى يميني مزارع !!!!!!
وامي تدق وينك يابنيتي جاء العصر وانتي لهالحين ماجيتي وانا اقولها ايه اليوم علي المناوبه برقعها ، صراحه بذاك الموقف كنت اعاني من الخوف وتعب ونوم وملل ...




بالله عليكم هذي عيشه والله الي يسمع كلااامي يقول مسكينه وفقيره ماكاني موظفه واستلم راتب شهري و اكل جبنه خربانه و امشي بشارع الين العصر ....



[align=center]راح اطالب مجلس الشورى اما بسماح للمراه بالقياده اوان يبحثوا لنا عن البديل اما ان تترك المسئله هكذا فهذا غير مقبول ومرفوض من قبلي انا كمواطنه ...[/align]

[الرمادي]

أختي العزيزة من نساء الشرق

قيادة المرأة للسيارة لم يحرمه المشائخ إلا إتقاء للشر القابع خلفه وسدا لذرائع سيجلبها معه .. والحكم بالطبع لم يكن لأمرأة بعينها ..

ومتى ماإنتفت تلك الذرائع التي حرم من أجلها فسيعود الحكم فيه إلى الأصل وهو الإباحة .. أو متى ماكان هو أقل الضررين ..

قد تكون حالتك فيها القيادة هي الضرر الأقل لكن حكم كهذا لايبنى أختي على مسألة فردية ولايمكن أن يسمح فيه لأمرأة دون الأخرى لذا قد يكون في تحملك وإحتسابك الأجر في معاناتك مصلحة لك ولبنات المسلمين

ولك تحياتي ,,,

[مرأه من الشرق]

اخي الرمادي الشكرك على تفاعلك..
اما بنسبه لردك فاريد ان اطرح عليك السوال التالي
- هل فتياة الاسلااام الاتي تتكلم عنهن والتي من اجلهن منعت من القياده كنا على قدر هذا الجميل الذي اتحمله انا من اجلهن ؟؟؟
- اختي المسلمه الي هي زوجة السائق تركتني بوسط الطريق وفي فترة الظهر التي يقل فيها الحركه وماقلت لازم نتحمل على شان نستر عرض اختنا في الاسلااام !!!!!
- من كان وضعها مناسبا ويتوفر لها السائق او زوج او اخ او اب تجدها تطالب بعدم القياده وماسئلة عن معناتي ومعناة فتياة مسلمات امثالي !!!!
- لاحظ عدد زوار الموضوع لا يتجاوز 19 و اردود واحد فقط قارن هذا العدد مع موضوع يتحدث عن طاش ماطاش او عن طريقة المحافظه على سلاامة جهاز الحاسب.. ماحد قال نشارك اختنا في الاسلام في معناتها اقلها الناشطات في المنتدى بدون ذكر اسمائهن وهن اخواتي في الاسلام على ماعتقد !!!

انا لا استطيع القول الا
حسبي الله ونعم الوكيل على من منع قيادة المراه ...
حسبي الله ونعم الوكيل
حسبي الله ونعم الوكيل
حسبي الله ونهم الوكيل

[أقلاع حتى الضياع]

بالله تخيلو فقط تأملو بنت سعودية تسوق بوسط شارع بريدة وعليها مغشاتها ومتغطية وماتشوفون الا عويناتها ومتعلقة بالدركسون تسنكم تشوفون واحد يتدودل ( حلوة يتدودل ) من الدور الثاني وتلتفت يمين ويسار وتلعن هذا وتسفل بهذا


لعنبو بليسكن ياهالحريم ماسلمنا منكن بالأسواق تبن تسوقن بالشوارع ولا يمكن نلقاكن بالدايري على هالطعوس كل وحدة ماخذه صديقاتها ( بلوي الزقم وترجيع اللسان وكسر الصاد ونصب الياء وكسر مرة ثانية لصاد بس هالمرة ماهو منجبر )

ويمكن بعد تفطح بالدايري ويجي ابوها يسئل عنها والله انها طالعة مع خويتها راحن للمدرسة عندهن درس تقوية بس ماادري الجيب الربع ينفع او لا

واذا كان فيه نقطة تفتيش الله ياكثر هالعساكر يالي على السيد الي بوووووه حريم وبنات يسوقن

لعنبو بليسكن ياهالحريم ... الصيع ماغير يلاحقون هالصوالين الي معهم ابوانهم واخوانهم وشلون لو بس انت لحالكن بالسيارات وش يبي يصير



والي تبي تسوق عندها هالخليان تروح تبطح وتسدح وتمرغ وتفحط على كيفها ماحدن قايلها شي ...

وهالحين الي تقول عندها جبنة معفنة مافيها شي كولي جبن معفن ولا تصيرين بعد فترة أمرأة معفنة ( والمرأة بعفتها)

ومرأة من الشرق بس ابي اقولتس شي ياخية اسمتس غلط اسم النك ياخيه أمرأة من الشرق وليس مرأة من الشرق


مااقول الا الله يخلف علينا وحدة تبي تسوق طيب سوقي بس بعدين لاتقولين ماتزوجت انا لهالحين

[بدر بريده]

السلام عليكم

شنو الفرق بين البنت تسوق سياره او تمشي بالسوق او في اي مكان

البنت امنعوها من القياده بسبب تجنب معاكسات الشباب

يعني امنعوها من حق لها بسبب الغير اهي مالها ذنب في عاقبوها بجرم الاخرين

وسلامتكم

[مرأه من الشرق]

الاخ " اقلااع حتى الضياع"
جداتنا الكبار كانوا يركبون البعارين والحمير يعني كانو نساء مش عفيفات !!!!
بالله عليك بفهم بس ايش دخل العفه بالقياده ؟؟؟؟؟؟؟؟؟

تحياتي للاخ بدر بريده ..
مجموعه من العرابجه يسرحون ويمرحون بكل حريه ونحن نصف المجتمع نمنع من اقل حق من حقوقنا المسلوبه وهذه المره باسم الاسلام وللاسف ..

[الرمادي]

أختي العزيزة مرأه من الشرق

الأجر يعظم ويقل بحسب حجم التضحية ..

وعندما يكون من حقك المطالبة بقيادة السيارة قياسا على حالتك الفردية التي ربما لو إرجعت إلى الحكم الشرعي لكانت تحتم السماح لك بها .. فإن صبرك على معاناتك والتضحية براحتك والصمود من أجل إغلاق باب لانرى من شقوقة إلا العواصف المظلمة التي تهدد سلامة فتياتنا قد يكون أجره أعظم بكثير متى ماأحتسبت ذلك الصبر لوجه الله تعالى ..

إختي ..

التكافل الإجتماعي بكل أسف مفقود بدرجة كبيرة في مجتمعنا في هذا العصر .. لدرجة قد يكون فيها مد يد العون للآخرين تتبعه الشكوك في النوايا لندرة الأشخاص الذين يجندون أنفسهم لخدمة إخوانهم وأخواتهم .. لذا فلا غرابة إن إتهمتي أخواتك في الله بالتقصير في تقدير معاناتك وهن ولا شك أهل لهذا الإتهام !

وفي الأخير أختي العزيزة حتى ولو رأيت شخصيا بأن لك الحق بمطالبتك بالقيادة فهذا لن أجعله يشفع لي بـتأييدك عليها ليقيني بأن المتضررات من هذا عددهن أكبر بكثير ممن قد يجدنه أقل الضررين ..

ولك تحياتي وتقديري ,,,

[الشجيّ]

المقارنة بين " البعارين " و السيارات ليس له أصل

و بالمناسبة ..
العلماء عندما يصدرون الفتوى فإنهم يُراعون حالة المستفتي
و بحسب حاله تتغير الفتوى
أي أن ماكان حلالاً بالأمس قد يحرّم اليوم
كالركوب و كالنقاب و كالسفر للخارج للسياحة
هذه مجرد امثلة
و الا فالفتاوى كثيرة
أضيفي إلى ذلك
أن النساء ماعدن كنساء الأمس
و كذلك الرجال
و اهم ما في الموضوع أن " البعارين " تختلف تماماً عن " أشباه الرحال و لا رحال "

اختي الكريمة
لا داعي لإثارة موضوع فصّل فيه العلماء
و " من شذّ شذّ في النار "

دعواتي لكِ و لأمثالكِ بالهداية و الصلاح

الشجيّ

[مرأه من الشرق]

اخي الرمادي اشكرك على تفاعلك واكرر لن اتنازل عن حقي طالما لم يشفع لي احد من العبااااااد ...

اخي الشجي كثير من الموضيع التي فصل فيها العلماء ومازال النقاش دائر فيها بل وغيرة الفتوى فيها . منها على سبيل المثال مسئلة التائمين فكان محرما واصبح الان ضروره بل يعاقب من خالفها !!!!!!

اما مسئلة مقارنة الحيونات المستخدمه بالتنقل مع السيارة ليس لها اصل فهذا يحتاج الى بحث علمي وليس شرعي او رئى شخصيه ...

ودعائي لك ولمن هم على شاكلتك بالهدايه و اصلاح

[البرحيه]

مرأه من الشرق
القصه اللى صا رتلك
تخوف ... يعنى لو مكانك بقولهم
فوق اللى تبون حبة راس بس ما انزل
فى الشارع وبالقوايل بعد
وبينى وبينك
نزلوك او بنشر عليك كفر
كلها واحد


وبعدين السواقين اللى عندنا وش شغلتهم ... غاسلين ايديهم من كل شى
خليهم يكرفون على الأقل بالسواقه
بصرااااااااااااااااااااااااااااااااااااحه
لو انا مدرسه مثلك كان اجيب اندنوسى وتشيخ عليه ولا اقعد افتح بيبان مصككه

صح عليك جدتى كانت تسوق بعير
بس ما فيه سعسقه وما فيه تماسيح
............ يعنى لو شباب هالزمان مثل شباب منول كان انا اول وحده تطق سياره


والجبن .. شوفى التاريخ قبل تا كلينه.. واذا اوجعك بطنك الأسعاف اسرع من البرق
الروحه والجيه... الليموزين ما يقصر بس شكلك ماتندين


الا وش نوع السياره اللى
ودك تشترين

شكلى قاعده اسولف ما ارد

شكرا لك مرأه من الشرق

[قناص]

اختي من نساء الشرق او الشمال او الخبوب المهم
اسمعي

اولاً انتي منتي مقياس يااختي العزيزه.


ثنايا ًهذي ماهيب معانات اللي قلتيه يعني ماببيتكم الا هالجبي المعفن؟؟؟
بعدين من بعد البقاله عن بيتكم؟ اكبعي عباتتس وازرقيها وارجعي.
والمره مالها اللا بيتها بلا ترفيه بلا هم.
وانتم وشولوه حاطين مطبخ ببيتكم او تناظرونه؟؟!!!
والمطعم ماله لازم كولو من طبخ البيت بلاك ماشفتي المطاعم على حقيقتهم والله ان الجبن اللي انتي اكلتي احسن من طبخهم نعمه ماقلنا شي بس طريقة الطبخ وسسسسخه
بعدين وشوله يجيب الطلب مع الصلاة خلوه يتاخر شوي.
والامام معه حق كان ترسلون احد من عيالكم عساهم للصلاح.

اما المدرسه حلــــــــــــــــــــــوه ياليتي شايفك ( كان ارشقتس ماء) واعلم الهيئه((نذل))
بعدين ليش تنزلين والله ماانزل لو يسحبوني بسياره هبال انزل بالشارع بعيد عن البيت؟
والله ماانزل لما تجي الشرطه ويخلونه يودين غصب عنه.
المهم انك استفدتي رياضه
بعدين تخيلي بالاشاره وانتي تسوقين والله يانتن نكته
بس عندي سؤال اذا سمحو بالسواقه وش تشرين سياره؟؟
لايصير جيب ربع والا شاص او كامري؟
بتكثر ورشات السمكره بالبلد

وانتي لاتطالبين احدٍ ابد
مشي لي راتب واوصلك للمدرسه مع خواتي لاني صاير توبيس مجاني للعائله

تحياتي وبدون زعل او بدون كتشب

[قناص]

نسيت اقولتس شي

تراني مانيب منزلتس بوسط المسافه

بعدي مااعرف اهاوش انا

[مرأه من الشرق]

البرحيه اشكرك على الرد
انتي قلت حل وهو جلب السواق
بس بسئلك يجوز ادخل رجل اجنبي الى بيت كلوه نسوان؟؟؟؟؟
لا تقولين زوجته لان المراه ماتصير محرم
كمان ماعندي استعداد افتح بيت للمسيوووو السواق

واعتقد ان الاختلاط برجل اجنبي نزل فيها الحكم صريح لكن القياده مانزل ولا دليل تحريم فيها

تحياتي عيوووني

[أقلاع حتى الضياع]

وانا اطالب بجميع حقوق الرجل ومن الحين تراني ابي اعلنها انا ابي اطالب بمساواة الرجل بالمرأة ماقلت مساواه المرأة بالرجل عشان بعدين ينقز لي واحد من هالمقاريد ويقولي يالعلماني

بس انا الحين ابي اعرف المرة لمنها قالت شي وتكلمت وقالت ابي اطالب بحقوق المرأة وش يقولون لها علمانية تراني ماعمري سمعت احد يقول لوحدة ياعلمانية
وبعدين انا عندي سؤال أأأأأأأأدي تسذا هوه
هالحين لمن الواحد قاله شي عن المرأة يقولون له ياعلماني هالحين ابي اعرف وش معنى علماني لاتقولون ان معناها فصل الدين عن السياسة او امور الحياة لله ماهوب هذا معناها لو كان معناها تسذا تساننا الحين كلنا علمانيين لأنا نتعامل مع بنوك ربوية ونتعامل مع احكام عرفية واشياء كثير وواجدة بس ابي اعرف انا وش معنى علماني ومعناه الصحيح

نرجع لمحور كلام الأخت ماادري وش اسمها اكيد انها من الشرق بس اشك انها مرة قصيمية لو انها قصيمية ماكتبت هالكلام لأن اعرف القصيميات لله مايقولن هالشي
طيب وشوله هالحين تبين السيارة تعاقدي لتس مع ليموزين ويجيتس وقت ماتبين وعلى فكرة ياكثرهم هالايام ببريدة

[فيافي نجد]

مرأه من الشرق


من غير الحكمة أن تهربي من لب المشكلة إلى مانتج عن المشكلة !

فمشكلتك في عدم وجود رجل يقوم بأمورك وأمور من يشاطرك سكنك من نساء وهذا أمر لاينهيه أن تقودي سيارة أو حتى جمل !!

وما تطالبين به ليس إلا شر يطالك ويطال غيرك من بنات المسلمين فلاتكوني بذرة ذلك الشر ولا تقولي سألتزم بحدود فالشر أطوار من بدءا أولها لزم عليه النيل من آخرها

إذا قدت السيارة فهل ستنتهي مشكلتك ؟ ألا تحتاجين مراجعة الدوائر المختصة والورش وغيرها والإختلاط بالرجال بأشكالهم وأجناسهم أم هذا أمر لايهمك ؟! أتريدين قتل الحياء في نفسك ونفس أخواتك

خير لك من كل هذا الدعاء بنية صادقة أن يرزقك الله زوجا صالحا تنتهي معه مشكلتك ويكون لك عونا في دينك ودنياك ويرزقك منه ذرية صالحة لتكوني بذرة خير في هذه الأمة

من ترك شيئا لله عوضه الله خيرا منه .. وحينما أتت فاطمة رضي الله عنها إلى رسول الله صلى الله عليه وسلم تشكو اليه ما تلقاه من الخدمه وتلتمس منه ان يعطيها خادما؟ فقال النبي صلىالله عليه وسلم :" الا ادلكما على خير مما سألتما؟ اذا اخذتما مضجعكما-او اويتما- فسبحا 33 واحمدا 33 وكبرا 34, فهو خير لكمامن خادم

وعليك بذلك العمل وسيغنيك الله بفضله عن الحاجة للناس والحاجة إلى إبتداع بدعة تحملين وزرها ووزر من عمل بها إلى يوم القيامة

أسال الله لي ولك الهداية والصلاح والستر والعفاف