ضرب الطلاب بنية القوة....والنجاسة

[الحبيبـــة]

بسم الله الرحمن الرحيم
السلام عليكم ورحمة الله وبركاته

مشكلة نعاني منها وهي ضرب طالب لطالب نجاسة بالعامية

اليوم ولدي جاء من المدرســــة مكفوخ كفخ ...
والله يوم دخل البيت قعد يصيح والصرااحة اني صحت معه ولا الحين تعبانه من الموقف..
قلتله عسى ماشر ؟؟؟قال طالب ضربن ضرح مهوب طبيعي والمشكلة جاب اصدقاءه وماكفاه ضرب بهالوليد...حتى فكوه الرجال منهم..
يقول المشكلة ماجيته بس تلفظ علي وتلفظت عليه وقال الوعد الطلعة...بس يحلف اني ما لمسته...
يا رجال وش موقفكم ؟؟؟
وش حلولكم؟؟؟؟
السواق اللي يجيبه شاف الموقف وقاله افتح محضر وانا اشهد...وجزاه الله خير..مع انه اجنبي....وهو قال لأبوه علمه بالتفصيل لاتحسبون انه مقصر
لو كان الموقف لأحد اولادكم وش حلولكم؟؟؟؟موفقين الى كل خير
وياليت يكون هناك مراقبة مشددة من المعلمين
معليش الموضوع شوئ ركيك بس الموقف مازال في نفسي...

ابي ردود سريعة قبل الصبح ان شاء الله ....لانكم اكيد اصحاب تجارب...

وسلامتكم........
السلام عليكم ورحمة الله وبركاته

[العـاصي]

شيء طبيعي ولا يكون في نفسك شيء

خليه يتعود على الخشونة


يعني اليوم يطقونه وبكرة يطقهم

[تميم اللهيب]

خليه ياخذ حقه بنفسه
بصراحة هذي مهزله ويفتخرون انهم اقوى منه


كان ماصحتي معه المفروض اجلسي معه وكلميه وقولي ياولدي ابعد عن الشر وغنيله
واذا تلفظوا عليه خليه يسكت
طيب العيال ماكتبو تعهد?

[" TWIX "]

الملامة تقع على المعلم المناوب لخروج الطلاب المسؤول عن سلامتهم
أين هو عندما دبغ ولدكِ ...؟!!
أما ولدك من بكرا دخليه صالة للدفاع عن النفس أو استأجري بوديقار خصوصي له
لأنه يعيش في مجتمع " الوعد الطلعة " مجتمع غابة .. مجتمع لا يعرف إلا لغة القوة ..
مجتمع يسحل من أمامه ..!!
أنا أتوقع هذا الضرب المبرح سيخلق منه رجلا سعوديا ببدي أفغاني ..
ستنفخرين به .. عفوا .. ستفتخرين به مستقبلا ..

[دموعي قريبه]

طيب ورااه مااتكزين ابوه يهاارج مدير المدرسه والمدير يستدعي ابو الطالب اللي دبغ ولدتس ؟؟


ويتفااهمون والا انتي دقي على المدرس وقولي مهوب حق يدق ولدي ونسكت عنه


خليهم يتوحشون لاسمعو صوتس ويتحركونن

صدز انقهرت والله

[الحبيبـــة]

اقتباس:  المشاركة الأصلية كتبت بواسطة العـاصي     شيء طبيعي ولا يكون في نفسك شيء خليه يتعود على الخشونة يعني اليوم يطقونه وبكرة يطقهم

جزاك الله خير وبعدين ترى قلب الأم غير ...حساسة بزيادة وعاطفية مهوب مثل الأب...
بس هذي مجموعة على واحد يا العاصي الله يبعدك عن المعاصي ...
ماقصرت على طرح رايك

[الحبيبـــة]

اقتباس:  المشاركة الأصلية كتبت بواسطة تميم اللهيب     خليه ياخذ حقه بنفسه بصراحة هذي مهزله ويفتخرون انهم اقوى منه كان ماصحتي معه المفروض اجلسي معه وكلميه وقولي ياولدي ابعد عن الشر وغنيله واذا تلفظوا عليه خليه يسكت طيب العيال ماكتبو تعهد?

ما قدر ياخذ حقه لانه امام مجموعة وهو لحاله بااااااارك الله فيك....
وفعلا مهزلة مابعده مهزلة...
يا أخ تميم غصب موقفي والصياح مجرد احساس من الأم وانت تعرف الأم عاطفية بزيادة...
وجلست معه وقلت له نفس كلامك...
وتعرف عيال هالوقت حارين الله يصحلهم...مايتحملون شئ ...

ما كتبوا تعهد لانه بالطلعة حصل هالشئ
بس قلت لابوه لازم تروح للمدرسة وتوقفه عند حده
مسكور على ابداء رايك يا اخ تميم

[الحبيبـــة]

اقتباس:  المشاركة الأصلية كتبت بواسطة ..twix..     الملامة تقع على المعلم المناوب لخروج الطلاب المسؤول عن سلامتهم أين هو عندما دبغ ولدكِ ...؟!! أما ولدك من بكرا دخليه صالة للدفاع عن النفس أو استأجري بوديقار خصوصي له لأنه يعيش في مجتمع " الوعد الطلعة " مجتمع غابة .. مجتمع لا يعرف إلا لغة القوة .. مجتمع يسحل من أمامه ..!! أنا أتوقع هذا الضرب المبرح سيخلق منه رجلا سعوديا ببدي أفغاني .. ستنفخرين به .. عفوا .. ستفتخرين به مستقبلا ..

فعلا الملامة على المعلم بس هالكلام عند الطلعة يعني زي ما قلت الوعد الطلعة...
وفكرتك ممتازة تسجيله بنادي الفاع عن النفس مادام مجتمع غابة للأسف
والله يسمع منك ويصير رجل سعودي اصلي وليس افغاني ...
مشكور يا تويكس على ابداء الرأي

[الحبيبـــة]

اقتباس:  المشاركة الأصلية كتبت بواسطة دموعي قريبه     طيب ورااه مااتكزين ابوه يهاارج مدير المدرسه والمدير يستدعي ابو الطالب اللي دبغ ولدتس ؟؟ ويتفااهمون والا انتي دقي على المدرس وقولي مهوب حق يدق ولدي ونسكت عنه خليهم يتوحشون لاسمعو صوتس ويتحركونن صدز انقهرت والله

مشكورة على تفاعلتس معي وعلى تعاطفتس وان شاء الله ما احد يجرأعلى ان يقهرتس...
وان شاء الله هذا اللي نبي نسويه....
بس ما احب اكلم مدارس اولاد ماتعودت...
وان شاء الله ابوه مايقصر
ماقصرت على تفاعلتس الحي الله يوفقتس

[رناالريان]

مافيه الا تدقين على المدرسة وتأخذي نحق ولدك حتى يتادب الباقين

[أبوطــارق]

يروى لي ، احد الاقارب ، وهو رجل طاعن في السن ، انه حينما كان طفلاً ، تعدى عليه احد الاطفال ممن يفوقه سنن وجسماً ، فذهب يشتكي لوالده ، فما زاده والده إلا هماً وغماً ، كمل عليه الناقص ، بالعربي اضربه لأنه جاي يشتكي ، يقول حينها علمت انه ما حك جلدك مثل ظفرك ، فتخبئت له خلف احد المباني الطينيه ، ومعي مربوعه ، فما ظهر إلا وانقضضت عليه انقضاض الاسد ، وبعدها اصبح لا يتعرض لي ..

بأعتقادي ، ان مشاكل الطلاب لا تنتهي ، ومن يتابعها يتعب من المتابعه والمراقبة ، ومثل ما قيل يكبر وينسى ..

لكن إذا كنتي فعلاً، تتأذين ، عندما يضرب ابنك ، وتتأثرين وتتعب نفسيتك ، فمكني ابنك من الدفاع عن نفسه ، بإدخاله في احد صالة الكراتيه والدفاع عن النفس ..

[أحب نفسي]

أنآ أقول تغبي له عند بآب المدرسه ولآطلع هاللي رآضخن ولدتس أرضخيه وألعني جدفه ..


ماعمرك وقفتي عند مدرسة العيآل ؟!
لآزم لآمرينآ ينزل أبوي يفك عقدة جذآعين يصيرون متعنقطين ببعض يتدابغون ..
علمي ولدتس الكآرآتيه حتى يعرف يتخطى مواقف الحيآة الصعبه .!

تحيتي ...

[الزنون]

اذا ابنك لا يتحمل التكفيخ والتلفيع
وشوله يرد عليه من الاول

ما لك الا حلين
الاول: يا يتعرف ابنك على كم طالب بالمدرسه يكونون عون له
الثاني: اذا تكلم عليه احد يقول له صح عليك كل كلامك صح

عزيزتي
الحل الامثل
ابنك يصير مسالم ولا يرد على احد
ويقولون من خاف سلم

حتى لو صار عنتر ودبغ اللي ضاربه
بكرا ذاك يجيب ورعان الحاره كلهم
ويدفنون ابنك دفن

[الحبيبـــة]

اقتباس:  المشاركة الأصلية كتبت بواسطة رناالريان     مافيه الا تدقين على المدرسة وتأخذي نحق ولدك حتى يتادب الباقين

ماقصر أبوه راح ودخل على المدير وأخذ منه تعهد ومن ولدي تعهد
أسال ليش اخذ من ولدي تعهد مع انه هو الضحية؟؟؟؟
ماقصرت يارنا يعطيك العافية...

[الحبيبـــة]

اقتباس:  المشاركة الأصلية كتبت بواسطة أبوطــارق     يروى لي ، احد الاقارب ، وهو رجل طاعن في السن ، انه حينما كان طفلاً ، تعدى عليه احد الاطفال ممن يفوقه سنن وجسماً ، فذهب يشتكي لوالده ، فما زاده والده إلا هماً وغماً ، كمل عليه الناقص ، بالعربي اضربه لأنه جاي يشتكي ، يقول حينها علمت انه ما حك جلدك مثل ظفرك ، فتخبئت له خلف احد المباني الطينيه ، ومعي مربوعه ، فما ظهر إلا وانقضضت عليه انقضاض الاسد ، وبعدها اصبح لا يتعرض لي .. بأعتقادي ، ان مشاكل الطلاب لا تنتهي ، ومن يتابعها يتعب من المتابعه والمراقبة ، ومثل ما قيل يكبر وينسى .. لكن إذا كنتي فعلاً، تتأذين ، عندما يضرب ابنك ، وتتأثرين وتتعب نفسيتك ، فمكني ابنك من الدفاع عن نفسه ، بإدخاله في احد صالة الكراتيه والدفاع عن النفس ..

جزاك الله خير يا ابو طارق ...
جيراننا ولدهم اضربه فلسطيني قامت جدته ام ابوه بالطلعة وامسكته وضربته وهزأته وقالت مابقى الا هالفلسطيني ...
فعلا عطته درس وقفته عند حده
بس انا بصراحة ماتعجبني هالتصرفات راح اعامل الناس باخلاقي وليس بأخلاقهم
مشكووووووووور