قصة حقيقية اتمنى قراءتها

[رونا]

السلام عليكم ورحمة الله وبركاته

شوفوا معاي هالقصه الحقيقيه وترى ابطالها حقيقيين

واسمائهم حقيقيه ( لاتنسون اقروا الملاحظه اللي بأخر القصه )

نبتدي( القصه ع لسان صديقة بطلة القصه )

________

حصه/ هي بطلة هالقصه كان مقرر زواجها بـ 29 /1 / 2010 لكن قدر الله وماشاء فعل

حصه بنت طيبه بكل معنى الكلمه ومحبوبه حييل من كل اللي حواليها

من الاهل والاصدقاء وفوق هذا جميله لكنها ماتتبهى بهالجمال بالمره

وماشيه ع النيه ..

حصه تعشق شي اسمه ( نت ) وتقريبا يومها كله يروح بالقعده ورى هالكومبيوتر

وماشاءالله عليها بكل موقع تدخله تتميز وتاخذ رتبه

تقريبا كل الرتب اخذتها مشرفه مراقبة اقسام مراقبه عامه وحتى الاداره باللي باللون ( الاحمر )

وهي ماشاءالله شعلة نشاط بكل هالمواقع ( لكن ) فيه واحد من هالمنتديات تحبه بشكل

جنوني وناقعه فيه ليل مع نهار ومحبوبه من الكل فيه

ولانها متميزه بشغله بهالمنتدى محد تميز فيها الا هي .....؟؟
المهم مستمره هالبنت ومدهره بتلبية طلبات الاعضاء اللي ماتنتهي وتفرح لما يثنون عليها

بهالشغله اللي تسويها وع هالحال لمدة سنتين لاتكل ولا تمل

وطبعا ادارة هالمنتدى ماتقصر بمنحها الاوسمه والتشجيع المستمر

اللي يخليها تناقز من الفرحه وتعطي اكثر ..

المهم هالبنت تقرر زواجها بالتاريخ المذكور اعلاهـ ..

وبدت تحضر لزواجها وهي فرحانه لان اللي بيتزوجها ولد خالتها وهو شاب كل الصفاة الحلوهـ

فيه وهي معجبه فيه حييل

المهم حضرت كل شي وفي كل روحه لها للتسوق تاخذ اعز صديقاتها وهم ......؟ وريم

مع امها واختها

خلصت كل تجهيزاتها للزواج وحتى فستان الزواج اصبح عندها بالبيت لانه كان تصميم خاص

لها وغالي وااايد

وكل يوم لازم تطل ع هالفستان >> وصرعت صديقاتها فيه دوختهم لدرجة

وحده من صديقاتها قالت لها لعنبو ابليسج ليش تحسسيني انج عانس

وماصدقتي تتزوجين وجع اركدي

ع العموم قرب زواجها وقبل الزواج بإسبوع فقط ..؟؟
اقعدت من النوم وهي تصارخ وتبكي بشكل هستيري وكانت الساعه (2) الصبح

وكان اصراخها عالي وع وصف اختها كان اصراخ مرعب وكأنها ( ملبوسه )

استمرت بـ الصراخ وامها وابوها واختها وزوجة اخوها يحاولون يسكتونها ويهدونها

لكنها مستمره بشكل مخيف

وكان ابوها يقول يابنت اهدي واقصري الصوت العالم الفجر لاتفضحينا

وهي مستمره راحت اختها وكلمت اخوها اللي كان مداوم وقالت له السالفه

وطبعا ترك شغله وجاء وهو مخترع من الوضع

لما وصل اخوها وشاف شكلها الغريب بسرعه طلع من البيت وراح لإمام المسجد

اللي كان يقيم بغرفه بالمسجد وجابه للبيت دخل الامام وشاف منظر البيت

فقرب منها وبدأ يقرأ القرأن وكانت امها ماسكتها وترش عليها من الماي اللي مقري فيه

وتغسل وجها

بعد فتره هدت البنت وبدت تبكي بحرقه وتقول خلاص معاد ابي اتزوج خلاص

هالزواج مافيه خير لي ولكم

فـ استغرب الجميع من كلامها وقالت اختها زواجج بعد اسبوع بس

قالت ولو ماراح اتزوج سألها الامام ليه يابنتي استهدي بالله وقولي لنا شاللي خلاج

تقولين هالكلام وتتخذين هالقرار المفاجىء للجميع ...

قالت

شفت شي بمنامي خلاني التخذ هالقرار

شفت اني لابسه ثوب زواجي وكنت بصالة الافراح وامشي بين الحضور

وكنت فرحانه بس كنت احس الارض اللي تحتي مو مستويه وبغيت اطيح اكثر من مره

بس كنت اتماسك قدام الناس علشان الفشله ..

وصلت الكوشه وجلست بإنتظار العريس ولما وصل وبدأ يسلم ع خواته وامه

وجاء وجلس جنبي وكنت منبهره فيه واتباهى بوجوده جنبي لانه امنية كثير من بنات الاقارب

المهم جاء وقت تقطيع الكيكه ووقفنا ننتظر الكيكه ولما جابوها العاملين عليها

كانت مغطاهـ بغطاء حلو ومبهر فقلت لاقرب الناس لي اختي وصديقاتي المقربات

انتوا بالذات بذوقكم منها تعالو جنبي

وهنيه اكشفوا عن الكيكه ولا هي كوره من نار حرارت لهبها يصلي الوجه ونور

اضاءتها يعمي العيون صرخوا الناس وانا استغربت وكنت راح ابتعد عنها لكن امسكتني صديقتي

ريم وقالت تعالي قصيها ياحصه ليش خايفه قلت لها بس هذي نار قالت عادي

الكيك متعدد الاشكال بس طعمه حلو ولاتنسين انج انتي اللي طلبتيها بهالشكل

قلت لها متى ياريم وربي ماطلبتها تكون جذي

قالت ريم امبلا ياحصه انتي طلبتيها وانا حذرتج من هالشكل وانتي صميتي اذونج عني

استغربت من كلام ريم واخذت السكين وانا احس اني مغصوبه قطعة اول قطعه

واخذتها بإيدي وكنت راح اعطيها زوجي لكن مالقيته التفت ادوره مالقيته فـ عطيتها

ريم قالت شكرا ماابيها فـ مديتها لـ ----؟ فـ امسكتها لكنها احرقتها بإيدها ورمتها

وهي تتألم ولما نظرت للي وراها لقيت طابور من الناس كلهم مادين

ايديهم فـ فرحت قلت غريبه حبوها رغم انها تحرق وبديت اقطع لهم وياخذونها وهم يتألمون

من حرارتها بعدها تعبت وانا اقطع والكيكه كل مانقصت زادت مره ثانيه والطوابير

تزيد واللي يبون منها يزيدون وضليت ع هالحال ساعات طويله ومن التعب كنت ابكي

انهكت ع الاخر وكل ماجات عيني بعين ريم بكيت اكثر وهي كانت تمسح دموعها

صرخت وقلت ياريم تعبت متى تخلص هالكيكه قالت ريم تو الناس ياحصه باقي واايد

وبدت حرارت النار تسيل مكياجي وتوسخ الفستان وكنت اعاني من التعب الشديد

وفجأه علقت النار بإيديني وبديت اصارخ واصارخ

مثل ماشفتوني .. وانا خايفه خايفه ياشيخ

قال الشيخ استغفري ربك يابنتي وقومي توضئي وصلي ركعتين وان شاءالله خير

_______

اختها حست ان فيه شي هالحلم ومن الصبح ارسلت ايميل ع احد مفسرين الاحلام

وحلفته بالله انه يفسره لها بخيره وشره للضروره

وبعد فتره ارسل لها المفسر وقال خلي اختج هي اللي تروي لي ع التلفون

كلمته حصه وروت له اللي شافته وسألها عن شاللي تسويه وقالت له كل شي عنها

قال لها فيه شي انتي تخفينه او تسوينه بالخفاء شنو هو ياحصه

قالت فيه شي ياشيخ انا اسويه في احد المنتديات وبصراحه كانت وحده من صديقاتي

دايما تنصحني منه بس انا احب هالشغله واحس اني ماهره فيها

قال الشيخ شنو هالشغله

قالت انا مشرفه ع قسم بأحد المواقع وهالقسم يختص بتلبية طلبات الاعضاء

الخاصه بالاغاني وكنت ابدع فيه احول لهم الصيغ واسوي لهم مقاطع ومكسات وسوالف وايد

قاطعها الشيخ وقالت استغفري وتوبي هذا كان تنبيه من الله لج

الكيكه كانت عملج الغير صالح والقطع اللي ارهقتج هي صدقاتج بالذنب المشترك مع من

قطعتي لهم هالمقاطع وشجعتيهم عليه واسعدتيهم في توفيره لهم وطول الطوابير وتجدد الكيكه

هو الذنب الجاري وكبره فـ شوفي كم شخص اعطيتيه طلبه وكم شخص سمعه معه وكم شخص

نقله من منتداك الى منتدياتهم وكل هذا بسببك انتي

تقول حصه انهرت وقلت شسوي ياشيخ قال توبي لله توبه نصوحه وتبرئي عن كل
مافعلتيه بهذه المنتديات

خصوصا مايخص الاغاني والمنكرات وسأل الله لي ولك الثبات
وتوبي ياحصه توبي لانك ماتدرين متى الله ياخذ امانته والله يحسن خاتمتنا جميعا
ولاتنسين يبعث المرء ع مامات عليه ياحصه
يبعث المرء ع مامات عليه ياحصه





ياليت نستفيد من هاالقصه ونوصلها للي نقدر نوصلها لهم


وأن مايحرصون على نقل الاغاني ولا أنهم يسمعون أحد

لان الذنب عليهااااااااا

اللهم أستر علىيناوأحفظنا يارب





تصدقون أنا دايم أسمع أغاني وأحبها عااااادي

مادري كيف اتركها
جتني فترة وكرهتها كره العمى توي رجعت الله يتوب علي

من ايميلي

[الضمير مجاز]

طيّب ماتدرين هي تزوجت أو لسى !!؟


ليته سألت الشيخ على دربها هل السامري والعرضه فيهن شيء أو بس الغناء !!؟

[رونا]

اقتباس:  المشاركة الأصلية كتبت بواسطة الضمير مجاز     طيّب ماتدرين هي تزوجت أو لسى !!؟ ليته سألت الشيخ على دربها هل السامري والعرضه فيهن شيء أو بس الغناء !!؟

الله واعلم القصة على ايميلي
العرضة والسامري مافيه اي نوع من الميوزك ؟

[الضمير مجاز]

اقتباس: العرضة والسامري مافيه اي نوع من الميوزك ؟

ماشاء الله فتوى ع الفحم

مادام مافيهن أي نوع من الميوزك أجل توكلنا ع الله بروح اشتريلي كم شريط لأن براسي طررررب

[رونا]

اقتباس:  المشاركة الأصلية كتبت بواسطة الضمير مجاز     ماشاء الله فتوى ع الفحم مادام مافيهن أي نوع من الميوزك أجل توكلنا ع الله بروح اشتريلي كم شريط لأن براسي طررررب

لافكني الله يرحم ابوك
مو ناقصة اتحمل وزرك
اسال شيخ اصرف
وعلى الاغلب ان الدفوف كانت جائزة بعهده صلى الله عليه وسلم قد اباحها
اما غير كذا اظن حرام

[صريحةفي دنيامعفنة]

سبحان الله,, حلم غريب..بس ربي لطيف بعباده..

الاغاني..حرااااااااااام,,لانها بريد الزنا,,وتقسي القلب عن ذكر ربي


الله يتوب على الجميع

[رونا]

اقتباس:  المشاركة الأصلية كتبت بواسطة صريحةفي دنيامعفنة     سبحان الله,, حلم غريب..بس ربي لطيف بعباده.. الاغاني..حرااااااااااام,,لانها بريد الزنا,,وتقسي القلب عن ذكر ربي الله يتوب على الجميع

امين
يارب زوجك مايعرس عليك ويشوفك احلى الحلوين
يسلمووو على التعقيب

[ابو ريما الخالدي]

أستميحك عذراً ياسيدتي رونا

ولكن هذه القصص لاأصدقها

فهي شبيه بقصص الف ليلة وليلة


بس أبسأل

زود على سؤال الضمير المجاز

وعلى قولتك أن الدفوف جائزة

الخبيتي وش حكمه


تقبلي ودي وتقديري وأحترامي

وصابـحك خير و بركة

[الضمير مجاز]

اقتباس: وعلى الاغلب ان الدفوف كانت جائزة بعهده صلى الله عليه وسلم قد اباحها اما غير كذا اظن حرام

ويقولون الحريم مايصلح يفتن

( على الاغلب ) هذه لحالها تكفي والله مايقولها مفتي عام الجمهورية بزاته

اقتباس: الخبيتي وش حكمه

اعتقد حكمه على الاغلب

[بنت منيره]

الحمدالله تاركه الاغاني من كم سنه ومرتاحه

وبعدين اللي ربي بلها بسمع الاغاني اقل شئ لا تنقل لـ احد ولا توزعه


الله يهدينا ويفتع على قلوبنا

الواحد هدر اذا زرق قدم ماروه ودونه>>تقصد حصه اللي بدت توزع من هالاغاني

تشكراتي خيتووو

[الضمير مجاز]

اقتباس: ولكن هذه القصص لاأصدقها فهي شبيه بقصص الف ليلة وليلة

لايروح بالك بعيد ابو ريما

قصدها حقيقية يعني انها جاية لها بالايميل والا القصة واحداثها حلم مزعج

[بنت منيره]

اقتباس:  المشاركة الأصلية كتبت بواسطة ابو ريما الخالدي     أستميحك عذراً ياسيدتي رونا ولكن هذه القصص لاأصدقها فهي شبيه بقصص الف ليلة وليلة بس أبسأل زود على سؤال الضمير المجاز وعلى قولتك أن الدفوف جائزة الخبيتي وش حكمه تقبلي ودي وتقديري وأحترامي وصابـحك خير و بركة

المقصد انه الاغاني حرام

[ابو ريما الخالدي]

اقتباس:  المشاركة الأصلية كتبت بواسطة الضمير مجاز     لايروح بالك بعيد ابو ريما قصدها حقيقية يعني انها جاية لها بالايميل والا القصة واحداثها حلم مزعج

سيدي الضمير المجاز

أنا عارف بس هالاحلام والتي

تذكر وتقص بطريقة السيناريو المفصل

مو حلم هذا قصة

سبق أن سمعت أحد مفسري الأحلام الثقات يقول

ان الرؤيه الصحيحه أو الحلم الصحيح

لايتعدى فيه المشاهد الثواني

وليس هنالك حديث طويل فيه

بعكس هذا السيناريو المسلسل

من بداية الصالة الى تقطيع الكيكه

الى الحديث مه صديقتها

ربما هي قصة من نسج الخيال أبتدعها أحدهم للوصول لهدف

سيدي الغالي

الأحلام الصحيحه لقطات شبيه بلقطات المسلسل

عندما يعرضون تشاهدون غداً

بالمعنى الصحيح أنها ثواني

لاأن يكون هنالك سيناريو وحديث

دمت بود وتقدير ياسيدي الغلي لك

ولكاتبة الموضوع سيدتي الغالية رونا

[رونا]

اقتباس:  المشاركة الأصلية كتبت بواسطة ابو ريما الخالدي     أستميحك عذراً ياسيدتي رونا ولكن هذه القصص لاأصدقها فهي شبيه بقصص الف ليلة وليلة بس أبسأل زود على سؤال الضمير المجاز وعلى قولتك أن الدفوف جائزة الخبيتي وش حكمه تقبلي ودي وتقديري وأحترامي وصابـحك خير و بركة

اشوف القصة عادية وتدخل المخ والمخيخ هذا اولا
اما الدفوف فهي جائزة وش فيك انت والضمير ماخذين الموضوع تريقة
الرجاء احترام الموضوع
مادخل عقلك وحسيت انه خيال صفحتي تتعذرك انت والضمير
واسئلتك الزائدة وفرها لاقرب شيخ
تقبل تعقيبي

[رونا]

اقتباس:  المشاركة الأصلية كتبت بواسطة الضمير مجاز     ويقولون الحريم مايصلح يفتن ( على الاغلب ) هذه لحالها تكفي والله مايقولها مفتي عام الجمهورية بزاته اعتقد حكمه على الاغلب

وحلاتها انك ترددها كالببغاء
هههههههههههههههههه