حصيصه تعشق الفنان / مسحات ابن ملاس ( احلف ) !!

[د / ماسنجر]

[align=center]
/

\




ومع زقزقة العصافير وانبثاق الشمس من مشرقها تحلحلت حصيصه من على سريرها معلنة" صباح يوم" جميل .
استدارت لتتصل على صديقتها "رانيا" فتلك البنيه لديها خبره كبيره باللاعبين والفنانين والفنانات دار بينهن :

حصيصه / هلا قايمه؟ ( وهي اتثاوب )
رانيا / ايه توني صاحيه جالسه اشرب كاس كابتشينو واتابع مقابله للفنان / مسحات ابن ملاس عاد هم عايدينه تسان تبي تشوفينه افتحي تلفزيونتس صراحه مقابله خيال لا ويقول ......... ( قاطعتها حصيصه )
حصيصه / تعقبين !! وراتس ما علمتين طيب .
رانيا / انا قمت ونسيت مخليتن جوالي بالشاحن بعيد ومالي خلق اجيبوه كنت ابتصل عليتس بس صراااااحه خياااال .
حصيصه / كم بقى به البرنامج طيب عشان اشوف تسانوه يمدين تابعته
( الحين حصيصه تراه تسولف وهي متسلقيتن على فراشة ما كلفت عمره تروح تشغل التلفزيون وتشوف )
رانيا / ان ما قمتي الحين ترا يبي يفوتس لا وسالوه قالوا قد حبيت قال لا ولا مره ...!!!
حصيصه تقول بقلبه / واحلالاااات من حبه .

صورة للفنان / مسحات ابن ملاس



تابعن تلك الفتيات المقابلة للفنان / مسحات ، وانتهت رانيا إلى الخلود إلى فراشها ، أما حصيصه فقد غرقت في بحر الافكار بتمنى ذلك الفنان حبيبا لها .

بعد عدة أيام اجتمعن قريبات " حصيصه " ومن ضمنهن " رانيا " الفتاة التي كويسه .
وهن : حصيصه ، رانيا ، جواهر ، ريما

وكانت " حصيصه " تهوجس قليلا وكن جالسات في ال"بلكونه" وكما تعرفون حديث بعض الفتيات ، عن الفنانين واللاعبين ( اقصد بعض الفتيات صغيرات العقول ) .

قاطعها حديث جواهر للفتيات :

جواهر / بنات من اللي اسمه بالبلوتوث عاشقة مسحات ابن ملاس !
رانيا / هذي العشيقه ما تعرفونها ؟؟
حصيصه / أنا وراه به شيء حرام الوحده تحب ؟؟
ريما / حبحب جلدتس وضويرب ، حبي اهلتس ورجلتس لا اعرستي وش تبين بهذولا !
حصيصه / أنا معجبه به طيب مابه شيء يعني هو ماشاء الله الله يجعله ذخر للفن رومنسي ، وحساس ، واحس انه فاهم للحب قووووه ، يابنات ماتدرون انتم عنه لا قعد يغني احسه مره مره مره عايش جو الاغنيه اخر مره قال :
حبك شفطني مثل ما تشفطين حليب السعودية

جواهر / أنتي يا حصيصه فاهمه تراتس وعاقله وتدرين ان هذا خطأ انتي معجبه به وتعدى اعجابك وصار حب ..... انتي ما تحبينه اصلا بس تحسسين نفستس انتس تحبينوه وتراوه ما درى عنتس ولا مريتي من باله لو يقولون تعرف حصيصه كان يقول هذي طبخه ولا اسم شقق مفروشة !!

سمعن الفتيات صراخ ام محمد تقول :

ام محمد / نعنبوا داركن ما تقضي سواليفكن قومن يالله العشا ، وانتي يا ريما قومي ضفي اخوتس وعطيه ياكل عجلي .
ريما / فاضيتن له انا عندتس شغاله
جواهر / قومي يا ريما هذي أمك مهما كان .
وذهبن إلى العشاء و حصيصه ، تفكر بكلام جواهر له حست إنه تجاوز اعجابه بحب وانه على خطأ .

فعلاً هذا هو حال الكثيير من فتياتنا ينقلب إعجابهن الى حب ، ولو أن سماع الأغاني حرام ولكن يجب ان ننتبه لأمور كثييره جدا .

فكلنا يعجبنا فلان واللاعب فلان وشخصية فلان كهيئة وذوق في الكلام ولكن لا يصل إلى حد اننا نعشقه ونضع اسماء بلوتوثنا : عاشق الفنانه شباصه وعاشقة اللاعب درج !

حتى ان بعض الفتيات أصبحن يبحثن عن صورهم وتعليقها في الدولاب او وضعها في الجوال كـ ثيم وخلفية ، وليته علم عنهن كما قالت جواهر في اخر كلامها .

والمُصيبة أن بعض الفتيات أصبحن الآن يعشقن المشائخ فالشيخ فلان يازينه وهذا يا ملحوووه حتى في بعض المنتديات يضعن الصور الرمزية لهم كاعجاب وحب .

نحن أكبر من تلك المفاهيم التي لا تعطي صاحبها قيمة ولا تعطيه مقام بين اهله وزملاءه واصحابه سواءا شاب أو فتاة .

ورداااتي لكم بطعم قصدي برائحة الكبتشينو حق رانيااا


بـ مقلمة د / ماسنجر[/align]

[تلميذة الحياة]

ههههههههه الله يرجك !!

الإعجاب صار دقة قديمة الحين ..

يالله لاتعلق قلوبنا الا بحبك وبطاعتك ..

.
وسلم لي على رانياااا هههههه

[بنت البدائع]

قصه حلوه يا د\ مسن

هذا حال أغلب البنات المراهقات الله يصلحهن

هي واقفتن على البنات بس

حتى كبيرات السن "الراشدات" أحياناً يوصلن هالمواصيل

لاشفتهن أيام مسابقة (شاعرالمليون)

يقولن ياملح ذا

يازين شعره ,, وياليته يفوز

وهن أمهات 40 وحول ال50

حتى لجنة التحكيم ماسلموا منهن !!!

نعم قد نُعجب بالشيخ الفلاني أمثال(عائض القرني)
والدكتور الفلاني أمثال( طاهر ميسره)
والقارئ الفلاني أمثال (محمد المحيسني)لكنـ بحدود كما تفضلت..

[د / ماسنجر]

تلميذة الحياة

((( ههههههههه الله يرجك !!

الإعجاب صار دقة قديمة الحين ..

يالله لاتعلق قلوبنا الا بحبك وبطاعتك ..

.
وسلم لي على رانياااا هههههه

)))

هلا بتس ومرحبتين واللهم امين
دقة قديمه بس الحين طايحينن به الناس القراوا اللي توه تجيهم


وردااااتي لتس سلااام

[باونتي]

الله يستر على بنات المسلمين يارب ..........

[هامة حاسوبية]

[align=center]



د / ماسنجر


جميل هو أسلوبك الساخر

وقد وضعت يدك على الجرح حقيقة

فكثير من الفتيات وعادة هن من المراهقات يـُعجبن بالمشاهير ويصلن لحد العشق

أذكر لك فتاة إماراتية تحب فزاع (الشيخ حمدان) إلى حد الجنون !

مادعاني للضحك عليها وأن أرأف بحالها في نفس الوقت هو أنها تقول : إما أن أتزوج فزاع وإلا فلا

كل الرجال سيئين ماعدا فزاع !


سبحانك ربي ! عندها علمت أنها غارقة في حبه حتى الثمالة


كل الشكر لك أخي





[/align]

[خـــــــــــــــالـــــــــد]

اخي د. مسنجر


يسلم راسك موضوع هادف و قيم و باسلوب جذاب


يستحق التميز كل الشكر لك

[توتي]

ياخي خلهن يعجبن بايديهن ورجلينهن اذا صار اللي ماخذن عقولهن واحدن يسوى شيخ على قولتك
او تسانهن مخرباته بواحدن مزيون

البلا اذا صارت منهبله بفيفتي سنت
او راشد او مساري او ويل سميث

[د / ماسنجر]

بنت البدااايع

والله انتس صااازه مررره كل واحد مملوح من اي فئه صاروا يحبونه

اذكر حرمه كبيره بالسن كانت بمجلس ومر بالشاشه احد المشايخ المملوحين تدرين وش قالت ؟؟؟؟
قالت كلام والله اني استحي اكتبه هناااااا
استغفر الله بس


ورداااتي لك سلاااام

[د / ماسنجر]

باااونتي
اللهم آآمين ورده ع شان مرورتس

"""""""""""

هامه حاسوبيه
تدرين وش يرفع ضغطي !!!! انه تبي تعرس عليه يااااهي تذرف ثقه
شفتي وش لون هي تراه معجبه يمكن بشكله شعره كانه شاعر همن عاد انقلب حب

هذا اللي اقصد الله يكفينا الشرر



وردااااتي معطره لتس سلاااام

[Queen of buraydh]

موضوع توووووحفه

كح .. طلع غباااار ايام زمااان.. من جد احس هذا الشي تخلّف .. !!

[د / ماسنجر]

خااالد

الله يسلمك ومن ذوووقك والله







ورداااااتي لك سلاااام

[الكبري]

رائعة مقلمة د / ماسنجر


لاشك أن هذا الأسلوب هو أروعها لإيصال الرسائل وخصوصاَ إن كان الحديث عنها قد استهلك .

فهذا الأسلوب يلبسها ثوب آخر من المتعة والتشويق ووصول الرسالة .

لكم أطيب المنى

[خالد التويجري]

فعلاً أتفق مع القول أن مثل هذا الأعجاب "تخلف" ..,
لأنه خيال أكثر من كونه واقع ..,
وإلا كيف صار لمجهول قيمه "عاطفيه" و "حسيه" في عقل ذاك أو تلك .,؟

وكيف صيّر لعقل ذلك المُعجب به "أنموذج" للصح ..؟ في الأحاسيس والفكر .., والتصرف .., والعلاقه ..,!
إلا حصاد هوى النفس .., والشيطان .




تحياتي .,’

[الذاهـبـة]

مرحبا دكتور مسنجر ..

الصراحة إن موضوعك قلّب مواجعي ..

أنا بعترف و هنا في هذا المتصفح إني سبق و طحت بالغرام ..

لأ .. و مرتين بعد ..

أما بطل أحلامي الأول :

فقد كان شخصية كارتونية ..

اسمه ( بسام ) في مسلسل كابتن ماجد ..

أمممممم

ما تصدق يا دكتور شكثر استحي إذا جت اللقطة عليه ..

عاد هو ملعون كان قوي مرة ..

و اسمر .. و يشمّر الفانيلة بشكل خرافي ..

أما عاد هجماته .. و الأهداف حقته .. !! مهب صاحية أبد ..

لله يذكره بالخير ..

أما البطل الثاني ..

فبرضو .. مهاجم بس حقيقي عاد موب كرتون .. !!

كنت وقتها في خامس ابتدائي .. أيام كأس العالم ..

و مازلت أتذكره ..

روبيرتو باجيو ..

المشكلة وجهه كأنه وجه عنز ..

بس ذوقي دمار يبدو .. !!

كنت أتابع الدوري الإيطالي و الإنجليزي .. و الأسباني و البرازيلي ..

و حافظة كل النوادي الأوروبية و اسماء اللعيبة ..

أنا مادري أهلي وين !!!

تاركيني أتابع مباريات .. شويه أصير " صبي " .. !!


إيــــــــــــــــــــــه يالسنين .. تزحلط بسرعة !!

المهم الإعجاب هذا خربوطي ..

و إن شاء الله ما يأثر ..

المصيبة الإعجاب المثلي .. في المدارس و الجامعات

اللي طالع موضه قوية ..

نسأل الله السلامة و العافية .. !