السلام عليكم ورحمة الله وبركاته ...
هذي مشاركه بسيطه وهي اول مشاركه لي في هذا المنتدى
لقصيده اعجبتني واتمنى تنال على رضاكم ,
القصيده من الشاعر المتميز سعد بن علوش بعنوان ((( القلب النبيل )))..
السحا من اللي خلق هالعالم ومغنيها --- السماء هذا سماه .. القاع هذا قاعه
وجعل نفسٍ تستمر فمعصية باريها --- تبطي وهي بين ضلعين الحنك نزاعه
لا جفتك الديره وضاقت بك وباهليها --- وجاك من جيش الهموم ثعالته وسباعه
وفسقوا العالم وناشب خبلها صاحيها --- وحكية الرويبضه وانبطروا الزراعه
غط خشمك في التراب .. وقول يا مفنيها --- افنّي وانا مسبحٍ لك بسمع وطاعه
راكب اللي ضمّر من سهابها جنبيها --- اولف من الجد ومظلالها جزاعه
لو قفت رزت قواصيها على دانيها --- ولا مشت يطري عليك الهوش والفرّاعه
لون مقدمها صباح الخير ياراعيها --- ولون موخرها مثل ما تشعل الولاعه
في نحرها المجد والمجد الرضي قافيها --- وفي وسطها غاروا الشيخان والفزاعه
يعقب سوّامها قبل يخسى شاريها --- ما تجمّع عندها الدلال والبياعه
من مرابط عز وراعيها مهب مصخيها --- ما يودعها المودع عند اخوه وداعه
امخشوشه لين ياتي فالسبق طاريها --- ولا اظهرت لفّت رقاب العالم الطماعه
كنها في مركب السواس ومباريها --- بنت امير من كثر طيبه تحشم اتباعه
وكن الارض تقول فيها يالله تحييها --- جعله ابرك يوم جيتي فيه وابرك ساعه
ولا ابتدا المركاب وجنك الخيل من تاليها --- جاتك اولهن تقل في ذيلها دراعه
ضرب يديها على البيدا قبل رجليها --- ضرب اصابع فارع تطبع على طباعه
تنحر اللي يعرف القصه قبل لا احكيها --- بس ابحكيها عليه واقفل السماعه
الرجال اشكال .. وعاليها على واطيها --- وفيهم الادني والادنى .. والدني بانواعه
وفيهم اللي لا بغاله حاجه يسويها --- مايرده عقل ولا تحتميه اطباعه
وفيهم اللي لا رمى الطولات ما يخطيها --- كل ما هبت هبوب الطيب فل شراعه
وفيهم اللي لاخذا الحسنه مهب يجزيها --- وهذا اردى شي وابشع نوع واكبر راعه
وفيهم اللي جاته الدنيا وهو هاويها --- حظه يكسّب له اللي ما كسبه ذراعه
وفيهم اللي علته في جوشنه كانيها --- ماتسولفها زوايا خافقه لاضلاعه
وفيهم اللي شلّ هم الناس ومحاتيها --- ومافلح فاوضاعهم ولا التفت فاوضاعه
وفيهم اللي لا حكى كلمه مهب يثنيها --- وفيهم الزيزوم ووجه الخير والطرقاعه
والحياه اشياء تتراكم على بعضيها --- وما يفرق بعضها الا من يحسب اوجاعه
والله اني صرت لا ابغضها ولاا ادانيها --- معتبر نفسي متاجر والصلاه بضاعه
لان قلبي من عرف وشهو الصلاه وفيها --- غاديٍ كنه وهي البزر والمرضاعه
ووالله يا رجل يجنبها ولا يدّيها --- ان ماله خانه ومافي امره طماعه
وانت لو زليت عندي زلتك ناسيها --- وجعل كبد اللي ماهب يغليك اللاعه
صاحبي لا تعرف الانفس ولا خافيها --- النفوس من النفوس الخافيه ملتاعه
صاحبي مر الليالي من سبب حاليها --- صاحبي انزع من القلب النبيل قناعه
منتب مكوش على الدنيا ولا محصيها --- انشد اللي لاعب الدنيا براس اصباعه
سته وعشرين عام افلها واطويها --- صبحها رغابه وفي ليلها مناعه
صاحبي جنب حراميها قبل حاميها --- صاحبي صاحبك من صدقه يهل ادماعه
بنصحك نصيحه ما عادني بثانيها --- دام عمرك ساعه اجعلها لربي طاعه
وسلامتكم ,,
على فكره ... هذي اول قصيده للشاعر بعد ان اعتزل الشعر الغزلي ...
العرض العادي
