|
كائن غريب في بيتي
تحية طيبة للجميع ... وبعد لي مع الشغالات علاقة طوبلة تمتد لسنوات عديدة تعاملت فيها مع جنسيات مختلفة ونفسيات متباينة إكتشفت من خلالها فشلي الذريع في إدارة أصحاب السعادة \ الشغالات فإن تعاملنا معهن بطيبة استغلونا وأنا تعاملنا معهن بحزم فالويل لنا فالأكل تحت إشرافهم والأطفال بين أيديهم وهذه وسيلة ضغط ترعبنا منهم أما المحظورات فحدث عنها ولاحرج فلم نفلح في منعها والسيطرة عليها ففي كل حملة تفتيشية تقوم بها قواتنا الخاصة نعثر فيها على شرائح جوال ومسروقات لا عد لها ولاحصر ووالله وبالله وتالله لولا حاجتي الضرورية ﻷعلنتها مقاطعة أبدية للعمالة المنزلية لكن الحاجة جعلتني أغض الطرف واقول (ياسيدي) والسؤال الذي يطرح نفسه وبين أيديكم أضعه ماهو الأسلوب الأمثل والأفضل للتعامل مع هذا الكائن الغريب في بيتي ؟؟؟ لأتعايش معه وأسلم من غوائله وللجميع حبي وتقديري |
اعاننا ربي بس ..! عندنا وعندك خير .. وادهى وامر:( ان شددنا عليهن ولاحظناهن هجن ماكملن السنه .. وان ارخينا لهن اكلننا ونهبننا وعيوننا طايره ! واذا عمرك جربت سواق وزوجته وربي انك وطيت الجمر وانت راضي ..! يروحون يتكسون هالصبح وتنقل له كل اللي بمطبخك ويقضن سراويلك وفنايلك :( ويزعلون ويطنقرون جميع :( تعبت نفسياتنا وراحت قروشنا وفشلت كل طرق الاستغناء عن الخدم .., هه توي مديت لشغالة امي كرت مرحبا ابو خمسين وانا فرحه:) يوم ناظرتوه قالت وشوله ماجبتي بطاقة شحن سوا هذا لازم انزل تحت للتليفون بدليه لي :( والثانيه مطنقره من امس تقول وشوله كل شوي دله وابريق حطوا قهوتكم وشاهيكم بترامس مثل اللي انا كنت عندهم قبلكم ياعساكم للمر:( |
طبعا المدامات مرتاحات ونايمااات في العسل ومرتزااات امام المراياااا واللابتوباات
والبيت يعيث فسااادااا بايدي القذورات الشغاالالالالالات ثم ناتي لعرض مشاكلنا ونقووول تا الله وبالله مقدر استغني قسم بالله وتالله وايم الله واالله ان 99,99 % ليس لهن حاجة وفقط شكلياات وخنفشارياات وعطزياات لاحدود لها |
بصراحه انا ماحبهن ولا احب اتعامل معهن
من بعد ماانتحرت شغالة اختي وانا حالفه حلف ما يدخلن بيتي والا لو تسحرن عاد وش يفكن؟ مره رحت لشيخ يقرا شفت بنت مسحورة من شغاله تقول امها ان لها 5 سنين تقرأ والجني اللي به يقول تموت هي ولا اطلع فرقعين اجيب شغاله واعيش طول عمري من شيخ لشيخ ..لا بالله مايحتاج حتى لو المراه موظفه تحط اطفالها في حظانه او روضه او تمهيدي ولا تجيب لهم شغاله ..! |
حرام عليك انك تقول كائن غريب هي انسانه له حقوق و عليها واجبات
المشكله انه مافيه قانون يحمي حقوقك وحقوقها شكرا |
ماهو الأسلوب الأمثل والأفضل
للتعامل مع هذا الكائن الغريب في بيتي ؟؟؟ تزوجها وراح ترتاح وهي ترتاح |
خلك رسمي
يعني لاتشد عليهم بالشغل بحيث تكرفهم ليل ونهار وبنفس الوقت لاتدلعهم بزود وأهم نقطه لاتخلي خدامتكم تخالط الخدامات الثانيات عشان مايخربونه عليكم |
اولا اعجبني اسلوبك بالموضوع فيه فن ادبي
ثانيا لا تكن لينا فتعصر ولا قاسيا فتكسر مع الشغالات ثالثا ان جيت للحق فتركهن ابرك واحسن بكثير |
هالخدامات ينطبق عليهن مقولة (يامن شرى له من حلاله عله) .
الحمدلله مانواطنهن بعيشة الله ومفتكين من شرهن . تصدق لي صديق وشاب حليو ومؤدب وخلوق وجاد بحياته وعلاقته قوية مع ربه صار يتضايق إذا بغى يزور أمه عندها شغاله فلبينيه وتراكض وراه . مسكين تعبان نفسيا وماوده يقول لأمه يخاف يسوي مشكله مع زوج أمه وتصير سالفه . |
أخي البارق..
أنا ليس لدي شغالة ولكن من قبل زواجي والأهل لديهم شغالات.. أهلي طريقتهم أن الشغالة من غرفتها للمطبخ فقط لا تأتي بشيء ولا تخرج أبد ( يعني ما نشوف ولا زولها- ونااااادر جداً إننا نتحدث معها ). أقصد أنا وأخي.. غير هذا أهلي يتعاملون معها بطريقة شد وأقطع ولا يخلون عليها قاصر بس بشرط الانضباط. ولا يستخدمون أسلوب الهوش أو رفع الصوت عليها أبد أبد ( بالتعليم والتفاهم ). المهم ماكدرسافرت وحده وشفنا عندها شيء أو زينت شيء أبد بالعكس والله انهن يصيحن إذا قربت مشيتهن. تقديري لك،،، |
امسك مع وسط العصا اسلم واحسن لك |
اقتباس:
ويقولون ليش نسبة السمنه ملعلعه بالسعوديات وانواع الأمراض (سكري وكوليسترول وضغط) . لايصيرن هالشغالات ياسكينه يقصقصن ظفور رجلينتس ويهمزنتس . قالت إيه ..قالت قتاله ...قولي (رباضه) معقوله على هالتبطح :a4: |
من يقاوم طعم الراحه ..؟ اذا صحيت الصبح واثر كلشي يوضي واستدنيت المبخره وبخرت جاني شعور اني انا اللي منظفه كل شي :) ولمني تبيزعت وصلحت حلا بس اطلع من المطبخ وماعلي من قنبلة هيروشيما اللي ثورتها قبل شوي :/ وثيابي بتله مغسوله ومكويه ومرتبه ومصففه بدولابي تقل حلاو:) وكلوه كوم ولصرت طالعه للسوق وانا مقبله اكلمها ياسيلانا ولمي القهوه ياحيي واول ماادخل الاقي الصينيه تحتريني بالصاله قهوه ناطعن هيلها وتمر سكري:) وعباياتي الهفهافات بتله مكويات ومولامات بس يتحرني اقبل عليهن :/ منافعهن تبرد التسبد ولجتك قرمه نمره تنسيك عذابات الكرف والكريف بس غثاهن يبيلك تركب لك قلبين علشان تتحمل .., |
مجرد امسيك بالخير .... لا املك اي خبرة بالموضوع .... ولله الحمد |
اقتباس:
لاتخطرفلي ياعسيلان .., ياحيي كلن وظروفه .. بيوتنا مالهن بيبان ,, هذا داخل وهذا طالع وذاك بيمرح اليوم .. وهذا غدا وذا عشا وذي ذبيحة فلان:( ماعندنا هاتوا قطية عشاكم ولا كلن يجيب ترامسه ! شاهينا وقهوتنا بدلال واباريق وآبو ناره ماتطفا وضيفانه مايبعدون ! |
| الساعة الآن 12:50 pm. |
Powered by vBulletin® Version 3.8.8 Alpha 1
Copyright ©2000 - 2025, vBulletin Solutions, Inc. Trans by
موقع بريدة