*_^ ناويـ/ـه تشتريـ /ـن لابتوب ؟ .. هنا دليلك

باونتي · 11-01-08, 06:57 pm

السلام عليكم ورحمة الله وبركاته

من ملاحظتي البسيطة خلال الايام السابقة
شفت كثير من الناس بدت تهتم في في اللابتوب
حتى احد الدراسات القريبة ذكرت نمو سوق اللابتوب 60% !
مما يدل الاقبال الكبير على شراء هذا النوع من الاجهزة الحديثة

وايضاً رافق هذا الاقبال تساؤلات عديدة واسئلة متكررة من المشترين
نظراً لكثرة الشركات والموديلات وتعدد الاشكال والاصناف
وهذا للاسف لقلة خبرة الناس بالجانب المعرفي لمواصفات وقطع الجهاز ..
يعني ماعندنا ثقافة كمبيوترية بالعربي ..

عشان كذا رح احاول اطرح في الموضوع شرح واضح ومختصر ومفيد ان شاء الله
في خطوات اختيار اللابتوب المناسب والنصائح الهامة للشراء ..
(اما الدسك توب او الـ PC نخليه لموضوع آخر لانه يحتاج موضوع منفصل وتفاصيله اكثر)

اولاً
هل فعلاً انت بحاجة الى لابتوب !؟

سؤال وجيه لازم تسأل نفسك قبل لا تشتري
لاني لاحظت كثير ناس طايرين بالعجة بس يشترون عشان فلان وعلان عندهم لابتوب

اذا كان شغلك في البيت او المكتب فقط ، خلك على الدسك توب اصرف لك
غير كذا الدسك توب بنصف سعر اللابتوب وقابل للتطوير عكس اللابتوب اللي صعب تطويره (الذاكرات فقط)

اما اذا انت مدمن كمبيوتر وتحب تتبطح وتتسدح يمنة ويسرة(== متعوب عليها
او انك كثير التنقل او انك تستخدم الوايرلس (الاتصال اللاسلكي) او ان معك كاش وتحب تدلع نفسك
اللابتوب خيارك الافضل ..

ثانياً
ما هي المواصفات والقطع الموجودة بالجهاز !؟

معرفة المواصفات والقطع هي الميزان لمعرفة الجهاز الجيد من الجهاز السيء
ورح نستعرض اهم القطع واسمائها وعملها حتى نعرف نختار الافضل :

1- المعالج
المعالج هو مخ الجهاز - مثل المكينة للسيارة - مثل القلب للانسان (== مايمديكم على التشبيهات
هو المحرك لكل العمليات في الجهاز ، لذلك لابد ان يكون معالج حديث وسريع
المعالجات الجيدة من الاحدث الى الاقدم :
(Intel)
Core 2 duo
Core duo
Centrino
Celaron ******** سيء جداً ولا يشترى بريال

وهي طبعاً سرعات تبدأ من 1.6 الى 2.3 Ghz

وفيه شي اضافي وهو (الكاش)
والحجم القياسي منه 2 ميقابايت والافضل 4 ميقابايت

ايضاً توجد معالجات AMD
والجيد منها AMD Athlon 64 X2
والمعالجات الثنائية النواة عموماً جيدة
اما AMD Sempron (== بطيء ما انصح فيه

طبعاً Intel و AMD في منافسه شديدة ومتقاربين في المستوى
لكن العديد من المستخدمين ينصحون بالانتل لانه الافضل

2- الهاردسك
الهاردسك هو المساحة التخزينية لملفاتك على اللابتوب
وفيه احجام متعددة .. ويقاس بالـ GB = قيقا بايت
الحجم القياسي 80 وكل ما زاد يكون افضل ..

(اللي راعي افلام ومايعرف يحسب المساحة اللي يحتاجها
القيقا الواحد يستوعب 3 ساعات فيديو تقريباً وعليك الحساب)

3- الرام
الرام هو اليد اليمين للمعالج .. مثل السكرتيرة للمدير (== تشبيهات مشبوهة
لذلك هالقطعة مهمة جداً ولازم تنتبه لها
الرام احجام ، فيه 512 ميغا بايت
وفيه 1 قيقا بايت (يعني 2 في 512)
وفيه 2 قيقا بايت وهذي اقصى سعة للابتوب حالياً ..

4- نظام التشغيل
معروف واما يكون Windows او linux او Mac
واحياناً يباع الجهاز بدون نظام تشغيل (هذي صفة سلبية لان اغلب العروض تتضمن نظام تشغيل اصلي)

سؤال يتردد كثير ، آخذ ويندوز فيستا ولا xp ?
الآن المنتشر والجديد Windows vista وهو نظام محترم ورسوماته تفتح النفس
يعيبه ان فيه ثقل بسيط يعني مو مثل انسيابية الـ xp
بس بشكل عام نقدر نقول الفيستا هو الخيار المناسب وفيه عدة اصدارات منه
وكل جهاز مخصص له الاصدار المناسب لمواصفاته

وانبه اذا نظامك فيستا لابد يكون الرام عندك لايقل عن 1 قيقا
وايضاً من المفضل كرت الشاشة يكون 128 ..
وشو كرت الشاشة .. تابع معي ..

5- كرت الشاشة
كرت الشاشة قطعة خاصة في معالجة بيانات الصور وجودتها
وهو احجام فيه 64 - 128 - 256 - 512
وهي نوعين : كرت مشترك - كرت منفصل

الكرت المشترك يكون مشترك مع المذربورد اللي هي قاعدة الجهاز
وميزاته
توفير البطارية بشكل نسبي + انخفاض سعر اللابتوب عموماً
سلبياته
يسحب من الرام حسب سعته
يعني اذا الكرت 128 والرام 512 = يصير الرام 384
ومايصلح للعب الالعاب الـ 3D او الالعاب القوية ..

اما الكرت المنفصل يكون قطعة منفصلة عن المذربورد وتقنيته اعلى
ميزته
يصلح للمصممين وراعين الالعاب ويعطي وضوح
سلبياته
يرفع سعر الجهاز + يستهلك البطارية اكثر نسبياً ..

يتبعــ

باونتي · 11-01-08, 06:57 pm

6-

6- حجم الشاشة
احجام الشاشة تبدأ من 12 بوصة الى 17 بوصة
القياسي والمنتشر 15 بوصة
اذا انت تبي لابتوب خفيف وسعر مناسب خذ 14 بوصة
(كل ماصغرت الشاشة عن 15 زاد سعر الجهاز وكل ما ارتفعت ايضاً)

واحرص تكون الشاشة كريستال
يكون مكتوب عليها بالغالب TFT او Crystal view
وتلاحظها تكون سوداء وتعكس صورتك من الصفاوة ..

7- مشغل الاقراص الـ CD & DVD

مشغلات الاقراص انواع وافضلها الـ super multi
يعني يقرى وينسخ الـ CD والـ DVD
ومعظم الاجهزة الجديدة حالياً تتوفر بهذي الميزة

8- كماليات الجهاز
البلوتوث Bluetoot
الكاميرا CAM
اغلاق وفتح بالبصمة finger print
كتابة الاسماء والصور بالليزر على الاقراص light scribe

طيب الآن نستعرض موديل محدد كـ مثال حتى نعرف مواصفاته

Toshiba (== شركة الجهاز

Satellite A200 - 130 (== موديل الجهاز

• Intel Core Duo T2350 1.86 (== المعالج

• Windows Vista Home Basic (==نظام التشغيل

• 120 GB Hard disk (== حجم مساحة التخزين (الهاردسك)

• 1024 MB DDR 2 RAM (== حجم الرام

• 15.4” TrueBrite TFT(== حجم الشاشة ونوعها

• DVD Super Multi D/L (== نوع مشغل الاقراص

• Shared 256 MB (== كرت الشاشة وحجمه (shared = مشترك)

• built-in camera (== كاميرا مدمجة

• year international warranty (==مدة الضمان

ثالثاً
كيف تشتري الجهاز المناسب لك من مئات الموديلات !؟

الجواب في سطر واحد :

( حدد وش استخدامك للجهاز وتعرف الموديل المناسب لك بالضبط )

اذا انت راعي العاب او هوايتك التصميم ركز على كروت الشاشة المنفصلة ومعالج سريع
اذا انت راعي نت وتحميل وبرامج اوفيس ممكن تمشي معك مواصفات قياسية ومتوسطة
اذا انت راعي ملتميديا (صوتيات ومرئيات) وتخزين ركز على مساحة الهاردسك وحجم الشاشة
اذا انت تتنقل كثير خذ لك حجم شاشة صغير حتى يكون الجهاز خفيف
وهكذا تحط الموديل اللي في راسك حسب المتطلبات اللي يلبيها لك ..

رابعاً
السؤال الكبير : من اي شركة اشتري أو أي الشركات افضل !؟
كثير من الخبراء واصحاب المحلات تلقاهم يترددون في الاجابة عن هالسؤال
لانه في عالم اللابتوب صعب تحكم او تفاضل بالشركات بالجملة !
حتى المواقع العالمية في التقييم ما تقيم بناءاً على الشركة المنتجة
انما على الموديل + المواصفات
هذا المهم فعلاً !!
لانه في وجهة نظري الشركات الآن في منافسة شديدة وما عاد فيه مراكز ومفاضلة كبيرة
Dell - Toshiba - Sony - Asus - Siemens - IBM (think pad) - Acer - HP
كلها شركات قوية وكل وحده فيها لها ميزاتها

وباحط تعليق من سطر على كل شركة :

sony - لعبتهم الشاشات الصغيرة
Asus - للمفاخرة والتميز
toshiba - لكل الاذواق تلقى طلبك
Dell - مع توشيبا وجهين لعملة وحده
HP - للترفيه معنى ثاني
Siemens - الجهاز المثالي (جودة+سعر)
Acer - اقل سعر باداء ممتاز
Hier - شركة ثلاجات طلعت لابتوب اقل سعر شفته في حياتي (احد يجربه ويقول لنا وش هو)يتبعـ

باونتي · 11-01-08, 06:59 pm

خامساً
من وين اشتري ووين القى افضل الاسعار !؟

العديد من الاماكن تبيع الاجهزة
باتكلم عن الرياض والاساس في سوق الكمبيوتر او (حراج الكمبيوتر)
وهو بالعليا بجنب سوق الفيصلية باتجاه الجنوب ..

ومكتبة جرير عندهم من كل الموديلات والشركات واسعارهم ممتازة
وانا صراحة ما اخذ اجهزتي الا منهم وقت العروض ..

وفيه اماكن ثانيه مثل - اكسترا - Best
وايضاً الهايبر ماركتز مثل جيان - كارفور وغيرهم

افضل طريقة للشراء انك تشوف العروض باكثر من مكان وتقرر الافضل
يعني لاتتحيز لمكان واحد يمكن تلقى احسن منه في مكان ثاني
وحاول تنتبه للعروض الاسبوعية اللي تنزل بعطلة الاسبوع غالباً ..

بالنسبة للدعم الفني والضمان ما عندي خلفية كبيرة
لاني ولله الحمد ما واجهتني مشاكل عشان اجرب الوضع
بس كل وكيل وله مشاكله يعني لاتهتم للموضوع هذا كثير ..

سادساً
طيب انا ما معي .. اشتري مستمعمل !؟

انا شخصياً ما انصح في المستخدم .. خصوصاً اللابتوب
لان البطارية كذا تكون مستهلكة ولا تدري عن استخدام راعيه الاول
يعني لو ان اللابتوب سعره مثل اول خمسة وستة الآف صح يمكن نشتري مستخدم
لكن الآن ممكن تجيب لك جهاز جديد معقول بـ 2500 ريال اذا كانت ميزانيتك محدودة
واصبر الى ما يجي معك هالمبلغ افضل لك من جهاز ماتدري عنه ..

اخيراً

# عمر البطارية الافتراضي من سنتين لثلاث - حسب كثافة الاستخدام -

# عمر البطارية في الاستخدام للمره الواحده ساعتين لثلاث - حسب نوع الاستخدام -

# تذكر دائماً ان (مواصفات) الجهاز اهم بكثير من (شركة) الجهاز لانها الاساس

# تأكد دائماً اذا شريت جهاز من ان المواصفات تكون نفس اللي طلبت
( عن طريق ابدأ ---- تشغيل ---- تكتب الامر Dxdiag ورح تظهر لك المواصفات)

# اذا كان فيه رقم او كلمة غريبة في المواصفات ماعرفتها لاتتردد في سؤال البايع
حتى يشرح لك لان التفاصيل مهمة

#

- تم بحمد الله -
هذا اهم ما رغبت في توضيحه للمشتري العادي
اتمنى اني وفقت في الطرح والايجاز باسلوب بسيط
ومن جاز له الموضوع لا يحرمني من دعوة طيبة ..
وانا لكم من الشاكرين .. عجني ثناء تصفحي موقع تقني

اختكمـ ::: باونتي