ماهو السر في ازدحام مطاعم البيك؟؟ لااحسده

[راعي الكار]

السلام عليكم ورحمة الله وبركاته

اللهم صل على محمد وعلى آله وصحبه أجمعين
كنت في اليومين السابقين في رحلة إلى أحد المدن المجاورة(اللي به فروع البيك)مع بعض الشباب وكان كل الطريق متى نتعشى من البيك متى نتعشى من البيك حتى وصلنا البيك , (وش تناظر عالم ماسكه سرا)
على العموم طلبنا العشاء (وأنا أناظر الناس اللي واقفه)
جاء الطلب وتعشينا ,ثم ذهبنا إلى الشقه لنخلد إلى الراحه,حاولت أنام عجزت أحاول ماقدرت :تدرون ليش؟؟ من شدة العطش ....
إلى أذان الفجرو أنا أتقلب.
قلت في نفسي خلاص ماأكرر إني آكل من البيك(العطش)
ياترى ماهو السر؟؟؟في حب الناس للبيك

[الذاهـبـة]

هذي طبيعة الناس ..

تحب تقلد بعض .. و تطير بالعجة ..

البيك ممتاز ماعليه كلام ..

و خدماته ممتازة بعد ..

بس العالم تمشي ورا شي يسمى ( الخدعة ) ..

شوف انت الحين وش تقول :

(( متحمسين كلكم .. متى نتعشى من البيك متى نتعشى من البيك )) .. !!

من حط فيكم هذا الحماس و الشوق للقاء الأفخاذ المقلية ؟

إلا الخدعة ؟!



أنا مثلاً أقدّر وجبات فيدركرز ..

و أقدر سلطات داجن ..

و عملت لهم دعاية داخلية وسط العائلة .. و تظاهرت بالهوس مقابل طبق من هذا المطعم

الحين كل أهلي يموتون عليه أكثر مني ..

لاني خدعتهم .. هه !

أحد فهم شي يالربع ؟

[فور يو]

السر ياراعي الكار

ان بعض ربعك و بعض الناس مع الخيل ياشقراء ...

[العبرى]

أن يكون الأمر إذا جينا الحجاز نآكل من البيك لازم..فهذا عادي..!

لكن لكم أن تتخيلوا في أحد المرات..

طلب منا إحضار طلبات من البيك..لبريده..!

مما إستوجب حفظها في الثلاجه طوال الليل..ثم وضعها في حافظة الطعام

طوال الطريق.. ألف كيلو (قد تكون)..والبيك بالسياره..!

والجماعه (أصحاب الطلب)..يقولون عادي لو بارد..نسخن ونآكل..!!





تحيتي,,,

[خالد التويجري]

مقسم الارزاق بالسماء ..., اللهم لا حسد .

فعلاً البيك كسب شهره ..., وفي ظني يستحقها . وإلا لما صارت له .
بالنسبه لوجباته فهي بكل حق وجبات "مشبعه" بسعر "معقول ومنطقي" .
البيك جمع بين ..
النظافه .., اتقان الوجبه على اصولها .., كميه من الطعام تكفيك .., دقه متناهيه وحرص على جودة الطعام .., بألإضافه الى السرعه الغير طبيعيه في أنجاز وجبتك وتسليمك أياها حتى مع وجود عدد كبير من الزبائن قبلك .
مهما كان كميه هذا الطلب .
كل هذا بسعر معقول ولا جشع أو طمع فيه .
لذا حق لهم هذه الشهره ..., لأنهم الآوحد في قلّة الطمع و الجشع ..


تحياتي .,’

[احب النت]

صحيح الناس مع الخيل ياشقراء!!!!والا مافيه فرق كاسح عن غيره....لاكن رززززق..الله يوفقه.مش حانحسده

["غرك غلاك"]

أقول اللي مايعرف الصقر يشويه....رح لأحد المطاعم اللي عندك واطلب بروستد وسترى الفرق واضحا .
تجد زيوت بزيوت كله , وخدمة بشينة نفس , ومكان تحوم كبدك فيه .
أما البيك خدمة و تعامل راقي وسعر مناسب ومكان محترم وتكييف يجعلك بعد الوجبه تاخذ غفوة !!
اتمنى لو يفتح في بريدة ويدبل السعر عشر مرات آآآآه بس !!!

[الذاهـبـة]

بروستد ( بيت الدجاج ) يقرب له ..

بس هاك اليوم اتصفح بريدة ستي .. النسخة الحزينة من هذا منتدى المهوين ..

المهم لقيت صورة : صحن ورق عنب و فيه صرصور اصعيّر .. يقول هذا من بيت الدجاج ..

الصراحة اني صعقت .. لأني كنت أثق في ورق عنبهم اللي كله دبس رمان ..

[العصامي]

نعم أوافق بريداوي9 فالبيك مطعم يقدم وجبات رائعة بحق 00
بالإضافة للسعر المعقول والجودة 00 خدمة رائعه !!

[ن م ر 666]

فقط دعايه وسمعه هي الي جابت الناس للبيك لاأقل ولا أكثر

[مهب الريح]

الصراحه عندنا شباب بريده حاطين شرط خامس للعمره اذا خلصت رح للبيك هه


تبي الصراحه ليش الناس يروحون لمه لان له مذاق خاص وخاصة انه يعطش خخخ

محبك’,,

[صمت الخريف]

راعي الكار

ما شاء الله عليه البيك رااااااااائع بكل ما تعنيه الكلمة
وما ادري وش فيها بعض الردود قااايمة ع البيك
يعني بالعقل الشهرة العالمية والطعم الراااائع والتقديم والاداء النظيف والرااااقي

وبعد هذا كله يقولون "مع الخيل يا شقرا"
\يعني في احد ياكل شئ ما يحبه بس عشان الناس تقول عنه انه حلووو
<<لا زاااااالت متعجبة

راعي الكار بالعاااافية وبالبيييك تااااكل من دون عطش

الله يوفقه مطعم يستحق اكبر شهرة واحلى شئ انه مو اجنبي

[هامور على ددسن]

يا اخي عندكم في بريده مطعم إسمة

فيشون

اسمع الشباب دايم يتكلمون عنه ويروحون لبريده يتعشون ويجون شكله حسب ما اسمع شيء ولا وش رايكم نجربه.

[مــنــال]

البيك ، البيك

بيتنا يبعد عن مطعم البيك الذي بـ حي الستين كيلوو واحد فقط

حقيقة أنا مدمنة بيك و حراق كمان ، و أشوى و هذه من نعم الله علينا أننا ساكنين بأحد المناطق التي فيها فرع من فروع البيك

و بجد دايم أفكر في أهل نجد يوم يجون عندنا كيف يتحملون الصبر عنه ؟؟

زوجة خالي يوم راحت لأهلها في الرياض شالت لهم كم وجبة و تقول فيه ناس يحملونه بالطيارات !

حقيقة هو إدمان من نوع ا ّخر ..

و السر ياأخي في الطعم اللذيذ و في النظافة و في النكهة الخاصة الغير موجودة إلا في مطاعم البيك ..

اتذكر أن خالي انزل استفسار في صندوق الإقتراحات الذي في نفس المطعم و سألهم عن كيفية ذبحة لأنه سمع

أنه يذبح بطريقة غير اسلامية و هكذا ..

المهم في اليوم التالي ، هاتفه المدير الخاص بالمطاعم و دعى خالي لزيارتة حتى يريه كيفية الذبح ....

حينها علمت أن صاحب المطعم يهمه جدا ً سمعة المحل و هذا امر جيد يحسب له .

و السؤال ليس هنا ياأخي ..

السؤال : ماهو السر في عدم وجود مطاعم البيك في منطقة نجد و الجنوب ؟؟

و أنها مقتصرة على الغربية فقط !

دائما ً أتساءل في سر و سبب هذا الأمر !

[the-moon]

[align=center]والله البيك يستاهل شغل محترم وطعم ويشبع مهب نتيفة يستاهل

اقتباس:  المشاركة الأصلية كتبت بواسطة الذاهـبـة     هذي طبيعة الناس .. تحب تقلد بعض .. و تطير بالعجة .. البيك ممتاز ماعليه كلام .. و خدماته ممتازة بعد .. بس العالم تمشي ورا شي يسمى ( الخدعة ) .. شوف انت الحين وش تقول : (( متحمسين كلكم .. متى نتعشى من البيك متى نتعشى من البيك )) .. !! من حط فيكم هذا الحماس و الشوق للقاء الأفخاذ المقلية ؟ إلا الخدعة ؟! أنا مثلاً أقدّر وجبات فيدركرز .. و أقدر سلطات داجن .. و عملت لهم دعاية داخلية وسط العائلة .. و تظاهرت بالهوس مقابل طبق من هذا المطعم الحين كل أهلي يموتون عليه أكثر مني .. لاني خدعتهم .. هه ! أحد فهم شي يالربع ؟

أثري أنا مثلك هاك على اللي حولي بجبنة الناتشو حقت كودو
والعالم كله جت معي أثر السالفة كذا
[/align]