هذه قصة كفاحي فارجو من الجميع قراتها بتمعن .......

[ياخلـ(بريدة)فهم]

هذه قصة كفاحي فارجو من الجميع قراتها بتمعن .......

يالله بسم الله ....

لاحد ينقله لمنتدى ثمن يقول وصلني بالايميل

يالله علشانكم حقوق النسخ والطبع والسكنر محـــــــــــفـــــوظه لكن لغيركم اما انتم فانقلوا على كيفكم

احم احم احم احم احم

>>>>الحلقة الاولى<<<
أول ما وقعت على استلام الشيك أبو 990 ريال واللي ناطلين منه عشره اللي عطونيه الجامعة و أنا تسني بيل قيتس يومه يعرض نسخة ويندوز 2000 .. كنت طاير من الفرح .. وحول ما أصيح عند اللي يصرف الشيكات .. أول مرة يقولون اصرفوا للمدعو ياخل(بريده)فهم مبلغ و قدره .. كنت منول أسمع بالشيك و أحسبه اسم ثاني للكبتشينو .. لكن الحين خلاص .. صرت من أهل الشيكات ( اللي يسمعني يقول معطينه شيك من صندوق النقد الدولي ) .. حتى يوم طلعت للشارع و في مخباتي الشيك حسيت أن كل العالم يناظروني و لدرجة أني إذا مريت من جنب واحد ناديته و قلت له فيه شي يالشيخ

الوكاد أني دعست لبنك القاهرة و أنسدحت عند بابه من الساعة وحدة الظهر إلين ما فتحوا الساعة أربع .. و أول ما فتحوا البيبان جاني هاك البراد اللي جاني معه رهبة و روعة و بغيت أهون لا يتهموني بأني ناوي نية قشرا .. خاصة أني ما زد طبيت بنك في حياتي إلا بنك الدم حيث أني رايح لهم و معي كيسة دم من عقب طيحتي يوم يجرن سكوبي الله يهديه من فوق عبرية جارنا فجمعت الدم اللي ينزف من دمجتي عشان اعطيهم إياه و يعطوني فلوس لكن يوم قالوا لي أن المسالة إنسانية خذت الكيسة و نثرتها في الشارع ..

دخلت البنك و أنا قاعد أرزز شيكي عند كل أحد .. لا يحسبوني جاي انطل فلوسهم و اهج .. و أول ما دخلت قعدت أتلفت تسني الشياب عقب الصلاة إذا بغوا يشيكون على بزورهم هم صلوا و إلا لا .. عشان أدور احدن يصرف شيكي .. فما لقيت أحسن من السكيورتي أعطيه إياه فجدعت عليه الشيك و قلت له من طرف خشمي عطني قريشاتي ، عطني 990ريال ، ريال ينطح ريال .. خذ السكيورتي الشيك و قام يطالع فيه ثمن يطالع فيني بعد كذا قالي الظاهر انك تحسب نفسك في سوق الجرده .. رح الله يصلحك لذولاك اللي عند الشبابيك و هم يصرفون لك فلوسك .. قلت له على مين يا حبيبي ؟؟ تبيني أصرف شيكي من عند البوفيه .. قالي الله يرحم حالك تعال معي .. ذولاء هم الصرافين الله يصلحك .. ورحت معه و صرفوا لي فلوسي و يوم مسكت هاك الورقة الزرقا و الربع أوراق الحمر و أنا تسني واحد ماسك جمر .. يدي ترتجف و راسي يتصبصب عرق و رجليني ما تشيلني من زود رهبة الفلوس .. لدرجة أني ما طلعت من البنك إلا و اثنين سانديني ..

طلعت من البنك و ركبت سيارتي الجرباء موديل 91 الله يكرمكم و أول ما نصيت محل زينة سيارات عشان كان ودي أحقق حلمي الأسمى اللي كان يراودني من طلعت من بطن أمي وهو أني اركب أنتل في سيارتي و ألزق كلمة ممنوع التدخين على الطبلون .. ويوم سويت ذا الغرضين .. قلت أبنغنغ نفسي اليوم بمناسبة أول مبلغ فوق العشرة ريال يطب مخباتي .. فرحت لمحل شاورما و طلبت لي أثنين شاورما و واحد ببسي و قلت له ادحها بكل شي عندك أن بغيت حط فيها مناديل بس أهم شي تصير السندويشة كبيرة .. بعد كذا رحت للبقالة اللي بجنب بيتنا لأني كنت مواعد أهلي و أخواني الصغار أني أسوي لهم حفلة ما صار مثلها في السعودية بمناسبة أول شيك أستلمه في حياتي الكفاحية ( و الله من زين ذا الحياة ) .. فشريت لهم كرتون ريكو و رحت أوزعه على أخواني الصغار وهم منهبلين ما يصدقون اللي قاعدين يشوفونه .. فقعدوا يصارخون و يزاعقون و أنا واقف على المركا و اجدع عليهم من ذا الريكو و أقولهم يالله أنبسطوا .. اليوم يومكم .. و أمي تصيح و تقول الله لا يخلينا منك و أنا أمك ..

عاد أنا من زود البطرة رحت و شريت لأمي قرطاست حنا .. و لأبوي صروال سنة بدال ذا الصروال المحلي اللي عليه من حرب 67 .. بعد كذا رجعت للبيت و حبيت راس أمي و عطيتها الحنا و قامت تدعي لي دعا بصمت بالعشرة أني أبصير وزير خارجية من ورى ذا الدعا .. بس الظاهر انه من زود حماسها في الدعاء قامت تدعي علي .. ثمن عطيت أبوي صرواله الجديد و ناظر في وجهي لأنه يحسب أني أستهبل عليه و قالي بدال و أنا أبوك ما تفسفس فليساتك يمين و يسار جمعها يمكن تحتاجها بعدين .. عاد الله يهديه أبوي اللي يسمعه يقول أني فاك له بي ام دبليو بالتقسيط .. ما درى انه صروال سنة شارية من حضرمي بيرجع لديرته ..
بعد كذا أنسدحت على السرير و قعدت أتقلب بس ما جاني النوم من زود الوناسة .. فإنسدحت على ظهري و حطيت يديني ورى راسي وقلت .. آآآآآآآآآآآآآه .. وش مخبي لك بكرى ياخل(بريده)فهم؟؟ .. هقوتك بيخلونك العذال و الحساد في حالك و إلا بيتناططون عليك تسنهم جرابيع المستوي و كلن وده يزرف منك شوي .. أنتبه ياخلفهم لا تغيرك الفلوس .. ترى الفلوس تغير النفوس .. بس ولو لازم تقاطع عيال الحارة و إذا سلم الإمام التسليمة الثانية تصير في بيتكم لا يجون عيال الحارة ذا المقحطين و يقعدون يعطلونك عن البزنس و عد الفلوس .. بعد كذا رحت في هاك النومة اللي ما مثلها ..

و مشت الايام و السنين و كنت كل شهر استلم مكافئتي و أحطه في صندوق حديد لونه اخضر و مرسوم على علوه ورود يقالها للزينة و هي مشينة الصندوق .. ذا الصندوق عطتني إياه أمي و قالت لي ترى الحرامية مفتحين عيونهم علينا من دخلت الجامعة و صرت تاخذ شيكات .. قلت لأمي ترفقي يا يوه لا ينقلون المافيا نشاطاتهم من شيكاغو إلى بريده عشان ال990 اللي ياخذها ولدتس كل شهر ..

لكن يوم أندمج بنك القاهرة مع المتحد قلت يا ولد البنك الحين صار كبير و مضمون حط فلوسك فيه زي التجار و الحافظ الله .. ولو ما يجي من حطة الفلوس في البنك إلا هاك البطاقة اللي يعطونك إياها و تقدر تصرف قريشاتك في أي محل لوانك في البر تسان سدتك .. و افتك من الصندوق الأخضر اللي إذا فتحته قومت الحارة كلها من الصجة و القرقعة .. وفتحت لي هاك الحساب اللي وش زينه ( وش فيه زود تكفى ) .. و عطوني ذيك البطاقة اللي يوم شفتها بغيت أغطها في شاهي من زود التحضر ..

صحيح أني كنت عالة على البنك أنا و حسابي اللي أشيكه كل ما مريت من عند صراف مع أنه ما قد تعدى ال200 ريال في ظرف 24 ساعة .. لكني في النهاية أعتبر من عملاء البنك اللي لهم حسابات .. و بكذا كنت حاجر البنك لا يقدرون يصكون حسابي و أنا لي فيه فلوس و لا يقدرون يقولون ارفق على صرافات المسلمين ترى الكهرب و الحبر و الأوراق مهيب ببلاش .. و هذا اللي خلاهم يندمجون مع البنك السعودي الأمريكي عقب ما أرهقت ميزانيتهم أنا و حسابي اللي صرت أكتب ملخصات الجامعة على أوراق كشف الحساب من كثرها عندي ..

و أندمج الأمريكي مع المتحد و بصراحة كنت ارقب ذيك العملية ببالغ الحذر و الهوجسة .. إلين عجزت امسك نفسي و دخلت على الجمعية العمومية اللي تبي توقع أتفاق الإندماج و قلت لهم و أنا أزاعق .. تكفون علموني حسابي وش بيسوي الله عليه !! .. عاد هم خذوني على قد عقلي يوم أبلشتهم بذا الحساب و قالوا لي أي واحد عنده حساب في المتحد نبي و نوصل له فلوسه لبيته وزود عليها نبي نجيب له بريالين خبز بس أنت طس لبيتكم لا نخلي كل أعضاء مجلس الإدارة يتوطون في بطنك ..

ويوم أكتمل اندماج الأمريكي مع المتحد صرت أمارس هوايتي المحبوبة مع صرافات الأمريكي .. و من زود تعودي على الصرافات صارت البيبان حقتها تنفتح لي بدون ما أدخل البطاقة في الدخش حقها ..

لكني هاك اليوم ويوم نقلوا حساباتنا ( اللي يسمعني و أنا أقول حساباتنا يقول محدن ينافس الوليد إلا هو ) رسميا من المتحد إلى الأمريكي رحت أشيك حسابي على العادة و دخلت البطاقة و الرقم السري و قعدت أحثبر شوي بالأزرار .. ثمن طلبت كشف حساب .. و كشفت الحساب و طلع حسابي 80 مليون ريال .. خذت ورقة كشف الحساب و قالي هل تطلب عملية أخرى ؟؟ .. ضغطت على لا .. فكتب لي اجل طس و لا عد تعتب علينا ..

ركبت سيارتي الجرباء بكل هدوء .. و قززت و مشيت إلين وصلت الإشارة اللي في راس الشارع فوقفت عندها و قعدت أفكر .. مهوب تسن تو صار شي مهوب طبيعي ؟؟ .. يعني شي يفوق الخيال .. ولعت الإشارة اخضر و قاموا الناس يضربون لي بواري و أنا واقف محلي بكل سباهه و أطالع الناس وهي تمر من جنبي و تنسف يديها و تزاعق علي .. و أنا ساكن لا أتحرك .. رقيت ورقة كشف الحساب اللي كانت في يدي شوي شوي .. إلين وصلتها عند خشتي و قريت المبلغ اللي في حسابي و لقيته 8 و جنبها سبع أصفار .. طبعا انا قلت في نفسي وش الطاري صارت بنوكنا تقيم بالليرة التركية .. لكني لقيت جنب الثمانية مبلغ ريالا !! .. قلت شكله ريال يمني .. لكني لقيت جنب كلمة ريال سعودي !! .. جلست أقلب الموضوع في راسي و أنا عجزن عن استيعابه .. و قلت في نفسي مهيب مشكلة أن الددسن يخبط .. و لهيب مشكلة أن الكنبيوتر يعلق .. و لهيب مصيبة أن اللمبة تحترق لكن المصيبة أن صراف إلكتروني لبنك عالمي مثل الأمريكي يصير فيه ذا التخبيط اللي مهوب يم سنع .. أجل يخفون بالمسلمين و يخضخضون قلوبهم و يقولون أن حساباتهم 80 مليون و هي ثمانين ريال !! .. الله من زين البنك اللي هذا مزحه ..
فرحت لصراف ثاني جنب الإشارة و نزلت لمه و قلبي يقرقع و عرقي يتصبصب و وسائل الاتصال اللي فيني منقطعة مع العالم الخارجي .. فدخلت الصراف و تليت رجالن قاعد يصرف مع أذنه و طلعته برا الصراف و صكيت الباب وراي ثمن خذت نفس عميق و طلعت البطاقة و دخلت الرقم السري و قلبي حول ما ينط مع فمي .. فيوم كشفت الحساب و لقيته 80 مليون دخت و صرت عاجزن عن الوقفه فطحت على ركبي و بديت أرجف .. لكني استعدت قواي عقب ما حاولت أقنع نفسي أن الخطأ مجرد خطأ مطبعي .. فوقفت و طلبت منه انه يصرف لي الثمانين مليون لكنها طلعت ليه رسالة تقول لي " وين مسلفط يا ابو الشباب اكثر شي تقدر تسحبه في اليوم هو خمس تالاف جعلك تسحب مع أذانك " .. فحطيت مبلخ خمس تالاف و سحبها لي !!!

////////////////////////

[ياخلـ(بريدة)فهم]

>>>>>>>>الحلقه الثانيه<<<<<<<<


خذت الخمس تلاف و طلعت و أنا مسبه و لا أناظر إلا الفلوس اللي في يدي فلقيت لي هاك الهندي اللي مر مع قدامي صدفة و أنا طالع مع الصراف فتليته مع عتراه و سطرته بكف .. ويوم جا يسطرني و اطلع له ورقة من أمهات خمسمية و أعطيها إياه .. ثمن نصيت حرمة قاعده في السيارة و تحتري رجلها عند البقالة ففتحت عليها الباب و شلت عباتها و قعدت أمعط شوشتها و اقول ليييييش ؟؟ ليش كل هذا ؟؟؟ من زيني أنا و خشتي ؟؟ و الحرمة قاعده تصارخ .. فجا رجلها و قالي خير ان شا الله .. ففقيت له كشرتي و مديت له باقي الفلوس اللي في يدي .. لكني ما وعيت بنفسي إلا و أنا طايحن في المواقف و جنوبي متكسرة و فلوسي مجدوعتن جنبي !! ..

قمت و نفضت ثوبي و خذت الفلوس و رحت لدكان ملابس رجالية و شريت لي هاك اليوم شين ما شريته طول عمري .. شريت صروال الدفة بعد ما كنت طول عمري من أبرز زبائن صراويل أبو بطة و شريت لي فنيلة السمة الأبرز فيها أنها مهيب مشقوقة مع الأباط و كان هذا اليوم هو أول يوم أعرف فيه أن الفنايل لونها نيلي مهوب أصفر فاقع .. و شريت لي بعد ثوب الشياكة اللي كنت طول عمري أحلم فيه و شماغ مثل شمغ العالم مهوب تسنها شمغي أنا و أخواني اللي إذا شفتها مع ورى حسبتها شوشة سوداني من كثر الخيوط اللي طالعه منها .. و بعد كذا حاسبت الهندي و عطيته بخشيش نص ريال و كان ذاك البخشيش فتح جديد في عائلتنا حيث أني أول واحد في العائلة المصون يبخشش .. ثمن رحت لحلاق في الصفراء ورا بيت واحد الله يذكره بالخير ودخلت عليه و قالي وش تبي قصة قلت تخفيف مدرسة ( منيب أعرف إلا هي ) بعدين رحت لبيتن و دخلت على أمي !!


دخلت عليها و أنهبلت يوم شافتني و قالت وهي حول ما تصيح حرام تفسفس الفلوس اللي جمعتها في غمضت عين .. انا بصراحة بغيت أسطرها من زود الفسقة لكني تذكرت أنها أمي ولو أني مليونير .. بعدين طلع علي أبوي يوم سمع صراخ أمي ويوم شافني وهو اللي يسطرني .. كذا لله و في لله .. هذا لون أبوي إذا تفاجأ من شي اقرب ماله خدي .. الوكاد انهم استفسروا عن حالي و علمتهم السالفة كلها .. وهم اللي ينهبلون و يقولون لي رجع الفلوس تراها حرام عليك .. عاد أنا حجتي مزهبها من دريت أن حسابي 80 مليون وهي أن فلوس البنك حرام ولا فيها شي إذا خذتها .. لكنهم قالوا لي أن مارجعت الفلوس فترى محنب أهلك و لا أنتب ولدنا .. عاد أنا من زود الفسقة هاك الوقت قلت لهم لا ياشيخين و عسى بس منتب حارميني من الميراث بعد ؟!! .. ما وعيت بنفسي إلا و ابوي شاقلني برا البيت و قاعدن يرجفني و يدقدق بي إلين طلعني برا البيت عاد و الله أن أبوي حريف ماخلاني أطيح فالأرض أبد .. ثمن قالي وهو يصك الباب أنس أن عندك أهل !!

قمت من الأرض و نفضت ثوبي .. و ركبت سيارتي الجرباء و قشعت منها لزقة ممنوع التدخين و حطيتها في جيبي ثمن قفلتها و نطلت المفتاح على البيت و عقبها خذت ليموزين و على المعارض فكيت لي بي ام دبليوا و عقبها على مكتب عقار شريت منه بيت مساحته ثلاث تالاف و فيه مسبح و ملعب قدم و ملعب تنس أرضي ( مع أني قايل لهم أبي ملعب بلياردو ) و صالة إذا دخلتها حسبت أنهم صابغين الجدران بفيري من زود لمعة الرخام .. و عقبها جبت لي طباخ و سواق و حارس و عامل نضافة و سكرتير لبناني يعلمني السنع و الإتيكيت ..

و عشت أيام ما عاشها هارون الرشيد .. كنت أقوم الساعة 12 .. و إلاهم مزهبين لي الحمام و الصوابين و الشامبو فـأتروش بهن ثمن أشلحهن ( عرق القراوة فيني ) بعد كذا أروح لصالة اللياقة الموجودة في قبو بيتي فانبطح في حدى ذا الأجهزة و أقول لحدى ذا العمال حركها عني .. بعد كذا اخذ لي دش و البس الروب و حدره وزرة من زود التطور و اطلع و ألقاهم مزهبين لي فطور كونتيلنتل و صحن كبدة .. فالهط صحن الكبدة و أخلي فطور الكونتلينتل .. بس أنا أقولهم يزهبونه مع صحن الكبدة يعنني متطور و إلا نفسي ما تقبله إذا كلته .. بعد كذا أقعد أناظر تلفزيونن عندي أول ما شفته في بيتي حسبته دريشة تطل على الجيران من كبره .. بعد كذا أقول للسواق يزهب السيارة عشان اطلع .. و إذا طلع بي و وصلنا لراس العاير نطلت السواق برا السيارة و قعدت أسوق أنا .. و الله ما بقي إلا هي أحلم طول عمري أني أسوق كامري فما بالك بي ام دبليو ويوم تحقق ذا الحلم يحرمني منه الهندي اللي يشتغل عندي معصي و الله !! .. و بعد ما أخذ لي لفة في الصفراء أقعد لي على حدى ذا الكفيشوبات و اطلب لي شاهي .. و إذا خربتها ذاك اليوم و بغيت أسوي فيها متطور عند الناس حطيت نعناع مع الشاهي .. لأني ماش من النوع اللي إذا شرب كبتشينو و إلا تسني شارب دوا .. ألحقه بغضارة موية عشان يروح طعمه عن حلقي .. بعد كذا أرجع للبيت و اقعد شوي أسبح و أخذ لي دروس في الإيتيكيت من سكرتيري اللبناني .. عاد و الله انه مسيكين ذا اللبناني أجل له شهرين بيعلمني وشلون أمسك الشوكة و ماخلا طريقة ما حاول يفهمني فيها وشلون أمسك الشوكة .. بروجكتر وشرح عليه تطبيق عملي و سواه .. مذكرات و جاب لي .. أخر شي مل مني و قال مهوب لازم تاكل بشوكة و سكينة .. كل بسكينة و يدك و الشكوى لله !!

و كذا استمرت حياتي حول الستة أشهر منغنغ عمري و مدلعها و ما خليت شي يقصرها .. و كنت هاك الليلة قاعدن على مسبح بيتي أعسل و أتقهوى و صاف العمال قدامي و قاعد أهزئهم و أذب عليهم و السكرتير يضحك .. المشكلة الوحيدة اللي كانت محيرتي هي وشلون يقوى سكرتيري يضحك على مصالاتي هاك الوقت .. أجل يقالي أهزئ الطباخ و أقوله أن شنبك تسنه شنب قطوة و يتلوى السكرتير من الضحك .. و ياليت فيه وجه شبه .. يعني مهنا أدنى وجه شبه .. لكن يالله القريشات تسوي أكثر .. و كذا أستمرت هاك الليلة أنا أذب و العمال يضحكون .. صحيح أنهم بعض الأحيان يضحكون قبل لا أخلص ذبتي بس ما يخالف .. الوكاد و أنا صاف العمال قدامي كان السواق صاف معهم وهو فاحج رجوله و طالع طرف صرواله السنة فيوم شفت صرواله المحلي تذكرت أبوي .. فتضايقت و انقبضت نفسيتي فقلت للعمال ينقلعون ودي أقعد لحالي أتأمل .. فذلفوا و قعدت اتذكر أهلي فعزمت أني أزورهم من بكرا ..................


و يوم جا من بكرا طقيت لي هاك الثوب و البشت و الكنادر و الشماغ الجديد و ريحتي تعايط طيب .. اللي يشمني يحسبني أشتغل عند عبدالصمد قرشي .. ثمن رحت لبيت اهلي بالحوت((البي ام دبليو )) حقتي ..

و يوم دخلت الحارة تعنقدوا عيال الحارة في السيارة و قعدوا ينادون هذا الشيخ أبوبس .. ابوبس عطنا وجه ياخي .. أييييييه يحق لك من عقب ا لجرباء بي ام دبليو .. كلمنا ياخي .. ترى و الله الفلوس وصخ الدنيا .. يوم سمعت حتسيهم ذا قلت أيه هين و الله ما وصخ الدنيا إلا أنتم .. فطلعت من يوكي ميت ريال و نطلتها مع الدريشه وهو اللي يتركوني و يتراكضون لمها ..



و وصلت عند بيتنا و طقيت الباب و قالي أخوي الصغير ميييييييــييين فقلت له بصوت رخيم آآآآ الوالد موجود ؟؟ .. فتح أخوي الباب شوي شوي .. يوم شافني و إلا تسنه شايفن صلاح الدين الأيوبي .. نط علي و قعد يحببني و يقولي أخوي أبوبس وينك كل ذا الأيام .. قعدت أبعده عني و أقوله بس بس خذ ذا الحلاو لك .. يوم شاف الحلاو قال وشو ذا يا أخوي جايبن لي مرتبت سيكل .. قلت له أقول ياشينكم يالقراوة هذا حلاو سويسري الله يفشلك .. و خذ بعد ذا الألف ريال لك .. و يوم عطيته الألف و إلا تسنه واحد ماسك سلك عاري .. واقف و مبزر عيونه و لا يتحرك .. فدخلت البيت و أنا معنفصن بخشتي ثمن دخلت جوا و لقيت الوالده قاعده في الصالة و ترضع بزر ..

فيوم شافتني وهي اللي تبزر فيني .. ثمن صدت عني و قالت لي وهي صادة وش جابك لبيتنا ؟؟ وش تبي ؟؟ .. رحت و حبيت راسها .. فأبعدت راسها عني و قالت لا تحب راسي جعلك تحب أبط شارون .. مشيتها لأمي و رحت أقعد قبالها .. ثمن طلعت من مخباتي سيجاري الكوبي و حطيته في فمي و ولعته و قلت لأمي الله يهديتس يا ماما وش أنتي حاطتن في راستس يوم هذي ريحته ، شكلتس متروشه بصمغ فيران هههههههه .. قالت أمي أقول طف ذا التتن الكبير اللي في أثمك و أترك عنك الملح و اطلع برا بيتي قبل لا اناديلك الشرطة .. قلت لها و أنا أقطف على الفرشة : هههههه .. يعني مازالت روح الدعابة فيكي يا ماما .. إلا ما قلتي لي منهو ذا البيبي اللي معتس .. قالت لي : ذا ولدي الجديد اللي عوضني به الله .. قلت : حشا ذا سند قبض مهوب ولد .. وش يعوضتس فيه الله !! .. طيب متى استلمتوه هههههههههه .. ما أمداني أخلص ضحكتي إلا و رضاعة البزر في جبهتي و أمي قاعدة تصارخ و تقول أطلع برا بيتي !! .. قلت لها و أنا أنفخ الدخان : طيب .. طيب لا تصوقين يا ماما .. ابطلع الحين .. أصلا من زين ذا البيت عشان أقعد فيه .. أنا بس جايكم أقول تبون شي .. قاصركم شي .. إذا بغيتوا أي شي لا يردكم إلا السنتكم .. ققالت لي و هي تتغر البزر : الله يغنينا عنك و عن المال الحرام .. قلت لها : لا صدق شكلتس يا ماما تبين شامبو بس مستحية .. خلاص أنا أقول للسواق يجيب لتس بكرا كرتون شامبو .. قالت لي : الحمد لله هذي أخر تربيتي فيك جاي تطنز على أمك .. يالله برا بيتي و إلا و الله لا أخلي اللي في أخر الحارة يسمع زعاقي .. أععععععععععععع ( هذي تغرة البزر اللي في يدها ) قلت لها و أنا أأشر على البزر : معد ورى تغرت ولدتس .. سمعوها اللي في الحارة اللي جنبنا هههههههههه .. قالت لي : أقول لا تضيع السالفة و أطلع برا بيتي .. قلت لها : على طاري تغرت ولتس شكلتس مرضعته هوا .. ضعيف معد بقا شي في بطنه عقب ذا التغرة .. بكرا ان شا الله أخلي السواق يشتري له طرمبة هوا حقت البنشرية أريح لتس من تعبية بطنه بذا الرضاعة .. قالت لي أمي : أقول اطلع برا بيتي جعلك المطلع .. قلت لها : خلاص .. خلاص .. هولدن .. أبطلع الحين بس وش سميتوا ذا البزر .. أتوقع سميتوه رامي و إلا حسام خخخخخخ .. أوما حسام يا ماما ركزي لي عليها أوما أبوي بيسمي ولده حسام !! .. كان رد أمي علي على هيئة صراخ يروع فقمت انا بسرعة و فتحت الباب عشان أطلع و قلت لأمي و أنا طالع تصدقين يا يوه صوتس يذكرني بمكينة الكبتشينو اللي في بيتي خخخخخ .. يالله بس في مان الله و إذا بغيتي تتغرين و لدتس مرة ثانية تغريه تحت دوشق و إلا بطانية لا يفضحنا بتغرته عند الحارة ..

[ياخلـ(بريدة)فهم]

>>>>>الحلقه الثالثه<<<<<<


ويوم جيت أطلع و إلا هذا أبوي في وجهي و عيونه محمرة و ماسك عقاله بيده .. جيت أسلم عليه لكنه ما عطاني وجه .. و قالي وش جابك لبيتي يالخسيس .. قلت له جاي أشوف اخوي الجديد أو بالأحرى جاي أسمع تغرته اللهم لا شماته .. قالي أقول أطلع برا بيتي و هذا مهوب أخوك أنس أن لك أخوان أو أهل .. وهاه هاك ذا الكاكاو و الألف ريال اللي عطيتها أخوك خذها و لاعد تعتب علينا .. قلت له لا تكفا ودي أعتب عليكم .. إلا وش أخبار صراويل السنة حقتك إلى هالحين وهي تسنها صخور رسوبية مشققة مع كل محل ؟؟ .. كان رد ابوي علي على هيئة جلد بالعقال اللي معه فما كان مني إلا أن حطيت رجلي و قعدت أركض و بشتي يتطاير وراي .. ثمن طلعت في الشارع و أنا أراكض و حافي و عيال الحارة قاعدين يناظرونا فقلت لهم و أنا أركب سيارتي ياحليله أبوو أنا في الطريق قعدت أحضرم و أقول الشرهه و الله مهيب على ذا الأهل الملحطين .. لاا الشرهه علي أنا اللي رايحن لمهم .. هذا وجهي أن عتبت عليهم مرتن أخرى .. لا ومن زين العلوم أبوي قاعدن يلاحقني بالعقال عند عيال الحارة .. وش بيقولون التجار و المضاربين بالأسهم عني و أنا كبيرهم .. كبيرنا قعد أبوه يجلده بالعقال عند عيال الحارة .. بالله قد شفت مليونير يلاحقه أبوه بالعقال .. قد شفت الامير طلال قاعدن يلاحق0 ولده الوليد في حارتهم و يجلده بالعقال !! .. و إلا صالح كامل يلاحق ولده عبدالله و ينطحه ( بلشت بعمري أخبر صالح كامل مهوب يلبس عقال ) !! ..

و يوم وصلت بيتي نزلت و دخلت البيت و ما أمداني أدخل إلا و بيتي فيه عشرت عساكر .. قلت لهم شكلكم عرابجة مستأجرهم أبوي عشان يطقوني .. قالوا لي أقول تعال معنا .. قلت لهم وش السالفة وش تبون ؟؟ البلد ما فيها نظام .. ما فيها قانون .. على طول كذا طبيتوا بيتي و قلتوا لي تعال معنا !! .. قالوا لي : عشان البلد فيها نظام تبي تجي معنا .. قلت لهم : شكلكم ما تعرفون من أنا .. أنا الشيخ أبوبس .. أكبر مالك اسهم في شركة مواشي مكيرش .. قالوا لي : شيخ !! .. شيخ طل .. إلا حرامي و نصاب صارقن فلوس البنك و قاعدن تمتع بها .. لا و من زين العلوم يقاله يضارب بالأسهم و ثلاث ترباع فلوسه ما راحت إلا من خسايره فالأسهم !! ..

و هم اللي ياخذوني معهم و يسجنوني و حكموا علي خمس طعشر سنة سجن عقب ما

نهبت 80 مليون من البنك و لا رجع لهم إلا مليون من مضارباتي الناجحة

بالأسهم .. و الله أني داري حدي مضاربات في الحواري ..


و من ذاك اليوم و أنا أعيش حياة مأساوية .. حياة السجون .. و كنت كل يوم



قبل لا أنام اطلع لصقة ممنوع التدخين اللي كنت ملزقها في الجرباء حقتي و

اقعد أناظرها و عيوني تدمع و أقول ياشين اللي يلبس ثوب مهوب ثوبه !! ..








////////////////////////////////


ارجو ان تنال القصه على رضاكم .............

[القعقاع]

الله يقطع سواليفك




اما الريكو مسكت وقديم


(و قززت و مشيت إلين وصلت الإشارة اللي في راس الشارع فوقفت عندها و قعدت أفكر .. مهوب تسن تو صار شي مهوب طبيعي ؟؟ .. يعني شي يفوق الخيال )

اما هذي ضحطتني ساعه




والله انها قصه مسنتره


ومنسمه

[*** شمس الذهب ***]

بصراحة يا خلفهم انت فتى مكافح .


ياخي كل العالم ضدك بس انت يا خلفهممممممممممم.

وشكل شعارك (( يا دنيا اشتدي تراني اقبلت التحدي )) ..صح


وانا معجب فيك وانت بكل صراحة تملك قلم الماسي صح انه رصاص بس قيمتة قيمة الماس و يا قوت يا خلفهم انت.



........................... صديقك سكوبي

[ياخلـ(بريدة)فهم]

بسم الله الرحمن الرحيم


السلام عليكم ورحمة الله وبركاته:


الله يرجك ياسكوبي قل امين ........


انت متى رايح تخلي الحركات ............

وبعدين انت من وين جايب الكلام الي مهنا مثله
........


الله يسلمك حبيبي ونور عيني انت .........


مممووواااححححححح