ايش رايكم بهاذي الفكره

[حجازيه وافتخر...]

اول شي السلام عليكم

بصراحه لاحظت ان هذا القسم مافيه حركه صحيح هو للاطباق والمطبخ بس مااحس فيه حياة يعني كل وحده او واحد يحط اطبخه ويمشي والردود جدا قليله

فايش رايكم نبدا والعرض للجميع يعني لكل المتواجدين في المنتدى اللي عنده اكله طيبه يجيب لنا طريقتها واللي نفسه بااكله مثلا يسال عنها واللي يبي يسال عن بهار او نوع من الاكل يسال بصراحه انا يحز في نفسي هذا القسم وودي بااهتمام اكبر من كذا ايش رايكم ؟؟

[حجازيه وافتخر...]

مافي اي تعليق ...؟؟

[ثامر الناصر]

شكرا لك ..

فكرة رائعة يابعدي .. ولكن بما انك حجازية يالله عطينا اكلات مشهورة بالحجاز ونعطيك اكلات قصيمية ..

مثلآ المعصوب .. ماادري وشلون تاكلونه وخاصة حقين الطائف .. انا احس انه ثقيل قووة .. وش رايك >>> رأيي

ودمتم

[جورينا]

حجاااااازية

ياقلبي انتي وربي انك صااااادقة

فكرة حلووة منك

صادق اخوي سلطانكووووو

عطينا من طبخاتكم واذا تعرفين طريقة طبخه مشهورة عند اهل الباحه بما انه قريبه من منطقتكم ياليت تجيبينه لي

اذا ماعليك امر اسمه (( الدغابيس ))

لك مني اعذب تحيه

[ثامر الناصر]

اقتباس: اذا ماعليك امر اسمه (( الدغابيس ))

ذبحتني الشرافة الصراحة .. ودي ادري وش قصتها يار ب ماتتأخر حجازية

ودمتم

[حجازيه وافتخر...]

بالراحه بالراحه .. انا اول شي من المدينه وش يوديني للطائف
وبالنسبه للدغابيس والله اول مره اسمعها ..؟؟ وبعدين الله يهديك ايش جاب لجاب اهل الباحه اكلاتهم جنوبيه مالها اية علاقه بالحجاز .

والمعصوب ياستاذ سلطانكو اكله يمنيه وبرضو مالها اية علاقه باكل الحجاز

شفتو كيف استفدتو من اقتراااااحي

بس والله ماافشلك انا اسويها في البيت لانه في البيت الذ واطعم وانظف اذا تبي الطريقه ابشر ..
بالنسبه لنا اهل الحجاز والله اكلاتنا كثيره ومااقدر اقول هذه اهم من تلك بس والله وبكل فخر كلها لذيذه ويبغالها شغل ومنها

البف
المنتو .اليغمش
الزلابيا .
الجبنيه
البريك
الشيش بريك
الكنافه
الكاسترد
الماسيه .
المشبك
السلات .المعرق
واليدامات انواع واشكال كثيره
يعني هذه اللي تحضرني الان واللي باله شي معين يسأل وان اعرفها ماراح اقصر فيها
وانا ابغى طريقة المصابيب على اصولها من القصيميات .وايش الفرق بينها وبين المراصيع

[العبرى]

[align=center]إن شاء الله أعضاء المنتدى مايقصرون

ونتمنى تواجدهم الدائم وعطائهم

وأن يزودونا بخبرة مطبخيه أو وصفه جديده

والكثير هنا لا يقصر ومنهم أنتي حجازيه وافتخر...

ولمن سأل عن الوصفات الحجازيه

هنا بعض مما قدمت لنا حجازيه وافتخر...

وثقوا بأن الوصفات الحجازيه لذيذه

http://www.buraydh.com/forum/showthread.php?t=105098


http://www.buraydh.com/forum/showthread.php?t=104978

وبإنتظار المزيد منها

اقتباس: وانا ابغى طريقة المصابيب على اصولها من القصيميات .وايش الفرق بينها وبين المراصيع

للأسف ماأعرف الفرق!

إن شاء الله غيري يفيدك




تحيتي,,,[/align]

[البراق999]

تسلميلي ياحجازيه وافتخر على الفكر الرائعه وومشكوره

سجليني واحد متفق معك بالفكره .. لانه فعلا فيه تقصير

يالله الله يكون بعونك وتلبيه الطلبات

[حجازيه وافتخر...]

شفتو مافي اي تفاعل ياناس تحركو انا ترا ماتعجبني هالبراده ابغى حركه ونشاط تجاوبو معاي ردو واسالو مايصير كذا

[النادرة123]

انا والله نفسى بطريقة سلطات اذا عندك اختى سلطات جديدة لانى اموت باالسلطات النادرة

مشكورة اختى والله ماقصرتى ولاتزعلين علينا والله اننا نحبك فى الله مااضن اننا نستغنى عنك خاصة فى الطبخات الله الله عليك باالوجبات الخفيفة يعنى مثل عشاء خفيف انتضرمنك اكلاتك الحلوة اختك محبتك النادرة

[حجازيه وافتخر...]

شوفي ياست الكل والله مادامك عبرتيني وسمعتي صياحي ابشري اما السلطات انا ام السلطات احبها واحب ابتكر فيها بعد

يالله هاذي السلطه الاولى ..

سلطه بالفواكهه

بقدونس
خيار
طماطم
جزر مبشور . بصل اخضر .فلفل رومي الاخضر .الاحمر .والاصفر
شبث .خس امريكي .ذره. واذا تحبين الافكادو مايمنع

فراوله .اناناس .كيوي .تفاح

الطريقه :

شوفي ولا يبغالها اي تعب قطعي كل المقادير وخلي كل شي لوحده ماعدا الخس قطعيه بيدك لانه اسهل ويعطي شكل احلى

وبعدين جيبي الصحن اللي بتقدمين فيه اول شي ضعي الافكادو وصبي عليه قليل من الصوص وبعدين ابداي بتوزيع المقادير من هنا شوي ومن هنا شوي ولا تنسين بعد كل طبقه صبي من الصوص حتى تنتهي وموشرط تحطين الكميات كلها لا وانتي تقطعين ضعي اللي يكفيك
بس الافكادو خليه في البدايه ولاتكثرين منه لان بعض الناس ماتحبه كثير
اذا ماعندك هذا الصوص

ضعي في كاس ليمون وثوم وملح وزعتر وخل واستخدمي نفس الطريقه .

سلطة البنجر والبصل

بصل مقطع شرائح ويقضل البصل الاحمر
بنجر مقطع ومسلوق

الطريقه :

بعد ماتسلقين البنجر ضعيه في اناء وملحيه وضعي عليه قليل من الثوم والخل
اما البصل قطعيه وضعيه في اناء وملحيه
هذه الطريقه تحفظه لك حتى وقت التقديم واذا انك مستعجله على طول ضعيها مع بعض وتبليها اهم شي للبنجر ماينحط بدري

سلطة السيزر

خس
خبز محمص مقطع مكعبات
مايونيز
لبن زبادي .ملح .ثوم

الطريقه .
تخلط المايونيز واللبن الزبادي والملح والثوم ويترك جانبا

يقطع الخس باليد تقطيع عشوائي
يوضع عليه الخبز

وقت التقديم يصب عليه المخلوط وبالهناء والعافيه

وبالنسبه للعشاء والله عندي اشياء كثيره انتي بس حددي يعني تبغين مثلا ساندوتشات ولا اشياء يبغالها طبخ

امري بس والله انا تحت امرك وامر اي وحده في المنتدى وشكرا

[حجازيه وافتخر...]

بالنسبه للصوص ترا اقصد الصوص اللي يخص السلطات وتلاقينه في السوبر ماركت واحسن شي الصوص الايطالي

[متغربه]

حجازيه موضوع راااااااائع

بسالك اختي عن ايداماتكم مررررررة خيااااااااااال

بسالك عن طريقه الباميا

وايييييييه صح الكنافه الله تجنن ابغى طريقتك

[حجازيه وافتخر...]

ابشري يالغاليه بانسبه للباميه

اول شي اذا جيتي تشترينها لاتاخذين غير الصغير منها لانه هي الاطعم والاصلح واذا جاتك مكيسه خالصه نقيها وطلعي الكبير منها

القادير

باميه

دجاج او لحم بس في اللحم تجي الذ

عصير طماطم .معجون طماطم
بصل مقطع .ملعقة ثوم مدقوق
حبة طماطم مقطعه صغير
ملح .فلفل اسود.بهار مطحونذرة زعفران
ثوم مدقوق وبقدونس للكشنه الاخيره

الطريقه :

يحمس البصل جيدا ثم يوضع الدجاج او اللحم ثم معجون الطماطم ثم الطماطم المقطعه والزعفران ثم عصير الطماطم ثم الماء

الدجاج ماياخذ وقت وعشان مايستوي مره بعد ربع ساعه ضعي الباميه واما اللحم مافي مشكله الي نصف ساعة او حتى تشوفينه استوى

عاد انتي لاحظيها لاتستوي مره وتنهري يعني بعد نصف ساعه طلعي وحده وذوقيها اذا انقسمت معك بسرعه فهذا دليل انها استوت قبل تطفين النار عليها احمسي لثوم مع البقدونس وضعي معاه ذرة هيل مطحون ثم اسكبيها على الباميه بعد ماتصفينها من الزيت عشان مايطلع اليدام زفر ته زايده وضعي ذرة سكر هاذي عاده والله تعودنا عليها وممكن لها دور في طعم الباميه جربيها وانشاءالله تعجبك

[راشد الصليحان]

ياسلااااااام عليكم

إيه كذا علمونا أكلاااات جديدة

متابعين

شكرا أختنا حجازية على هذا الموضوع