ثلاث ليالي يا ناس بدون نوم أدور في البيت كأني بنقالي بتنتهي إقامته بعد أسبوع وبلش يدور كفيل , غسلت سيارتي الساعة 2 الصبح ولحقت قطو في ارتداد البيت ومن القهر سبقته شبيت ضو في الملحق وقعدت اتدفى ودرجة الحرارة في الظل فوق 45 وكل ما غمضت وفتحت زول هالاسهم بين عيوني وفي الختام رحت وجبت حبوب بندول نايت وكلتها وغفيت ساعة شفت فيها حلم فزيت منه كأني مقروص وصار شغلي الشاغل 30سهم وحلم .
في الليلة الثالثة شفت برنامج فيه شيخ مصري يفسر الأحلام وكما خلوج رد الله ضناها دقيت الرقم بجوالي لكن سبحان الله المقرود مقرود رد علي الحبيب يقول نظرا لعدم تسديدك الفاتورة... ( وتعرفون الباقي ... ما عدا التجار منكم ) وكما يقال الغرقان يتعلق بقشة أخذت جوال شغالة الوالدة بعد أن وعدتها ببطاقة شحن أم 50 وكلمت .
رد علي صوت حرمة ورحبت وهلت وقالت خلك معنا على الخط قمت انسدحت وأخذت اعد مربعات الديكور في السقف بعد شوي ردت وحده ثانيه وقالت أهلا وسهلا معنا لؤي ثامر من السعودية ( هذا اسمي الفني ) تفضل يا لؤي قلت آهلين وسهلين يابرني هالبرنامج يا أفندم وش لونس وشلون أهلس الحقيقة أنا من اشد المعجبين ببرنامجس الهادف ونشكرس عليه ممكن يا مزموزييل اكلم الباش مهندس الشيخ بيه قالت ايوه اتفطل سلمت على الرجال وقصيت عليه الحلم وعشان تكونون معي بالصورة أقول لكم الحلم ( أنا امشي في شارع طويل مسفلت بس الزفت لونه اصفر والخطوط سود وعلى الرصيف بطول الشارع لوحات مكتوب عليها ممنوع الوقوف وفجأة لقيت قدامي باكستاني معه رولة دهان وبجواره سيارة مازدا 82 حمراء اللون مررت بجواره فقال تشري السيارة قلت لا قال اشترها باللي فيها قلت وش فيها قام وفتح الشنطة وأثرها مليانة أوراق كل وحده مرسوم عليها سهم احمر وسهم اخضر قلت بكم تبيع قال بسته وعشرين ريال الكيلو قلت شريت وعطيته القروش ما أمداني اسكر شنطة السيارة ولا هاك الشرطي قدامي قال أنت ما تعرف تقرءا قلت لا ليش قال السيارة واقفة في مكان ممنوع ولازم تسحب للحجز ما أمداني افتح أثمي إلا والسيارة والشرطي مختفين والشارع صاير سكة قطار وفيه لوحات مكتوب عليها ممنوع المشي وفيه قطار لونه احمر جاي مسرع باتجاهي وبعده قمت متروع ) الشاهد خذ الشيخ يفكر ويفكر ثم قال أنت من السعودية صح الحقيقة ما أخفيكم أني انبهرت وشلون عرف قلت صح قال واعتقد انك راقل مش ست قلت له سبحان الله كأنك تشوفني صحيح صحيح ابتسم بثقة وقال أنت لما بتعطش تشرب ميه صراحة في مثل هالمواقف أنا ما املك نفسي دمعت عيني وقلت نعم صحيح كبرت ابتسامته وهز رأسه وقال يا ابني سيب رقمك مع الكنترول وإحنا حنتصل بيك بعدين , ما أمداني أقول شي إلا وسكروا السماعة .
كرهت كل شي لونه احمر الطماطم التفاح الفراولة إشارة المرور جلال صلاة أمي أكياس مكتبة جرير الكتشب حتى الجح صرت اشرط إنها تصير بيضاء , وش قصة هالمؤشر مدحدر كنه تريله محملة أكياس سمنت مدحدرة مع طريق كرا مفضاة وبدون فرامل , ما فيه احد يتدخل من أهل السوق وأسهمي صارت كأنها إلي تدلهم على الطريق تسبقهم إلى الأسفل , سمعت من مصدر موثوق أن رئيس الهيئة سيتحدث في برنامج عن السوق واوضاعة وارتز عند التلفزيون وأنا أقول جاء الفرج إن شاء الله وفي الربع الأول من المقابلة نمت.
سمعت إن الإشاعات هي إلي ترفع الأسهم وتنزلها رحت اجلس مع كل واحد في الصالة وخارجها وأقول له إن فيه اندماج سيتم ما بين شركة المواشي وسابك وبنك الراجحي وانه الآن عند مجلس الشورى وموافقين عليه ويمكن أن يصدر قراره الأسبوع القادم لكن من دون فائدة ظل السهم مطنش حينها أصبحت مقيم في الصالة أول من يدخل أنا وأخر من يطلع أنا لكن بدون فايده الدعوى ما تسر , وفي اليوم الرابع اجتاحت الصالة رائحة عطر يشق الخشوم ( تعبير شعبي عن نفاذية الرائحة ) ثم دخل الصالة واحد كأنه غرنوق لابس ابيض في ابيض حتى النعال ومعه واحد ماسك بشته وشنطته , قفز اثنان ممن كانوا بجواري نحوه فقبلوا انفه وأجلسوه ولحسن الحظ جاء مجلسهم بجواري , اخذ يقول لهم انه أول مره يدخل الصالة شخصيا ولولا موعده معهم ما جاء فكل معاملاته تتم عبر النت أو مكتبة الخاص ثم تحول الحديث إلى همس لا يكاد يسمع رغم محاولاتي المستميتة لكن دون جدوى عندها رئيت مرافقه فقمت وجلست بجواره وكان شاب في مقتبل العمر ابيض السحنة تشربت خدوده بالحمرة بينما انساب شارب أشقر تحت انفه يرتدي ثياب تخطف بصرك من شدة بياضها وقلم يبرق بريق الذهب يضع رجل على أخرى فقلت له صبحه بالخير فقال بلهجة شامية مرشوش عليها شوي سعودي الله مير يصبحك بالخير وهنا كان لابد من أن استعمل ذكائي الفطري في التعامل مع الموقف فقلت ياخوي أنا كأني شايفك في الجرده تشري جراد من سوق الفقع أو مهوب أنت فقال لا والله ما اعتقدشي فقلت إيه يخلق من الشبه سبعطعش ونص فضحك وقال الله يقطع سولافتك من النص ودار الحديث وتشعب ومنه علمت أن معزبه يحرك السوق بطرف إصبعه الخنصر وانه يدير أموال لو أبعدها بس لازم أعيش 350 سنه وفي وسط الحديث نادى الغرنوق يا ربيع فقفز المرافق نحوه وعدت أنا إلى مكاني بينما اخذوا يوقعون أوراق ويختمون أخرى وعندها رن جوال الغرنوق فنظر للرقم ثم فز مرتعبا وسار إلى خارج الصالة عندها قلت في نفسي فرصة ولا تضيع اكلمه اغديه يدير أسهمي فلحقته ووقفت خلفه دون أن ينتبه منتظرا أن ينتهي من مكالمته فسمعته يقول هلا هلا يا طويل العمر الله يسلمك ما توقعت الاتصال .. لا لا ما تأخرت جيتهم على الموعد ... أنا آسف .. لا يابو رائد ... إيه شريت 3000 سهم ... لا هذا اجتهاد مني ... لا والله إني آسف ما عاد أعود لها ... لا ما قصدت ... لا يابو رائد الله يخليك أن واحد من عيالكم ... أوعدك أن هذي آخر مره ... سم ... سم الله يسلم ويخليك لنا ذخر حنا ولا شي بدونك ... الله يحفظك مع السلامة .
عندها نظرت لوجهه كان شديد الحمرة والعرق يتصبب منه بينما غرقت عيناه بالدموع , حين راني تلعثم وقال بصوت حاول أن يرسم عليه الهدوء خير إن شاء الله من زمان وأنت هنا . فسلمت عليه ولم يرد بل صد عني عابثا بجواله فأخذت أحادثه عن أسهمي وكيف أني ارغب في أن أديرها بشكل جيد واني لا أثق في احد غيره فتأفف وتركني متجها إلى الصالة عندها قلت له بحسن نية اجل سم لي على أبو رائد !!! نظر نحوي وقال برعب أنت تعرف أبو رائد قلت لا بس شكله هزأك وخلاك ما تسوى ثوبك اللي عليك ( يقولون المال عديل الروح وصراحة الدعوى تساوت عندي يا ترجعلي فلوسي يا أما احوس الدنيا على اللي فيها ) اقترب مني أكثر وقال أنت سمعت المكالمة قلت من أولها, عندها وضع يده على كتفي وقال تعال يا رجال خل نتفاهم ونشوف كيف ممكن نستثمر أسهمك تعال ثم دخلنا الصالة سويا كأعز الأصدقاء .
طلب الغرنوق مني كشف بأسهمي فأعطيته إياه فنظر إليه وقال وين أسهمك فأشرت إلى السطر فقال بس هذي أسهمك قلت نعم . فقال وماذا تريد أن تفعل بها قلت إذا جابت سعر مشتراي بعت صراحة أبدور لي على استثمار غير الأسهم فعبث بشاربه لثواني ثم نادى ربيع وبعد محادثة قصيرة نظر نحوي وقال أبشرك جاب الله واحد يبي يكسبك 5 ريال في السهم نظرت للشاشة ثم له وقلت بس السهم نازل فقال ما عليك هذا سعر السوق السوداء عندها أحسست بتفاؤل وقلت اجل خل نصبر يمكن يرتفع سعره زود وفعلا ظل يرتفع حتى بلغ سعر السهم 200 ريال عندها علمت السر وراء هذا الارتفاع إنها الشائعة التي أطلقتها حول الاندماج فخفت أن تنكشف ويعود السعر للهبوط فوافقت وعندها كتب الغرنوق لي شيك ب 6000ريال بعد أن تأكد أني لن أعود للصالة مره أخرى ولن اعمل بالأسهم من جديد ( خائف من المنافسة الواعية التي أمثلها ).
ما أخفيكم إني ما ارتحت حتى صرفت الشيك ومسكت القروش بيدي وعندها تنفست الصعداء وكانت أول مره أحس بالهواء يتغلغل خلال رئتي مذ عملت بالأسهم , ثم أخذت اعد النقود مره أخرى وعندها لا اعلم لماذا اجتاحتني فكرة إعادة الاستثمار مره أخرى في الأسهم ولكن مع تغيير الإستراتيجية فبدل 30 سهم في شركة واحدة اتبع أسلوب سهم واحد في 30 شركة وما زلت ادرس الفكرة حتى الآن .
[moveo=right]بذلك تنتهي رحلتي الطويلة والبغيضه مع الاسهم بنصر لي مؤزر وهزيمة لهيئة السوق والمضاربين والشركات كما خسر الاقتصاد السعودي عقلية كان يمكن ان تصنع التغيير.[/moveo]