ياظالمه زينك بشين السوايا
من وين لك قلب على طول جاير
مبغا الدوا لاصار جرحك دوايا
باكر على الظالم تدور الدواير
اخر علاجي الكي وانتي الكوايا
للحب عبره وانتي قربك عباير
لو هو على زينك بنلقى صبايا
المشكله في الحب تعمى البصاير
الصبح واضح والخطايا خطايا
والربح من بعض الاوادم خساير
يانفس قومي عن غرام البقايا
وياقلب قبل الحب شاور وخاير
اولاد ناس ولا نحب الوصايا
كلن يرى نفسه يعادل عشاير
ماكل قلبٍ ينشرى بالهدايا
ولا كل كسر تفيد فيه الجباير
المعطي الله مالخلقه عطايا
لو هي على خلقه سقتنا المراير
عزاي ربٍ يعطي حسب النوايا
يرحم عزيزين الزمن والضماير
ناس تدس الهم بين الحنايا
وناس وربي مادرت وش صاير
هذاك حظه مثل بيض الثنايا
وهذاك حظه مثل سود الظفاير