لعشاق الشاهي ، ما هي أفضل طريقة لإعداده..!

[قاصدخير]

أحبتي أعضاء منتدى بريدة.. أخواتي الكريمات

السلام عليكم ورحمة الله وبركاته..

أنا و زملائي المعلمين في المدرسة مدمنين شاهي بشكل غير طبيعي..

يعني لازم كل واحد في الفسحة يسوي له كوب شاهي (ليبتون أكياس)..

وطفشنا بصراحة من أكياس الشاي لأنها وبكل بساطه طعمها ( مالغ )

فقلتلهم ولايهمكم خبايا أبو الفزعات بيجيبلكم دافور بكره..

رحت محل اسمه (برق الحيا) مخرج 15 و شريت دافور ذو أسطوانه صغيرة غير قابلة للتعبئة بل تتغير..

سويت لهم يوم السبت الماضي براد شاهي بالحبق.. بس الحمدلله ماكان فيه إصابات

طبعاً (الذبات) تلعب دور في المواقف هذي..

اللي يقول شيره مب شاهي..

واللي يسأل هذا شاهي بالسكر ولا سكر بالشاهي؟ (لأن السكر كان زايد أربع ملاعق بس)


المهم مالكم بالطويلة..

أتمنى تعطوني طريقة سفرية لإعداد الشاهي للحصل على مذاق عالي..

بغض النظر عن كمية الشاهي والسكر لأني بديت أضبطها..

لكن أهم شي طريقة الإعداد والمكونات الإضافية على السكر والشاهي لبراد يكفي عشرة فناجيل..


ودمتم بود محبكم (قاصدخير)

[shahd2007]

احسن شي اظبطه الشاي <<<<< ابشتغل قهوجييه اذا تخرجت من الجامعه

اهم شي لاتطبخ ورق الشاي يعني لاتحطه مع السكر فقط نعناع او حبق واذا سكرت النار عنه حط ورق الشاي

اومااا ليبتون يارب لك الحمد مطاريس <<<< ماقلت اني خيره

[InFinito Amore]

صدقت يكون مـآلغ ومآحب الشاهي الا اذا انغلى مع المويـه , طريقتنـآ :
بعد مآ يغلي المـاء احط ـالنعنـآع وخليه يغلي وبعدهـآ ـألسكر و آحط لوبتن الشآهي حبتين .
ويكمل غلي لحد مآشوف ان غمق لونـه تقريباً يبين معك خفيف ولا لآ .و اذا حاب يكون اثقل
زود لوبتن وآحد زيـآده بالبريق ولا الترمس .
مدته : 3 \ 4 دقآئق بالكثيـر

[أم مجاهد]

وعليكم السلام ورحمة الله وبركاتة:

ضع ورق شاي ربيع وكيس ليبتون واحد ونعناع أو حبق أو عود قرفة أو

حبات هيل حسب الرغبة.

[بنت الكرم 2008]

شوف أخوي لا تحط الشاي الا بالأخر بعد ماتطفي النار وأحسن شي لا تكثر الورق وخله يخدر برواق وبعدين في شغله أسمها زعتر بري بتلاقية عند العطار طعمه خيييييييالي وحطه مع ورق الشاي بس لا تكثر لأن النكها مره قوية

[الزنون]

وعليكم السلام ورحمة الله وبركاته
انا طريقتي
افوح الماء وبعد الغليان اضع السكر و الشاي مع بعض واتركه لمدة 2 الى 4 دقائق على النار
طبعاً الشاي تلقيمة والنوع المفضل لدي بنتليز

دع الطبخ لنا وتمتع بالنكهة ياضيفي العزيز

[الخيآلي]

شف ابقولك طريقتي الخياليه

أول شي صب بالابريق ماء بعدين حط السكر بعدين خله لين يغلي بعدين طف عليه الغاز وبنفس الوقت حط الشاهي <<اسرع طريقه بالعالم هع
(يارب تكون فهمت بس )

[قطره]

اول شي تفوح ماء بالبريق وتحط سكر لكل لتر من الماء فنجالين سكر مسح.. او بياله واحده

وافضل شي بوضع السكر انك تحكم على البريق بمقدار السكر وهذه تحتاج لحاسة سادسه

واول ما تشوف السكر ذاب تطفي عنه وتحط اللبتون على الزمزيه وتزل البريق على الزمزميه عشان يخدر بسرعه

ويكفي ثلاثة اكياس ليبتون بس بثاني بياله طلع اللبتون عشان ما يصير مر
الزمزميه=ترمس

وبالهنا والعافيه

[خبر يقين]

أولا / الماء يكون تحليه مهب من البزبوز
ثانياً / الشاي يكون تلقيمه واحسن شي ابوجبل أو ربيع صندوق حديد
هذولي أهم شي

[عتال]

هذه طريقه مره حلوه

اول شي يكون الماء مغلي ثاني شي ضع في البراد ورق شاي وخله من عشر الي ربع ساعه اذا بغيت تشريه ضع عليه السكر يطلع رئحته قويه

واذا غليت الماء والسكر يترسب في العظام

[ام الزعيم]

اقول كل هذا النقاش علشان كاس شاىوالله ما اقول الا الله يخل لكم الحريم الى حتى الان بعضكم ما يعرف قدرهن

[amįЯЋ]

بدون كل التعب
حط سكر بالترمس وصب عليه شوي ماء ورجه
وحط اللبتن عليه وبالهنا والعافيه

[بسكوتي أذلك]

يعطيكـ ربي الف عااافيه