ارفع ستار الليـل وانقـض جديلـه
لا تستريـح الاّ بـروس الطّوايـل
يا صاحبي لو هي غَدَتْ مستحيلة
أشْهِرْ عليها سَيـفْ بِيـضْ الفعايـل
مـا ترتفـع للعـز نفـسٍ ذليلـة
ولا تُوهِبْ العليـا عيـال الحمايـل
الحُر .. يتعب لين مـا تستـوي لـه
يلهث وراها لـو بشتّـى الوسايـل
جَوّدْ عنان الوقـت وبكـل حيلـة
واسلك طريـق العارفيـن الاوايـل
من لاَ يحـوش المَرْجَلَـه عزّتـي لـه
يبي يشوف مـن الزّمـان الهوايـل
والعِلْـمْ تسمـو غايتـه والوسيلـة
يشعل قناديلـك لـو الحـظ مايـل
ترى ( عمى عين الظّـلام ) الفتيلـة
والاّ الجهل ( يعمي ) بعـز القوايـل
وان طاح كَفّكْ فـوق يـدٍّ بخيلـة
قل : ما تضيق الأرض بـأهل الجمايل
وادخل على اللي ما يضيّـع دخيلـه
ملجاك .. لا شحّت عليك البدايـل
تلقى الفضيلة فـي دروب الفضيلـة
وتلقى الفشيلة فـي دروب الفشايـل
أحيـان نـاس تحبّبـك فـي قبيلـة
واحيان شخص يكرّهك فـي قبايـل
- الشاعر خالد الجبر
العرض العادي
