قصتي مع مستشفى الولادة و الاطفال ببريدة

[D E E M]

بسم الله الرحمن الرحيم



و يسعد لي ايامكم



قبل فترة إتصل بي أحد الإخوة و طلب مني الحضور لمستشفى الولادة و الأطفال للتبرع بالدم لزوجته - عندها ولادة - بحسب طلب المستشفى اللي رفض استقبال الحالة ما لم يتبرع ذويها بوحدتين من الدم...

جيت و اخذوا مني الوحدة اللي يبون و سجلوا معلوماتي ...و قبلها رحت للدكتور و حط السماعة على يدي يقال له يجس النبض..و يسأل في اي مرز؟؟..في اكول اي نوع إلاج؟؟..أول مره تبرع و الا ما في اول مره؟؟؟... و حطونا على ذاك السرير المقوس اللي تقل من حقات هواة الاثقال و اخذوا من وحدتهم و اخذو منه هو وحده ثانية و عطونا على حبة عصير شفاط ابو قرش ... و بالنهاية قال لي خويي (( شكرا )) و مشيت ...و بقول لكم بالاخير ليه حطيت شكراً بالأحمر


المهم الكلام هذا كان يوم الثلاثاء


يوم السبت بالدوام انا ... الساعة 9ص و انا توي مفطر و معين من الله خير و ما عندي من الشيطان طاري و ناسي موضوع خويي و مرته جملة و تفصيلاً دق جوالي

و اطالع بالشاشه و الا رقم تلفون ثابت ... و هذي حالة نادرة جدا انه يتصل علي رقم ثابت

المهم رديت و كان الحوار التالي

الو

الو

الأخ فلان؟؟؟

نعم حياك

معك بنك الدم مستشفى الولادة و الأطفال


بسم الله الرحمن الرحيم

طبعا الأعصاب هنا نسبة تحت

خير يا اخي؟؟ (( و قلبي يقول الله لا يحييك و لا يحيي اتصالك))

انت تبرعت عندنا يوم الثلاثاء الماضي؟؟

نعم ( الصوت يقطع هنا )

كرماً ممكن تراجعنا؟؟

خير وش فيه؟؟؟

ابد بس نبي ناخذ عينه منك مرة ثانية

ليش؟؟؟

لالا إجراء عادي بس الدكتور مشتبه و يبي يتأكد

وش مشتبه فيه يا اخي؟؟

ها ها ها لا تخاف تراي معي 18 رقم كلهم نبي نعيد تحليل عيناتهم

يخوي ما علي منك لو معك 800 رقم انا اتكلم عن نفسي وش مشتبه فيه الدكتور؟؟؟

و الله عاد يا اخي ما ادري تعال و إسأله انت انا مكلف بالاتصال بس

مع السلامه ((طوط طوط طوط ))


طس الله لا يردك لا انت و لا مستشفاك و لا دكتورك و لا بنكك و لا اتصالك و لا كلمة أبشر يوم قلتها لخويي و انا ما بي الا العافية و كنت اقدر اقول له ما اقدر على التبرع و دور غيري


المهم

على طول قفلت المكتب و مشيت و انا كل الطريق ابحث بالجوال عن احد اعرفه بالمستشفى و ما لقيت

دخلت بنك الدم و الا الدكتور الباكستاني اللي ما تشوفه و تشوف الخير بعينك..طمرته طبعاً و رحت للموظف قلت متصلين علي؟؟؟

قال الاسم

قلت فلان

قال ايه و هو ينقز و يطير بي للدكتور و يقول له هذا فلان .. و الدكتور يقوم بسرعة و هو يقول ايوا ايوا .. ياخذني مع يدي للمختبر قسم بالله اني ايقنت ان الدعوا اكبر من ما هو معهود و لا هي سالفة مرض عادي....يعني 100% ايدز و بيودني للعزل الحين

دخلنا المختبر و قال للموظف سوي هازا تهليل.... و حط له صح على فقرة وحده بورقة التحليل طبعا كلها مصطلحات و تعرفون كتاباتهم

قلت للدكتور وش يحلل عنه؟؟؟


قال لي ((( بسيت بسيت ))) ما في خوف
وش اللي ما في خوف لعنبوك نشفت دمي
قال خلاص تهليل بعدين كلام
(((متخيلين الحالة النفسية؟؟)))

جا الموظف و كان مستهلك وقت طويل لتسريح شعيراته و عليه ملامح و حركات انثوية و يدياته تقل يديات بنية و مدهنهن بثلاث اربع انواع كريمات و روايحه تعجعج تقل مره و رايحه لعرس مهوب رجال و رايح للدوام

و بدأ باخذ العينة و اخوكم هاك الساعه و الله ما يدري وش القصة...اتذكر بس اصيبعات الموظف النويعمات يتراعدن من كثر ما كانت يدي ترتجف و هو ياخذ العينة

و قبل يخلص من العينة قلت له (( وشو التحليل اللي طلبه الدكتور))؟؟


قال (و بصوت مبحوح و انتم اكيد مرت عليكم اصوات الفئة هذي من الناس) و الله ما لي دخل < < بذمتكم ذا رد؟؟؟

يخوي وش اللي ما لك دخل؟؟

قل لي بس وشو التحليل؟؟

قال: و الله حنا ما نقدر نعلم

افا


ليه؟؟؟


إيدز؟؟


ها ها ها لالا يا شيخ بس تعرف اسرار المريض

الحمدلله على العافية....وشي اسراره يا اخي و التحليل لي انا و انا اللي أسأل

قال اخوي...انا مجرد موظف مختبر تبي شي لا خلصنا رح لبنك الدم و إسأل الدكتور
و اقول بقلبي (( عليك من الله ما تستحق انت و دكتورك يا ابن ؟؟))

((((((((((( طبعاً بالكلام هذا خويي اللي طلب التبرع له يومين هو و المدام نايمين ببيتهم مستانسيييييييييييييييييييييييين و ما جابوا خبر و مكيفين على المولود و الرجال تجيه تهاني و المره متكيه و كل عصر تجمع من 500 الى 1500 (((نقوطات)) نقدية هذا غير الهدايا و النقوطات العينية ..و لا تواخذوننا على التسمية بس هذا اسمها عندنا و ما فيه ما يقابلها باللغة العربية لأنها جديده علينا و لا يوجد لها تسمية في اللغة و لو لها تسمية ما سموها الناس ((( تنقيط ))) الله لا يسخطنا لأنكم كلكم (( العاقلين منكم )) ...و أنتم إن شاء الله كلكم عاقلين ....يعرفون معنى التنقيط اللي هو التقطير و هو غير التقطير المقصود منه تنقية المياه ((انفتح الموضوع و عيا ينقفل و تشربكت السالفة بس بقفلها))...المهم ..و اللي مو عاقلين بعد ....و ما اعتقد بيننا منهم احد ....بس اللي مو عاقلين عندهم ترجمة ثالثه لمصطلح ((تنقيط )) غير الاولى و غير الثانية ^_* و هذه الترجمة غير مستخدمة داخل الحدود السعودية

و اخيكم بالله متكي بالمختبر ينتفض ))))))))))


طبعا كل الكلام السابق ما له دخل بالسالفة بس ابي اعيشكم الجو اللي كنت انا عايشه ساعتها



يوم خلص و شفط له برواز كامل قال لي الموظف خلاص تقدر تمشي الحين

كررت و قلت طيب يا اخوي وشو التحليل ؟؟؟


و هو يعصب و من كثر ما عصب نقطت خدوده نيفيا و قال ..:يا اخي الله يرحم والديك لا تحرجا حنا ما لنا دخل شف بنك الدم و الدكتور اللي بوه

مو مشكله طيب متى النتيجه؟؟

بكره العصر

و يجي صوت فلبييه من داخل تصرخ تقول ((( ما بي ما بي ما بي بوكراااااااااااا....إط طيك طايم....إط ويل بي فينش أط نكست صطردي))

قال الموظف: تقول انوه يبي ... قاطعته هنا و قلت خلاص يخوي فهمنا نكست سطر دي ماحناب دبش يا اخي


امرنا لله

رجعت للدكتور وقلت له وش السالفه؟؟

دق عليهم و بربر معهم شوي و سكر السماعة و بعدها قال تعال ((يوم سفت)) يعني السبت

طيب وشو التحليل؟؟؟

يا اخي بسيت بسيت
طيب و هو بسيت وشو؟؟؟
قال يووووه خلاص انا كلام سفت يأني سفت ((تقل بغيت ادق))

قلت طيب ممكن اتصل عليكم قبل السفت ؟

و هو ينقز موظف سعودي حاطينه هناك كمالة عدد ما له لزوم ببنك الدم نهائياً قال (( رح يا رجال و المارية الغفلة ))

قلت شلون؟؟؟

قال ان ما دقينا عليك خلال السبوع ذااااااااااااااا

ما بوه شي !!

قلت صز؟؟
قال ايه ما عليك يا رجال ما عليك

و الله بغيت اروح مستشفى خاص اعيد التحليل و اسوي صورة دم كاملة و خفت لا يطلع بي شي غير ذا..و تعوذت من بليس و ما رحت و لأني منيب خابرن مستشفى لا خاص و لا عام ممكن الواحد يغامر و يحلل عنده


طلعت و انا انتفض و لا تغديت و لا تقهويت و لا تهنيت بشي ابببببد و انا بس اوسوس و جاني الف طاري و طاري و الساعة معية تمشي علشان يقضي اليوم و يقرب يوم (( السفت )) اللي هو (( نكست سطر دي ))


يوم جا يوم الاثنين رجعت لهم

الدكتور شافني من هنا و انصرع من الضحك من هناك

يوم ضحك تقل اني بردت شوي

قال يا اخي لسا ما في يجي يوم سفت

و انا امشي

و بالصدفه لقيت واحد اعرفه يشتغل هناك

و شرحت له القصه و هو يضحك

قال لا يهمونك ذولا

مختبرهم خرطي و يوم يقولون لك يوم السبت لان ما عندهم اجهزة فيرسلون العينة لمستشفيات ثانية..و قد اشتبهوا بناس واجد وسوسوا بهم و اخرتها ما فيه شي
و قد قالوا لواحد مشتبهين فيك ايدز و بهذلوا به و بهذلوا بعايلته و اخر شي ((( اشتباه )))

قلت يعني؟؟

قال توكل على الله و انا اقول لك مبدئياً ما فيك شي و اللي طلبوك للتحليل ما عندهم سالفة

تقل بردت شوي اعصابي

و الله اعلم شلون مشت الايام اللي بعد هذا اليوم الى يوم ((سفت))


يوم (سفت) رجعت لهم

رحت للدكتور و قلت دكتور وش نتيجة التحليل ؟؟؟


قام يضحك


أنتا خوف ها ها ها

قلت لا مستانس و هذا كبر كشرتي من الونسه ....بس وشو عنه التحليل ووش نتيجته؟؟؟

قال بسيت انا في اشتباه (إلتهاف بسيت)

قلت وشو إلتهافه؟؟؟

قال (التهاف كفد)


لا و تقول بسيت؟؟

قال ايوا
هوا في اشتباه التهاف ((كامل)) يعني خامل



طيب و الحين؟؟؟


قال الحمدلله انا اشتباه (غلت) غلط


قلت و بس؟؟؟؟؟؟؟؟؟؟


قال ايوا امشي الهين

وي ار سوري بط ذاتس ذا بروسيجر

و الله انه كان موقف يحتاج واحد ينزل الكنادر و انتم بكرامه و يقطع وحده منهن على راس الدكتور

و الثانية على راس موظف المختبر

و يطلع الواحد حافي و يروح يشري كنادر جدد و يروح لخويي اللي انا تبرعت لمرته و يقطع الثنتين الجدد على راسه و على راس مرته اللي بلشانه بالنقوطات
و ما جابت هي و اياه خبر هالمسيكين اللي بغا يموت من الوسوسه بسبتهم
لأني كنت غافل و ما عندي من الشيطان طاري و اموري عال العال و نقز لي بالتبرع اللي ما كان لا على بال و لا على خاطر نقزة شيطان و عيشني رعب مدته 8 ايام بدون سبب...

و المقابل كان ((( شكراً ))) < < ما نسيت اني مواعدكم اقول لكم ليه كتبت شكراً بالاحمر..بذمتكم شكراً مثل هذي بأي بنك تنصرف؟؟؟


أكيد عرفوا...


ببنك الدم؟؟؟
اول مره اعرف كلمة وين تصرف وش تعني....


حتى الجملة اللي فاتت هذي ما كان لها دخل بالسالفه بس علشان ما نطلع من الجو و علشان تعرفون ليه كانت شكرأً بالاحمر


المهم

الكلام ذا له 8 شهور و من بعده يا جماعة و الله قمت احس نواغيز كل شوي و قمت اوسوس بكل شي و رحت شريت عدة حلاقة جديدة و ما عاد احلق الا عند حلاق ارتاح له...و سنوني ما عاد اعالجهن اخاف من ادوات الطبيب و حطيت بالبيت ادوات خاصه بي بعيد عن ادوات الاطفال اخاف اعديهم

بإختصار كل تفكيري انقلب رأساً على عقب (( وسوست بالعربي )) من عقب هالسالفة



و حطيت هالموضوع هدفي


ابي اشوف وش رايكم ووش الحل مع مثل هالحالات؟؟؟

ووش تسوون لو انكم صرتوا بمكاني؟؟؟


ووش نسوي مع مستشفيات مثل هذي ؟؟


و بنفس الوقت حبيت اطمن الاخوان اللي تجيهم اتصالات بعد التبرع انهم لا ينزعجون
و من رأيي لا أحد يحط عند بنك الدم عنوان صحيح عن لا يهبلون بكم يا اخوان مثل ما هبلوا بي



لا تواخذونا


تحياتي لكم

[فهد العنزي]

..

..

هههههههههه

والله يانا مت من الضحك
انت صادز ولا فاضي جالس تكتب قصه
قسم بالله شي يقهرر وش الاشتباه ويوم السبت واخر شي بارده مبرده شكرا

تحمد ربك ياشيخ ان حصلت لك واحد تعرفه وجاب لك الخبر

انا لوو حصل لي مثل هالموقف الاياشيفيني مره ثانيه بايعين عمرري

بس بسئلك سؤال هل ندمت انك خدمت خويك او بالاصح زوجته يالغالي

..

[عبدالله الحلوه]

دييم


رائع سردك للقصه فقد اجبرتني لمواصلة القراءه حتى آخر قطره من دمك


حمداً لله على سلامتك


رغم ماصاحب القصه من اخطاء بطريقة التعامل إلا انها على الاقل تبعث التفاؤل لوجود من يهتم بصحة الآخرين بهذا الشكل


تمنياتي لك وللجميع بدوام الصحة والعافيه


تحياتي

[البيانو]

واحد من العيال مثل سالفك اخوي اتصلو عليه المركزي وخبو وسكرو السماعه بوجهه ويوم جاهم قالو نبي ناخذ من الدم مشتبهين بمرض
ولحسن الحظ ان خوينا ذا سبق وانه اخذ دوره بالمستشفى بعد ماخلصو راح لواحد يعرفه قاله السالفه كذا وكذا قال لا بس يلعبون عليك من شان ياخذون منك دم ويدخلونه بالبنك

طيب باي قاموس ذي تصرف

1- مايجوز ترويع المسلم
2-انهم ياخذون دم من دون مايستاذنون او يشرحون لك انهم محتاجين للدم

واتمنى ان الصوت هذا ياصل للمسؤلين

[البرتقالي]

الله ينتقم منهم

طيب هم ليش ما يريحونك ويقولون وش المشكله
بس العين بصيره واليد قصيره

لو فيه ناس كفو ما صااااااار الشي ذا كله م

[موج الوله]

والله قصتك طويله .......

المهم الله يجزاك الله خير على التبرع بالدم لأخاك المسلمين

[الطيبه مشكلتي]

[frame="11 98"]ههههههههههههههههه والله يانا مت من الضحك صرراحه d e e m
,وكملتها بحمااااس لاخر لحظه ....وتعليقاتك ررروعه ....لك مستقبل في كتابه قصص كوميديه
الف شكررررررررر لك وانشاء الله نشوووف لك قصص احلى بس مو تخوووفك زي كذاا
والله يجزاااااااااك خير ............تحياتي [/frame]

[الالماني]

[align=center]قرقر أنت كثير وثاني حاجة تنقيط وأيدز وش عرفك بالتنقيط وليه شكيت أنه اللي فيك ايدز
؟؟؟؟؟؟[/align]

[متسلل]

[align=center]هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههههههههههههه[/align]

[أبوباسم بريده]

[align=center]إحقاقاً للحق والله ضحكت بس حــرام مستشفى مثل هــذا عامود فقري للمستشفيات ببريده لأني شفت ناس تجي من الأسياح ومن قصيباء ومن المحافظات علشان يولدون فيه ومافيه قسم مختبـر والله قوي وغير كــذا كل هالموظفين اللي قلت يبي لهم قشع ويحطون مكانهم موظفين يعرفون يتــعــاملون بشكل واضح وبشفافيه مع مثل هالحالات !![/align]

[التنين]

القصه طويله لكن لأهتمامهم وحرصهم على صحة المراجعين يشكرون عليه لأن الدم يحتاجه كثير من الناس وخاصة النساء لحضورهن للمستشفى وهن بحالة نزيف عموما تشكر على تبرعك ونتمنى لمحب الخير التبرع بالدم وأنت تعتبر حاله نادره

[الطيبه مشكلتي]

حبيت اقررررراها مررره ثانيه عشااان اضحك
شكرررا يعطيك العافيه

[مخاوي القايله]

ياخي ملينا وحنا نتكلم ..

ولكن لاحياة لمن تنااادي؟؟؟ الى متى هذا الوضع المزرري ؟؟

[شق الصدر تلقى نصر]

بصراااااااااااااااااااااحه روايه موقصه

[علشانك بس]

اقتباس:  المشاركة الأصلية كتبت بواسطة الالماني     [align=center]قرقر أنت كثير وثاني حاجة تنقيط وأيدز وش عرفك بالتنقيط وليه شكيت أنه اللي فيك ايدز ؟؟؟؟؟؟[/align]

كنت بكتب نفس التعليق لكن اختصرت علي المشوار هه ,,
بعدين لو هم مشتبهين بإيدز ماراح يطلعونك ,,
اكيد بيتصّونك عندهم الين يطلع التحليل يوم سفت واذا تأكدو ان مافيك الا العافية سرّحوك ,,
عموما .. الحمد لله على سلامتك ,,