تعال شاركنا بــ بطة تسبدك ..!!!!

[ابو هليل]

[align=center]السلام عليكم ورحمة الله وبركاته

مرحبا يا الربع

صراحة تذكرت سالفة صارت لي قبل 142 سنة يوم كنت برابع إبتدائي مع مدرس الإملاء <<<< قاهرن

تعرفون الواحد بعض الأحيان ينزرق إذا صار أحسن من خوياه بشي

محدثكم............. الشباب يقولون إنه أحسن واحد بالـ خط و الإملاء وهات يا .. ( تكفى أبو هليل اكتب اسمي على الكتاب .. بس بخط معوج و زبرقه ) وانا ما صدقت درت على كتب الربع كلهم ابو علي .... ابو بدر وعلى بالنا قمة العربجة

المهم مالكم بالطويلة

كان عندنا حصة إملاء وعلى مايبدو إن ما فيه درس قال الإستاذ خل نتونس بالضحك عليهم وعلى خرابيطهم .. وبعد تفكير منه قال يا الله يا شطار <<< إيه هين يبي يقول شطار من أحسن واحد بالإملاء ؟؟؟؟

نطوا الشباب بصوت واحد << برضوا هذي يبي لها .. ابو هليل يا استاذ ابو هليل

ضحك وقال تعال يبو هليل نشوف وش عندك ..

قمت طبعا يالله يالله أمشي .. لا تحسبونه غرور إلا والله من ها ( الغلالة ) اللي رابطتها الوالدة الله يحفظها و يطول بعمرها - قولوا آمين - على راسي .

فكر سعادة الأستاذ وبعد تفكير طويل قال : اكتب .... مستشفى .

رد ابو هليل بثقة سهلة وهذي هي يا استاذ مستشفى

قال الاستاذ : وهو يضحك.. وين يبوووو انت ودميجتك ..... هذي مشتسفى غلط عليك!!

وبما إنه يضحك حسيت إني أمون عليه ولأني متأكد من صحة كتابتي ... قلت له : لا يا أستاذ أنت اللي غلط عليك << لا قايلها وأنا أضحك بعد

ما أمداني أكمل الكلمة إلا وهذاك الطراااااااااااااااق على وجهي ..

جب العصا يا ولد .... وهات يا جلد إلين عظيت الأرض وصياح إلين وصلت البيت

طبعاً راحت السالفة مع الأهل على : أكيد إنك مخنبق وإلا تسان ما دقك المدرس ........


ماهي مشكلة تروح السالفة صلحة

لكن اللي قاهرني وباطٍ تسبدي إلى هالحين

( وش سويت أنا علشان يمردغني المدرس ؟؟؟؟ )


طبعاً لأن المدرس قريب من بيتنا سألته يوم كبرت عن السالفة لكنه تهرب وقال ناسيها


على العموم أنا جبت سالفتي اللي باطة تسبدي إلى هالحين

هذي علشان إنكم تجيبون المواقف اللي حصلت لكم وقاهرتكم إلى هالحين




عاااد لا تفشلونن ولا تعطون موضوعي وجه


وفي الأخير

عساه ما مر عليكم هالمدرس[/align]