(قصة فله)
تقول القصة: إنه واحد من الناس الاولين يقاله أبوحمزهـ تزوج مرهـ .. المهم وبعد ماشاء الله من الزمن انتفخت مرته وجابت بنت، فرح أبوحمزه وتشقق من الفرحة..
ويوم صار بعد سنه وتحمل نوبة ثانية وإيلاه بنت بعد!! ومير يفرح بس مهب قوووهـ
يوم صار السنه الثالثة وتحمل مرته ويحتري ويحتري وتصير بنت!!
ضاق صدره أبو حمزهـ ماش يبي عيال يشتغلون معه ويدبرون لامنه كبر!!
وش سوى أبو حمزه راح ودور واعرس مرتن ثانيه.. وتنتفخ وبعد تسعة أشهر تجيب ولد~
أبوحمزه طار من الفرح..
أبو حمزهـ مسكنن أم البنات بيت وام الولد بيت؟؟
وبيت ام البنات لم جهة السوق ولا منه طلع من بيت ام الولد يمر من عند شارع ام البنات ودويس ولايوقف الا بالسوق..
ويشري أغراضه ثمن يمر من عند بيت ام البنات رايح لأم الولد وام البنات تشوفه (طبعآ الاولين على رجليهم).
ودايم على هالسيرة..
ماش ضاق صدرهـ أم البنات مهب حالة تسذا ..
المهم أم البنات سبرته مرتن من المرات وجلست عند الباب يوم مر من عند البيت وتجي تلعب بنته اللي عمره سنه ونص وتزقفه وتغني وتقول:
ما لي أبي حمزه لا يأتينــا
يظل في البيت الذي يلينا
غضبــان ألا نـلـد البنينـا
تـالله ماذالـك في أيدينـا
وإنمــا نأخـذ مــا أعطينا
وباختيار الله قد رضينا
ومير يتذكر أبو حمزهـ انه ظالمه هي وبنياته.. ويرجع لهم ويحط ام البنات وام الولد ببيت وحده..
ويعرف ان كل شي بدبرة اللي عينه ماتنام..
كتبتها على عجل وان شاء الله تعجبكم.