السلام عليكم
بدون مقدمات
اتمنى تعجبكم
دلع ورقة وتحنان ورومنسية
يازينها كلها لاجات عفوية ..!!
تجيبني لين اخر عرق من قلبي
واجي ومشكلتي اني جيتي جية ..!!
يعني اداري واغار وغيرتي تذبح
واخلص واكون المثالي للمثالية ..!!
اعطي حبيبي عيوني لو بغى عيوني
يكفيني لو انعميت .. يديه بيديه ..!!
احس بانسامه ان قرب على وجهي
واضم صدره على صدري بحنية ..!!
الحب ماهو رسوم.. الحب من داخل
واكبر دليل .. النيجيري والنيجيرية ..!!
الحب .. حب لقلوب اللي تاآلفها
يلغي جميع الفروقات البشرية ..!!
حبيبتي ياللي اسمك مابي اقوله
لاني يميني .. مع الناس اليسارية..!!
اللي يحسبون كلمة حب ممنوعه
نحب .. بعيونهم .. يعني .. حرامية ..!!
خليك منهم تعالي نسهر الليلة
مشاعري ( هذه الليلة )جنونية ..!!
صبيلي القهوة المرة من الدله
ابتقهوى من يديك .. الحريرية ..!!
احس مرارها بيديك يتغير
واؤمن باشياء للعاقل ( خرافية ) ..!!
خليني انسى سنين الهم والغربة
ودموع عيني على فرقا السعودية ..!!
خليني انسى التعب والحظ والدنيا
تعبان من يوم خلصت الثناوية ..!!
يومي طفل كل تفكيري متى اكبر
عشان احقق خيالاتي .. الخيالية ..!!
وكبرت غافي وكفّ الوقت صحاني
للحين كفّه .. على وجهي موارّية ..!!
وصرخ بوجهي بعالي صوته العالي
تحقيق الاحلام يحتاج العصامية ..!!
عرفت باني كبرت وقلت في نفسي
الله ياذيك الاحلام الطفولية ..!!
ومن يومها والتعب من راسي لرجلي
طموحي يشبني والنفس مشقيه ..!!
تعالي نسيني همي يابعد حالي
تعالي حتى مشاعرنا ثنائية ..!!
تعالي يام الدلع والملح والرقة
تعالي واموت لاقلتي ( حياوية )..!!
وسلامتكم
مقبل المقبل ( مبدع القاف )
العرض الشجري