*_^ ناويـ/ـه تشتريـ /ـن لابتوب ؟ .. هنا دليلك

[باونتي]

السلام عليكم ورحمة الله وبركاته

من ملاحظتي البسيطة خلال الايام السابقة
شفت كثير من الناس بدت تهتم في في اللابتوب
حتى احد الدراسات القريبة ذكرت نمو سوق اللابتوب 60% !
مما يدل الاقبال الكبير على شراء هذا النوع من الاجهزة الحديثة



وايضاً رافق هذا الاقبال تساؤلات عديدة واسئلة متكررة من المشترين
نظراً لكثرة الشركات والموديلات وتعدد الاشكال والاصناف
وهذا للاسف لقلة خبرة الناس بالجانب المعرفي لمواصفات وقطع الجهاز ..
يعني ماعندنا ثقافة كمبيوترية بالعربي ..

عشان كذا رح احاول اطرح في الموضوع شرح واضح ومختصر ومفيد ان شاء الله
في خطوات اختيار اللابتوب المناسب والنصائح الهامة للشراء ..
(اما الدسك توب او الـ PC نخليه لموضوع آخر لانه يحتاج موضوع منفصل وتفاصيله اكثر)


اولاً
هل فعلاً انت بحاجة الى لابتوب !؟

سؤال وجيه لازم تسأل نفسك قبل لا تشتري
لاني لاحظت كثير ناس طايرين بالعجة بس يشترون عشان فلان وعلان عندهم لابتوب

اذا كان شغلك في البيت او المكتب فقط ، خلك على الدسك توب اصرف لك
غير كذا الدسك توب بنصف سعر اللابتوب وقابل للتطوير عكس اللابتوب اللي صعب تطويره (الذاكرات فقط)

اما اذا انت مدمن كمبيوتر وتحب تتبطح وتتسدح يمنة ويسرة(== متعوب عليها
او انك كثير التنقل او انك تستخدم الوايرلس (الاتصال اللاسلكي) او ان معك كاش وتحب تدلع نفسك
اللابتوب خيارك الافضل ..


ثانياً
ما هي المواصفات والقطع الموجودة بالجهاز !؟

معرفة المواصفات والقطع هي الميزان لمعرفة الجهاز الجيد من الجهاز السيء
ورح نستعرض اهم القطع واسمائها وعملها حتى نعرف نختار الافضل :

1- المعالج
المعالج هو مخ الجهاز - مثل المكينة للسيارة - مثل القلب للانسان (== مايمديكم على التشبيهات
هو المحرك لكل العمليات في الجهاز ، لذلك لابد ان يكون معالج حديث وسريع
المعالجات الجيدة من الاحدث الى الاقدم :
(Intel)
Core 2 duo
Core duo
Centrino
Celaron ******** سيء جداً ولا يشترى بريال

وهي طبعاً سرعات تبدأ من 1.6 الى 2.3 Ghz

وفيه شي اضافي وهو (الكاش)
والحجم القياسي منه 2 ميقابايت والافضل 4 ميقابايت

ايضاً توجد معالجات AMD
والجيد منها AMD Athlon 64 X2
والمعالجات الثنائية النواة عموماً جيدة
اما AMD Sempron (== بطيء ما انصح فيه

طبعاً Intel و AMD في منافسه شديدة ومتقاربين في المستوى
لكن العديد من المستخدمين ينصحون بالانتل لانه الافضل


2- الهاردسك
الهاردسك هو المساحة التخزينية لملفاتك على اللابتوب
وفيه احجام متعددة .. ويقاس بالـ GB = قيقا بايت
الحجم القياسي 80 وكل ما زاد يكون افضل ..

(اللي راعي افلام ومايعرف يحسب المساحة اللي يحتاجها
القيقا الواحد يستوعب 3 ساعات فيديو تقريباً وعليك الحساب)

3- الرام
الرام هو اليد اليمين للمعالج .. مثل السكرتيرة للمدير (== تشبيهات مشبوهة
لذلك هالقطعة مهمة جداً ولازم تنتبه لها
الرام احجام ، فيه 512 ميغا بايت
وفيه 1 قيقا بايت (يعني 2 في 512)
وفيه 2 قيقا بايت وهذي اقصى سعة للابتوب حالياً ..

4- نظام التشغيل
معروف واما يكون Windows او linux او Mac
واحياناً يباع الجهاز بدون نظام تشغيل (هذي صفة سلبية لان اغلب العروض تتضمن نظام تشغيل اصلي)

سؤال يتردد كثير ، آخذ ويندوز فيستا ولا xp ?
الآن المنتشر والجديد Windows vista وهو نظام محترم ورسوماته تفتح النفس
يعيبه ان فيه ثقل بسيط يعني مو مثل انسيابية الـ xp
بس بشكل عام نقدر نقول الفيستا هو الخيار المناسب وفيه عدة اصدارات منه
وكل جهاز مخصص له الاصدار المناسب لمواصفاته

وانبه اذا نظامك فيستا لابد يكون الرام عندك لايقل عن 1 قيقا
وايضاً من المفضل كرت الشاشة يكون 128 ..
وشو كرت الشاشة .. تابع معي ..


5- كرت الشاشة
كرت الشاشة قطعة خاصة في معالجة بيانات الصور وجودتها
وهو احجام فيه 64 - 128 - 256 - 512
وهي نوعين : كرت مشترك - كرت منفصل


الكرت المشترك يكون مشترك مع المذربورد اللي هي قاعدة الجهاز
وميزاته
توفير البطارية بشكل نسبي + انخفاض سعر اللابتوب عموماً
سلبياته
يسحب من الرام حسب سعته
يعني اذا الكرت 128 والرام 512 = يصير الرام 384
ومايصلح للعب الالعاب الـ 3D او الالعاب القوية ..

اما الكرت المنفصل يكون قطعة منفصلة عن المذربورد وتقنيته اعلى
ميزته
يصلح للمصممين وراعين الالعاب ويعطي وضوح
سلبياته
يرفع سعر الجهاز + يستهلك البطارية اكثر نسبياً ..

يتبعــ