الله يرج سموك الكريم (( فضاء .. حيات )) .. لمن يملكون الجرأة فقط .

[خالد الحربي]

كيفنكم

(( مقال طويل شوي .. أللي اتصاله دايل أب يقطعه ))

اليوم الظهر .. (( كعادتي )) طفشان .. لا أحد يسألني وراك طفشان كل يوم (( حالة مستعصية تجيني ))

جلست عند التلفزيون وجلست أقلب في قنوات (( العرب سات .. والنايل سات )) ..

حطيت على أول رقم واحد إلا وطلعت لي قناة مغبرة حسبتها أندثرت وذكرتني بأيام يومني كنت (( صغير )) ..

إلا وهي القناة الأولى السعودية أو غصب واحد ..

(( تذكرت ان هالقناة كانت تسبب لي عقدة شديدة .. كانت تفتح الساعة عشر الصبح وتسكر 12 الظهر .. ثمن تفتح أربع العصر وتسكر ما أدري متى لأني كنت أشخر الساعة 9 بالليل .. ماهوب رضاي إلا أمي ترقدني غصب .. وكان اجمل وقت بالنسبة لي الساعة 4 العصر ولمدة نصف ساعة .. وكنت احلم طول الليل في بك بانثر .. وميكي ماوس .. وتوم وجيري .. وأليس في بلاد العجائب .. وجنكر .. وجزيرة الكنز .. نص ساعة كنت احلم فيها كل يوم أرضاء لشبقي الطفولي .. وإذا خلصت هالنص ساعة أجلس اصيح وأنتظرها اليوم الثاني .. (( ماهوب مثل مبزرة هاليومين .. سبيس تون .. وأم بي سي 3 .. وآرتينز .. 24 ساعة )) على سالفة سبيس تون عندي أخوي صغير يدرس بالصف الثاني الأبتدائي .. مره جاني وقالي : أنت تعرف همتارو ؟! .. قلت له : لا .. قالي طيب تعرف كراش جير .. قلت له لا .. قالي طيب تعرف المحقق كونان .. قلت له لا .. قالي اجل وش تعرف ؟ .. قلت والله يا أخي الصغير ما أعرف إلا عقال يسوطك على ظهرك ..

المهم كبرنا شوي .. وصرنا نشوف هالمسلسلات المصرية اللي تجي بعد الأخبار التاسعة والنصف .. انا أذكر أن اخبارهم تجي الساعة 9 بالليل .. وتنتهي الساعة 12.15 .. ويجيبون المسلسل ربع ساعة ثمن تجي الأخبار الساعة 12.30 .. كلها على أستقبل ودع .. زار .. طار .. نام .. أصدر .. ومسيقاهم اللي تنانانانانانانانانانا تصاحب الخبر .. (( الله يذكر سليمان العيسى والعيدي بالخير )) .. ثمن ضغطت على زر (( دليت مسح لهذه القناة التراثية ))

وبعد ما (( تفلت عن يساري أستعيذ بالله من الشيطان الرجيم )) ..
قررت أني طلع لقناة رقم 2 .. (( وطلعت لي القناة الرياضية .. السعودية )) .. تذكرت العذاب اللي كنت اتعذبه بوزن الأريل أيام المباريات من القناة الأولى للقناة الثانية .. (( وبما أني غاسل يدي من الرياضة السعودية .. بعد موت فيصل بن فهد الله يرحمه .. ولا أتابع لا أندية ولا المنتخب السعودي .. كله رشاوي ومحاباه لنادي الأزرق .. ومن هذا المنطلق قررت أني أسوي (( دليت لها )) ..

ثمن طلعت لمجموعة (( طيب الذكر )) .. (( وليد الأبراهيم )) .. (( اللي أخوه أسمه محمد الأبراهيم الشاعر المعروف بنطله للقصايد .. قاله أيه قال شاعر .. إلا وين راح الحين )) .. مجموعة (( Mbc )) ..

رحت لقناة (( Mbc 1 )) ..
طبعا هي أول قناة فضائية مفتوحة .. في العالم العربي .. سنة 91 ميلادي .. (( للمعلومية مجموعة الموارد اللي تملك قنوات أوربت هي أول قنوات عربية أنشأت في العالم العربي .. وهي أول قنوات تبث عبر التشفير وكانت في 90 ميلادي )) ..

هالقناة اللي كانت حلم حياتي أني اتابعها على أيام ما كان (( الدش )) بقيمة 25 الف ريال .. (( وشوفوا وشلون كانت احلامي صغيرة مرة )) ..

وبصراحة أول ما شفتها أنصدمت صدمة (( حضارية )) .. أول مرة أشوف بنات يقدمن نشرات الأخبار .. كنت أتابع نشرات أخبارها كل ما رحت لقريبي.. وكانت تقدم نشراتها (( نيكول تنوري )) على أيام عزها
ماكنت أخلي برنامج يفوتني من برامجها .. كانت جلستي في عند قريبي هذا ما تاخذ إلا ثلاث او أربع ساعات .. بس اجلس اتسمر عند هالقناة مثل (( المسمار )) .. واحاول أن مايفوتني شي .. عشان إذا رحت للمدرسة أعلم كل اللي حولي من طلبه ومدرسين عن هالقناة .. وكنت أتكلم بفخر .. وتعالي عليهم (( يا حول ماعندهم دش )) .. طبعا كنت (( أتسذب عليهم وأقولهم عندنا دش )) .. وطول الوقت وانا مسوي جلسات وأسرد عليهم وش شفت من هالقناة طبعا الأيام اللي ما كنت أشوف القناة كنت (( أهلس عليهم )) وأقول قصص من نسج الخيال .. (( كنت أقولهم البارح شفت وحدة مفصخة هه )) .. وكل (( زملائي )) وقتها .. يبون يجوني للبيت عشان يشوفون (( هالدش .. وهالحريم المفاصيخ)) .. وانا كنت أتعذر لهم .. وأقولهم ما أقدر (( أبوي يهاوشني .. لأنه ما يبي الناس تدري عن الدش )) ..
وبما أن حبل (( الكذب قصير )) .. كانوا (( هالمخفات )) إذا طلعوا من المدرسة .. (( يعلمون )) أهلهم عني وعن (( دش بيتنا المزعوم )) .. وفي يوم (( مشؤوم )) جت جارتنا .. (( مسيرة )) وقالت لأمي (( أبكم أنتم عندكم دش )) ..

قالت لها أمي (( أيه شوفيه بالحمام )) خخ .. (( طبعا وقتها كانت تقام المحاضرات .. والندوات .. وتوزع منشورات .. وكان العلماء يحذرون من شي أسمه (( البث الفضائي )) .. وبعد ما أنتشر الدش في أغلب بيوت الناس المقتدرة على دفع قيمته .. (( كان المطاوعة )) شايل معه (( خرازة )) (( يعني بندقية للجاليات العربية في منتدى بريدة )) .. وهات يا (( قصف لرأس الدش )) .. وكان اللي عنده دش .. هذا مارق عن الدين .. وتصب عليه اللعنات .. ويستباح دمه .. (( بس الحين أغلب اللي كانوا يحرمون الدش والقنوات الفضائية .. هم أنفسهم حاطينها في بيوتهم .. (( بل )) يشاركون في القنوات اللي كانوا يحرمونها )) ..

ماعلينا .. نرجع لأمي وجارتنا ..

قالت لها أمي (( لا أعوذ بالله وش دشه .. والله مايدخل بيتي هالملعون .. وش بلاتس أنتي أنهبلتي .. ومنهو الحمار اللي قايل أن عندنا دش .. أستغفر الله (( وجلست امي تستغفر من الدش )) .. )) .. (( أشوفتس يمة الحين لتس دش لحالتس .. وين حلفتس خخ )) ..
قالت لها جارتنا (( ولدي يقول أن (( فلان .. اللي هو انا )) يقول أن عندهم دش .. وفيه حريم مفاصيخ )) ..
قالت أمي (( يعقب ويخسى .. (( المارج )) .. وبعد بعد يهرج بالحريم .. أنا أوريه (( الكلب )) .. ))

راحت جارتنا .. وأخذت علقة من أمي .. ثمن أبوي (( عمري )) ما نسيتها .. لأني قلت (( عندنا دش )) .. وجالس (( أتمرج )) على زملائي ..

وكانت فضيحة لي بــ (( المدرسة )) بعد ما انكشفت .. وأني تسذوب .. ولا عندي سالفة ... يوووه (( فشلة )) قدام الطلاب .. (( ووسمه )) على خدي من خيزرانة (( أبوي )) ..

درات الأيام .. وصار في بيتنا (( ثلاث دشوش )) ... (( وطفينا )) في قنوات العربسات (( لين ملينا )) ..
وفجأة أنتبهت أني الحين (( طفشت .. وقرفت من شي أسمه دش )) ..
ومازالت قناة (( Mbc1 )) .. شغالة .. وكان فيها برنامج تقدمة وحدة (( لبنانية )) .. ما أعرف وش أسم البرنامج .. بس هالبرنامج يجيب بنت .. (( شيفة .. وجيكرة )) .. ويغير ملامحها من (( النقيض إلى النقيض )) .. تغيير شامل .. سواء في اللبس أو قصة الشعر .. أو المكياج .. وبعد ماكانت (( قردة )) .. صارت بقدرة قادر (( ملكة جمال )) ..
طبعا اللبس اللي يلبسونها (( مزلط .. يعني عاري .. وما تتحمل أي مصاريف )) .. وعرفت أن هالقناة لها هدف (( مريب )) ..
يعني بنات هاليومين .. اللي تشوف نفسها (( مو حلوة )) .. تبي تقلد اللي تشوفه قدامها .. لأنها شافت كيف تحولت من قردة لغزال .. (( طبعا )) غير برامج (( حواء )) .. واللي بصدق يدعوا لتغيير مفاهيم .. وعقائد (( المرأة الملتزمة .. أو بنت نص الدين )) .. والكثير من برامجها وأفلامها ومسلسلاتها .. الموجهة (( لسعوديات )) ..

وإذا عرفنا أن إدارة هالقناة كلها (( لبنانية )) .. عرفنا أن الأنحلال والأنحراف .. والمحاولات (( الخبيثة )) لتغريب أفكار هالحريم ..

(( وليد الإبراهيم .. هو أول من نشر الثقافة اللبنانية وصدره لشارع العربي والخليجي .. وبعدها تلاشى وجود المذيعات المصريات والسوريات (( الجامدات بالتعابير .. والسلوك .. واللبس )) .. لصالح (( اللبنانيات )) المتحررات .. سواء بالسلوك أو التعابير واللبس .. ))

لقيت نفسي بعد تفكير (( عميق )) .. أسوي (( دليت لها )) ..

ثمن لقيت قناة (( Mbc2 )) .. المتخصصة في الإفلام الأجنبية .. وبصراحة أنا أستغرب أن هالقناة تعرض (( أفلام مثيرة وعامرة في البوس .. والأحضان والمايوه .. ومشاهد لا تعرض في دول الغرب في وقت مخصص للأطفال )) ..
بس بما أن (( وليد الأبراهيم )) من (( أصحاب تغيير الأخلاق والتربية السليمة الصحيحة في مجتمعنا المحافظ .. )) راح أستغرابي وزال .. وزالت القناة بزر (( دليت )) ..

ثمن .. نقزت لقناة (( Mbc3 )) حقت الأطفال ..قلت يمكن هالقناة أنظف من الباقي ..
بس والله العظيم .. ولا أزل عليكم صدمني (( فلم كرتون )) ..يصور عصابة من أربع أشخاص (( ملتحين )) ..هدفهم السطو والقتل والسرقة والأختطاف .. (( والشخص اللي يحاربهم شرطي ماله لحيه )) .. طبعا أنتصر عليهم الشرطي وسجنهم ..(( والله العظيم هذا اللي شفته )) ..
لحول ولا قوة إلا بالله .. حتى الأطفال يصورون لهم أن الأسلام (( أرهاب وقتل وسرقة )) ..
بس تذكرت أن (( الوليد الأبراهيم )) .. رجل لا يحاسب .. ولا عنده ولاء لا لدينه ولا لوطنه .. (( يسيطرون على قراراته مستشاريه اللبنانيين المسيحيين .. والعلمانيين )) ..
فـــ على طوووووووووول (( دليت )) غير مأسوف عليها ..

ثمن قلت يا ولد خلني (( أتابع الأخبار )) بشوف وش صار بالدنيا ..
حطيت على قناة (( العربية )) ..
(( للمعلومية ..هالقناة أستحدثت لمجابهة قناة (( الجزيرة القطرية )) .. وصرف عليها مئات الملايين من الدولارات .. وبثت أرسالها وقت حرب أمريكا الأخيرة على العراق .. وهي تابعة للوليد الأبراهيم .. ))

لقيت أن (( العربية )) .. تبث أعلانات (( مجانية )) لصالح الحكومة العراقية (( الرافضية )) .. غير نشرات الأخبار والبرامج .. (( اللي تلمع )) صورة الرافضة .. وأنهم ظلموا من (( صدام حسين )) .. وأنهم يتعرضون للأبادة من قبل (( الأرهابيين السنة )) .. وتشعر أن هالقناة تديرها (( الحكومة العراقية والروافض )) ..وتسمي أهل السنة المجاهدين (( أرهابيين وتكفيريين وصداميين )) .. وإذا صارت عملية ضد الروافض (( الخاينيين )) من قبل (( أهل السنة )) .. جلست تولول وتنعق بكل ما تملك من صوت (( وتتهم السنة )) في هذا الفعل الغير أنساني .. بس إذا (( طلع خبر )) أن جيش المهدي أو أن الأحزاب السياسية .. أبادت (( عوايل )) من السنة .. قالت في أخبارها .. (( وجدوا مقتولين ))بس هذا هو الخبر .. لا عملية أرهابية ولا أتهامات لروافض .

حتى مذيعيها وبرامجها .. مافيه أحترافية في تقديم نشرات الأخبار أو برامج لها تأثيرها .. وأغلب الموظفين (( هم من فئة الثدييات .. قصدي الفئة الأنثوية .. جمال بدون ثقافة .. حتى برامجهم .. كلها تصب في قالب واحد (( الأرهاب الأسلامي .. أو لقاءات مع بعض المنحرفيين في الأفكار سواء علمانين أو لبراليين .. )) ..
ومن أفلاس هالقناة .. (( نقل وقائع حمل مذيعة من مذيعاتهم يوميا .. وادق التفاصيل في يومياتها لحد ما ولدت )) ..
حتى تغطياتها (( في فلسطين )) .. كلمة (( أستشهاد )) غير معترف فيها .. بلــ (( مقتل ناشط )) .. وإذا فجر (( فلسطيني )) نفسه بوسط جنود (( يهود )) .. تسمي هالعملية (( أنتحارية )) ..

وفي حرب لبنان الأخيرة .. أثبتت (( العربية )) فشلها في تغطية الحرب .. مراسليها (( معدومين )) الكفاءة .. كل الحوارات (( ركيكة )) ..
يعني (( قناة فشلت بأثبات وجودها .. وعرفت الناس أن هدف القناة والقائمين عليها من أمريكان ومنحرفين هو محاربة الدين بأي طريقة .. (( مافيه أي برنامج ديني )) .. بلــ (( تلميع الأمريكان وتلميع صورة الروافض .. ومحاربه كل العقائد الأسلامية )) ..
فقلت (( دليت لها )) .. عليها (( اللعنة )) من قناة ..

ثمن شفت القناة طيبة الذكر .. (( Lbc ))
(( هالقناة يمتلك فيها الأمير الوليد بن طلال والأمير خالد بن سلطان 70% من أسهمها )) ..
أتذكر يوم طلعت هالقناة صارت (( حديث )) .. الشباب والشيبان (( تذكرون ما إلكن إلا هيفاء )) ..
وبرامجها (( المشخلعة والمخلوعة )) .. قناة كل همها (( أثارة )) الغرائز .. ونشر ثقافة جديدة في برامجها (( المستنسخة )) .. من (( ياليل ياعين .. وستار أكاديمي .. والوادي .. ألخ )) ..
ثقافتها (( تبوتقها .. خخ كيف جت تبوتقها )) .. في الجنس والرقص والهز .. (( ونهب وسلب الأموال الخليجية )) .. بالتصويت لبرامجها الهابطة ..
حتى رئيس مجلس أدارتها (( اللي يسمونه الشيخ بيار الظهار ... ما ادري وش شيخه .. يمكن ثقافة الجنس والأنحطاط )) .. قال : (( القناة تستهدف بالدرجة الأولى الشعب السعودي )) ..

فقلت ما بدهاش (( دليت )) ونرتاح ..

ثمن طلعت لقناة (( المستقبل )) .. (( الأعلانات فيها كلها سعودية .. وماغير مدح لسعودية .. تسنها القناة الخامسة السعودية هه )) ..
وطبعا هالقناة على خط موازي لطيبة الذكر ((lbc)) .. ثقافة تغريبية جنسية هابطة ..

على طول (( دليت )) غير مأسوف عليها ..

ثمن جيت لقنوات (( روتانا .. كليب .. طرب .. سنما ..زمان .. خليجية ..موسيقى ))
واللي تتبع كلها لصاحب السمو الملكي الأمير (( الوليد بن طلال )) ..
طبعا كلها فيديو كليبات هابطة .. واغاني ركيكة .. وبنات ليل .. تبث عفنها طوال اليوم والليل ..
(( تذكرت أن الأمير الوليد بن طلال .. قال في لقاء معه : أن هدفه وأمله نشر الأخلاق الأسلامية الفاضلة .. يوم أفتتح قناة الرسالة )) .. ضحكت ضحكة هستيريه من كلمته فقلت (( الله يرج سموكم الكريم )) ..
فـــ على طول (( دليت )) ..

ومريت على كل القنوات (( تقريبا)) .. لقيت هبوط أخلاقي عجيب .. (( إلا من قنوات قلة )) ..فيديو كليبات وبنات وشباب كلها شذوذ وأنحراف (( وعاهرات )) .. ملاهي ليلية (( ومواخير )) .. في بث حي لا رادع له ..

لقيت بعد دراسة شديدة أن أغلب هالقنوات (( يملكها أو مساهمين فيها سعوديين )) .. حتى اللي مافيها شركاء أو يمتلكها سعوديين (( نلقى )) المهابيل فارغي العقول (( يدعمونها بمسجاتهم التافهة )) ..

فتحسرت على واقعنا الأليم ..(( شبابنا ضاع بين عاهرات الكليبات .. وبين سلب ونهب فلوسهم ))
والأشد حسرة (( هو الدعم الكبير من قبل سعوديين )) .. اللي المفروض يكونون اداه بناء .. مو هدم للأخلاق أو مستقبل أبناء (( كل هدفهم فيديو كليب وعاهرة ومسج يطلع )) ..

حسبي الله عليكم يا القائمين على قنوات الفساد والدعارة ..

وتحيه خاصة فقط لقنوات لها بصمتها في عالم الفضاء (( المقرف )) ..
مثل قناة المجد .. وقناة أسلامية قليلة ..

وتحية خاصة لقناة (( الجزيرة )) .. قناة تستحق أن نشيد بها .. محافظة على الأخلاق ..تغطية حقيقة (( أحترافية )) للأحداث .. تسعى دائما لتميز (( وهي متميزة في كل برامجها واخبارها )) .. كفاءات عالية .. (( لها برامج دينية عكس العربية )) .. لاتحرف أو تغيير من (( مسميات )) ..

(( رغم أن لها موقف مع الحكومة السعودية ... بس تبقى الأفضل ))

(( تبا لمروجي الشذوذ والأنحراف ))

كتبه (( بألم وبحسرة ))

العبد الفقير إلى عفو ربه ..
بتاريخ 2006/09/18
من (( شرق السعودية ))

[ملاك نجد]

انطفى جهازي مرتين وانا اقرا بس ابجاهد على هالموضوع وابطبعه واقراو الليله وبكرا ارد عليك

[مباشر]

والله يانت مو معقوووووووووووووووووووووووول كنك تسرد حكايتي مع الدش والقنوات هههههههههههه

الله والعالم كل شاب صار له اللي صار لك . بس يمكن أنا أفرق عنك بشي بسيط وهي دعايات (( كيف تنقصين الشحوم الزائده على الارداف )) ههههههههههه

والله زمان نتلص الى الفجر لين عيوننا تصير كتشب

[خالد الحربي]

اقتباس:  المشاركة الأصلية كتبت بواسطة ملاك نجد     انطفى جهازي مرتين وانا اقرا بس ابجاهد على هالموضوع وابطبعه واقراو الليله وبكرا ارد عليك

الله مير أنه يعينتس على جهازتس .. شكل فيه (( دودة )) ..

بعطيتس نصيحة عشان .. يتعدل جهازتس

كوبين ماء + رغوة صابون + مزيل لشعر + ثلاث ملاعق من (( البن ))
أخلطيهم مع بعض لمدة (( ست ساعات )) ..
وبعد الخلط رشيهم على جهازتس ... وإذا خلصتي .. (( جيبي مسحاة )) .. وأجلسي (( أبدعي )) بتكسير الجهاز وبعدها يطلع تماام

أمزح


الله مير أنه يحييتس وشكرا لمرورتس

[خالد الحربي]

اقتباس:  المشاركة الأصلية كتبت بواسطة مباشر     والله يانت مو معقوووووووووووووووووووووووول كنك تسرد حكايتي مع الدش والقنوات هههههههههههه الله والعالم كل شاب صار له اللي صار لك . بس يمكن أنا أفرق عنك بشي بسيط وهي دعايات (( كيف تنقصين الشحوم الزائده على الارداف )) ههههههههههه والله زمان نتلص الى الفجر لين عيوننا تصير كتشب

أجل رجتعك (( لحنين )) مضى

تصدق عاد

كانت للاوربت قناة اعلامية مفتوحة .. بالليل تجيب مقتطفات من برامجها .. وبالنهار تسوي دعايات (( لشفط الدهون من البطن والأرداف )) ومن الشفاحة كنت أسهر وأتابعها عشان كلمة (( الأرداف )) خخخ ..

حسبي الله عليهم .. بغوا يضيعوني ضاعت عقولهم

بس الحمدلله رجعت وعرفت أن كل هذا ماهو إلا هدم للأخلاق وتفريغ الناس من معتقداتهم الأسلامية ..

ألف تحية لك

[الذاهبة]

مرحبا بالإقلاع ..

ياشيخ الله يرج سموك على هالذكريات ..

لكن وراك جاحد برنامج ( الفروسية ) و ( نكتفي بهذا القدر من المسلسل اليومي ) ..

و ( ابتسامة سليمان السالم الساحرة ) .. و ( العالم في اسبوع ) .. يعني كفاية يوم الجمعة الله يشرفه

مرررره ضيقة خلق .. ناقصين حنا أخبار العالم في اسبوع .. ما تحملنا أخبارنا لحالنا ..

و القناة الثانية و برامجها : ليلة خميس ثيرزداي نايت .. و ذيك المذيعة أم دقن طويـــــــل يصلح تركب سكسوكة عليه ..



الله يسامحك بس كيف أثرت ذاكرتي ..

عموماً تراي ما أذكر شي هذي اختي الكبيرة هي اللي تعلمني فيها

<< < ماعاد يمديك !




مممممممم

طيب تعال هنا

انت وش تبي بالضبط ؟

أنت وجارتكم العتيبية .. خخخخخ

تبي قناة فضائية لك بلحالك ؟!

أو قناة فضائية موجهه للشباب الاسلامي ..؟!


عندكم قنوات اسلامية بس من يتابعها ؟

حقت العفاسي كلها اناشيد و أذكار و اوراد .. و لا قناة ذاك المجنون المشعوذ ..

اللي على طول قاعد و يقرأ آية الكرسي و ينفث على المشاهدين ..

ياخي لا تعلب علينا مسوي حالك يعنني تبي قنوات كذا ..

أقطع يدي ان ماكنت الآن تحرى مسلسل جادة 7 ع الإم بي سي ..




تحياتي ..

[خالد الحربي]

اقتباس: مرحبا بالإقلاع .. ياشيخ الله يرج سموك على هالذكريات .. لكن وراك جاحد برنامج ( الفروسية ) و ( نكتفي بهذا القدر من المسلسل اليومي ) .. و ( ابتسامة سليمان السالم الساحرة ) .. و ( العالم في اسبوع ) .. يعني كفاية يوم الجمعة الله يشرفه مرررره ضيقة خلق .. ناقصين حنا أخبار العالم في اسبوع .. ما تحملنا أخبارنا لحالنا .. و القناة الثانية و برامجها : ليلة خميس ثيرزداي نايت .. و ذيك المذيعة أم دقن طويـــــــل يصلح تركب سكسوكة عليه .. الله يسامحك بس كيف أثرت ذاكرتي .. عموماً تراي ما أذكر شي هذي اختي الكبيرة هي اللي تعلمني فيها << < ماعاد يمديك !

(( ذكريات كثيرة .. أجلس أتذكرها دايم ... ))
كانت أحلامي بسيطة جدا .. (( كنت احلم أن بك بانثر أو جنكر يطلعون لي من التلفزيون )) ..

كثيرة هي المواقف .. بس عشان ما أطول في الكتابة قلت أختصرها لأقصى حد .. (( والا الباقي أعظم وأشنع ))


************************************************** *

اقتباس: مممممممم طيب تعال هنا انت وش تبي بالضبط ؟ أنت وجارتكم العتيبية .. خخخخخ تبي قناة فضائية لك بلحالك ؟! أو قناة فضائية موجهه للشباب الاسلامي ..؟! عندكم قنوات اسلامية بس من يتابعها ؟ حقت العفاسي كلها اناشيد و أذكار و اوراد .. و لا قناة ذاك المجنون المشعوذ .. اللي على طول قاعد و يقرأ آية الكرسي و ينفث على المشاهدين .. ياخي لا تعلب علينا مسوي حالك يعنني تبي قنوات كذا .. أقطع يدي ان ماكنت الآن تحرى مسلسل جادة 7 ع الإم بي سي ..

شوفي انا كنت بجهل ديني (( مانيب قايل أني ملتزم )) .. بس كنت أتقبل كل شي أشوفه ، واتابع المسلسلات والأفلام .. حتى أيام ما أنتشر الدش (( وطفيت فيه )) .. كنت أدور لو كلمة (( تثير الغرائز )) .. ولا تستغربين أن كلمة (( بوسني من بنت )) كانت تسبب لي هيجان (( عاطفي ونفسي ))
وأعترف لك .. وأعترف للجميع .. أني كنت أشوف أفلام (( مصرية )) ماهوب رغبة في متابعة الأحداث لا .. (( بلـــ شوقاً ولهفة لوحدة تحتضن واحد .. بوضع يثير كمائن ساكنه وخامدة (( في جسدي )) .. أجلس بالساعات وبالهبل عشان هالأشياء ..
(( وفعلا تأثرت وتأثر عقلي وفكري .. بكل شي أشوفه .. يعني كانوا الأمريكان بالنسبة لي شعب راقي وكنت معجب فيه وبحضارته (( وبناته )) .. كل شي معجبني فيهم سيئاتهم وحسناتهم ...
حتى البرامج الحوارية والسياسية كانت تأثر فيني .. يعني لو قال واحد (( التطرف الأسلامي .. كنت أقول التطرف الأسلامي .. وإذا قال الأنفتاح والحضارة والتحرر .. كنت أقول الأنفتاح والحضارة والتحرر .. ))

كنت أتصور (( أو صور لي من هالقنوات )) أن الملتزمين (( متطرفين . وأصوليين )) وعلى هذا المنوال كنت أتبعهم في قولهم .. يعني (( أمعة .. أو مع الخيل يا شقرا ))
كل هذا بسبب ما يعرض علي يوميا من (( هالقنوات )) .. طبعا الحين أصبحت مدرك وعاقل (( وراحت أيام الشفاحة ))

(( بالمعنى الأصح .. أصبحت جاهز لتسويق افكار ومواقف شفتها .. وسمعتها .. سواء بحواري مع الآخرين أو بكتاباتي ))

ولا أنكر أني أتابع القنوات بس على نطاق ضيق ومحدود جدا جدا .. برنامج هادف أو حوار سياسي .. لكن أني اتابع مسلسلات وأفلام وبرامج مالها لا هدف ولا قيمة (( أقولك لا )) .. لأني أعتبرها سخافة ..

طبعا .. بما أني عشت التجربة (( وكادت أخلاقي وديني يروحون بسبب نشر هالثقافات لنا .. )) حبيت أوضح خطر هالقنوات ومن يديرها والقائمين عليها .. على المجتمع .. والطفل بشكل خاص ..

ما أقول نبي قنوات أسلامية بحته .. نبي قنوات هادفة .. لا رذيلة لا أنحراف .. ولا محاربة لدين من قبل (( مرتزقة علمانيين ولبراليين )) فتحت لهم بيوتنا (( غصباً )) .. وكل همهم الردح لدين والأخلاق .. وتسويق أفكارهم الشيطانية ..

ومن قالك أني أنسان (( كامل العقل والدين .. أو أن أخلاقي فاضلة ؟ )) بالعكس انا أنسان عادي جدا .. لا عندي ألتزام بالدين (( رغم أني أتمنى هالشي )) .. ولا عندي عقدة من تقبل الآخرين .. انا لي صداقات كثيرة (( حتى مع اللبنانيات اللي تشوفيني اهاجمهم )) بس والشهادة لله هي صداقات تعتبر (( ضمن أطار .. وظيفي و أخلاقي رادع مالها أي هدف ثاني .. يعني انسان عندي أخطاء .. ولا أحب غيري يقع فيها لأني جربتها ..

(( نصيحة لك .. لاتحكمين على الناس بالظاهر وتقولين أقطع يدي .. ولا تطلقين (( العبارات جزافا )) .. خذيهم بحسن النية )) ..

ألف شكر لهذا المرور الكريم ..

[مباشر]

يالذاهبه ياكثر ما أتقطعت يدينك هههههههههه حتى شوفي يدك بالصوره الرمزيه حقتس مقطوعه هههههههههههههه

[الذاهبة]

اقتباس:  المشاركة الأصلية كتبت بواسطة مباشر     يالذاهبه ياكثر ما أتقطعت يدينك هههههههههه حتى شوفي يدك بالصوره الرمزيه حقتس مقطوعه هههههههههههههه

أفصح الله يوفقك

ترى عورني راسي من التفكير ..

فسرت كلامك إلى أكثر من شي إزا بدك أفصح من شان ما تسم لي بدني ..



<<<< يمديها تسوي شامية ؟

[متغربه]

ههههههههههههههههههههههههه رهيبه سالفتك بس طووووووووووووووووووويله احولت عيوني وانا اقرا

[فاطمة الوليعي]

مرحبااااااااااا اخي " اقلاع حتى الضياع "
على فكره اسمك .. لا يدل على عقليتك ..اليس كذلك ؟؟
.......................
مشكور اخي الكريم .. وتنبيهات جميله حول هذه القنوات .. " رغم اننا كلنا دون استثناء .. عارفينها .. وعارفين اهدافها
.. ولكنها فتنه .. عمت بلادنااااااااااااا

فحسبي الله ونعم الوكيل
.........................

ولا نملك .. إلا ان نعمل .. دليت .. كما فعلت .. وتصفى على ثلاث او اربع قنوات .. هادفه ..

واجدها مناسبه .. ان اقولكم على قناة سمارت وي .. قناة رائعة جدا وهادفة ..
والآن .. صارت قناتين .. الثانية منوعه .. وتتضمن ايضا .. برامج للاطفال هادفة ..وتربوية
وللاسرة ايضا ..

انصحكم بهما
......................

تحياتي للجميع

[امرؤ القيس]

الاخ اقلاع حتى الضياع 00

رغم اعتراضي على بعض المفردات في مقالتك الا انه يبقى موضوع جميل جدا ويناقش مانعانيه من حسرة وضياع اخلاقي وفكري وتعكير للهواء الطلق الني نتنفسه صباح مساء


القنوات الفضائية اوجدت لتلك الاسرة التي تحصنت وعجزوا عن اخراجها للحرية المزعومة وتوصلوا الى بث سمومهم بأيدي وطنية وبأموال لانعلم مصدرها

لقد سمعت الشيخ المزعوم صالح كامل ولا يعرف الصلاح والكمال له طريقا وهو يحاول ايهامنا ان قنواته تعالج القضايا الاسرية وانها صافية صفاء الماء ولا شك ان هذا هو قمة النضليل

عزيزي اقلاع 00 سيستمر الغزو ةفي جميع الاتجاهات مالم يقيض للامة رجل رشيد قبل ان يغرقوا ونغرق معهم


شكرا لك

[جناان]

حسبنا الله عليهم
هم سبب ضيااع الشباب
وكثرة المصائب اللي حاصله
لكن العاقل من وعض بغيره ...!!
موضوع راائع منك استاذ اقلاع

[Miss_Autumn]

.
.
.
حسـآفـة الـ 5 دقـآيقـ وأنـآ أقرأ الموضـوع..!
.
.
.

[خالد الحربي]

اقتباس:  المشاركة الأصلية كتبت بواسطة متغربه     ههههههههههههههههههههههههه رهيبه سالفتك بس طووووووووووووووووووويله احولت عيوني وانا اقرا

هذا وانا مختصرها


تحياتي لك