إذا شفتهم أتضايـــــــــــــق أنتم مثلي وإلا أنا بــس,,,

[SAGA]

بسم الله الرحمن الرحيم
السلام عليكم ورحمة الله وبركاته

نموذجين من الناس إذا شفتهم أتضايق
الأول:شايب شراني همه تجميع الفلوس والأراضي تلقونه أربع وعشرين ساعه بالمحاكم يطالب هذا ويطالب ذاك بدون رحمه ولا يمكن يسامح أحد من وجهه ماترتاح له أبد..
أو شايب إذاكبر إنهبل بدى يراكض ورى الحريم كل يوم آخذ له بنت سواء سعوديه أو أجنبيه.

الثاني:عجوز تصغر روحه غصب تقص الشعر وتصبغ وتلبس لبس اللي أصغر منه بعشر سنين وهذا الغالب يصير بالعجز
إذا أعرسن مسيار
أو عجوز شرانيه ماحد يسلم منه ولا من لسانه ودايم تشره وتسب هذي وتنقل كلام ذي...

فعلا أمر يحزن أنا بتفكيري لو أبوصل أعمارهم
أبشتري شقه عند الحرم ولاأطلع من مصلاي
بس إذا شفت هالنماذج أخاف أصير مثلهم لو أبوصل أعمارهم طبعا..
يعني إحنا إذا أذنبنا يغرنا شبابنا ونشوف اللي كبرنا واللي أكبر منا ماماتوا بـــــس هم ربعهم كلهم ماتوا...أولادهم كلهم تزوجوا ويمكن أولاد أولادهم بـــــــــــعد ومع ذلك متمسكين بالدنيا..
سبحان اللــه فرق بينهم وبين العجوز أو الشايب اللي دايم يتعبدون وإذا زرتهم من تدخل لين تطلع وهم يدعوون لك إذا شفت هالنماذج أفرح وأحس الدنيا بخيـــــــــــــر..


تتوقعون حياتهم السابقه قصدي بمرحلة الشباب لها علاقه بالحاله اللي يكونون عليها بأيام الكبر,,,


شكرا

[shahd2007]

سجى
يقولون من شب على شي شآآب عليه
يعني شوفي اهتماماتك واللي تحبين راح تكبرين وانت تحبينهن
وتصير هذراتك بهن

اقتباس: شايب إذاكبر إنهبل بدى يراكض ورى الحريم كل يوم آخذ له بنت سواء سعوديه أو أجنبيه.

اقتباس: أو عجوز شرانيه ماحد يسلم منه ولا من لسانه ودايم تشره وتسب هذي وتنقل كلام ذي

هالنموذجين ماحبهن مثلك بس الحمد لله اصبحوا قله الشيبان اركدوا عن الزواج
والعجز صارن مايقولن لااحد شي يواكبون التطور ويغمضن عن كل شي

[دلة بيبسي]

عجوز تصغر روحه غصب تقص الشعر وتصبغ وتلبس لبس اللي أصغر منه بعشر سنين



هذي مااأشوف به شئ ابد بالعكس حلو ان الوحده تهتم بنفسها حتى لو هي عجوز


لكن الشايب الشراني والعجوز ام لسان هذي اللي اكرهه مره


اما بالنسبه للقلقك اذا كبرت بتصير من اي نوع وهل لحياتهم السابقه لها دور لما هم عليه بعد مايكبرون مالك الا تردد ((( اللهم اصلح لي النيه والذريه )))

[عاشق الخير]

من تالي بدوا الشيبان ينقرضون ...

يعني كم سنه وخلاص يختفون ذولا وتبدين ما تتضايقين

[يركدون]

اقتباس: فعلا أمر يحزن أنا بتفكيري لو أبوصل أعمارهم أبشتري شقه عند الحرم ولاأطلع من مصلاي بس إذا شفت هالنماذج أخاف أصير مثلهم لو أبوصل أعمارهم طبعا..

والله مهيب بعيده ههههههههههه

مير لا تطنزين بهن احمدي ربك

صح كلامك انا مثلك استغرب

بس ترى العجوز والشايب مايشوف

الي انتي تشوفين بهم هم يحسون

انهم ماهنا ملحهم لا سوو كذا

[فديكا التميمي]

بيعوضون يابنت الحلال خليهم يعيشون حياتهم
لدامهم ماشين على الصراط المستقيم
بلاتس ماشفتي جدتي وهي تطقطق بالآيفون
ادري انه ماتدري وش سالفته بس بتعيش يومه ياحبيله
بس احسن مابهن على قولت شهد بادياتن موب ينقدن وكلشن يمشنه
موب مثل منول مالتس خلق تمرين من عندهن تحسين انهن بيطلع شين موب بتس
من النقاده اللي بهن

[Chocolate]

ههههههههههه
كل مالهم يكثرون هالاشكال

[عازفة ألحان الليل]

مااتضايق إلا للي يضايقني بدون سبب
سواء بنت مرة عجوز شايب رجل شاب
اما الي كاف شره عن مايهمني.

[أحتآجه وأجهل مكآنه]

.


مابقى بالعمر كثر مامضى
الواحد بالعمر هذا المفروض يفكر لعماله
ويخلي عنه الدنيا واللي فيها
والله يحسن خاتمتنا يارب

[هلاوين]

الجمااااااال والمال مطلب للكبير قبل الصغير وهي فطررررة فطر الله الناس عليها .

اشوف نفسي كل يوم احب الدارهم احب من قبل يعني ساير بطريق الشيبان ههه

والله الظاهر ياصرتي كبرهم واثرك اهبل منهم ههههه

يالتوفيق سجى

[SAGA]

شكــــــــرا للجميع

[روح لايسعهآ جسـد]

لاعادي ليش اتضايق
ليش ابلش بهم وانا بروحي مليانه عيوب
انا اتضايق اذا جاني انتقاد من الناس اللي حولي
اما مثل هالاشكال ماتعني لي شيء
ليش انا ماعندي الا هذولا بالدنيا عشان اتضايق عشانهم

[شاها]

هههههههه سجاوي مت زحك على موضوعك ياأنتي حاقده عليهم
وتراهم بنظري ماسووا غلط انتي ظالمتهم توبي يابنت
شوفي ياختي اللي بده يجمع فلوسه حلاله انتي وش محرق رزك ماأشوف انه اكل حق غيرة
واللي سوواه مو غلط والا بده يتجوز كيفه الشرع محلل ليه الا غصب تبينه يحجر على عمره وماينبسط
واللي بده تتملح كمانه محله الشرع وماسوت غلط يابعدي
يختي اللي ضايقني نظرتك لهم ليه تعتبرين اللي يسونه غلط وسعي نظرتك
و اللي يحز بالنفس صح الافعال اللي يسويه سوا للشيخ الكبير والا للشاب
اللي ماترضي ربي ولارسوله وأما غيرة حاجه ماتزعل بتاتا
تشاااو
.. .. ..

[عذابي غ ــير]

والله انا اذا شفت الكبار اتضايق , لأني أفكر اذا صرت بأعمارهم
الشيخوخه عندي شبح
الآن افكر اذا كبرت وترهلت افكر وش راح اسوي
احب الرياضه واسويها لأني خايفه من المستقبل
ماابي اكبر ويبان علي الكبر
<< شكلي راح اكون من النوع اللي تتضايقين منهم خخخخ

وسعي صدرك واتركي الخلق للخالق