انتبهوا لا أحد يعلم قولوا (ما أدري) تعالوا بشويش موضوعنا عن الجحادة

[جبل عمر]

[align=center]الكتمان (الجحادة)
طبع اتصف به بعض الناس وتربى عليه
تعلم من بيته أن يجحد كل شي اسمه عمره
مكان عمل والده أشياء أتافهه ....إلى ألخ
تجد بعضهم من شدة الجحادة وما فعلت به
حتى في كتابه اسمه كتسجيل اسمه بفاتورة أو
حينما يطلب اسمه فيقول عبدالله الصالح ويضيف أل
لاسم والده لكي يخفي اسمه وإيهام من أمامه أن الصالح اسم العائلة
مره قرأت في فاتورة ضمان
لقناة المجد لشخص أعرفه اسمه علي و أبوه سليمان
فكتب علي السليمان وغضبت عليه وقلت له اسمك عورة ليه تجحده
أنت رجل
أو حينما تتصل بأحد ويرد عليك صغير تربى على الجحادة وإذا قلت له وين أبوك أو أمك
يقول (ما أدري) وش اسمك (ما دري) بتجون لمنا بالبيت (مادري) بترحون معنا(مادري)
أقصد العوائل القريبة لبعض حتى لا يقال لماذا الفضول كبيت الأخ والأخت

ليه نجحد؟
لماذا اشتهرت عنا لجحادة في منطقتنا؟
هل الحجادة تعتبر ذكاء؟
لماذا النساء تحجد كل شي وتستغرب إذا وجدت مو جحودة؟
هل استفدت من الجحادة؟؟

[/align]

[جوان2007]

والله موضوعك رايق ,,وانا ضد شي اسمه

جحاده واكره شي عندي هالصفه مو شرافه بس ماراح نسأل الناس الا اسئله عامه ماراح نسألهم عن حياتهم الخاصه

وش فيها اذا عرفو الناس اسمي او وظيفتي ,,وغيره

اما الناس الي يجحدون ياكثرهم اعرف ناس مايقولون عن حياتهم شي ولا عن روحاتهم وجياتهم ثمن

لاجاء ابوهم كب العشاء وقال كل برنامجهم خلال الاسبوع الي ماشفتهم فيه !

ومره عندهم لقينا السلم بالصاله قلنا وراكم مدخلينه وش بتسوون ببيتكم قالو ماحنب مسوين شي

يوم صار الاسبوع الي بعده ولاهم مغيرين كل لمبات البيت !

[@ الجفولة @]

قال رسول الله صلى الله عليه وسلم " استعينوا على قضاء حوائجكم بالكتمان فإن كل ذي نعمة محسود "



يعني الجحادة مشروعة خصوصا عند خوف العاقبة .

[إخلاص]

اللي يجحدون بصراحه يطفرون ان صح التعبير

بس سياستنا معهم اننا ما نسألهم عن شي ندري انهم يبون يكذبون فيه او يجحدونه

وسبب الجحاده هي الخوف الشديد من العين

الحمد لله الذي عافانا مما ابتلاهم وفضلنا على كثير من خلقه تفضيلا

[بنت البدائع]

مرحباً جبل عمر ...




قد نحتاج للكتمان في بعض الأمور وليس الكل ... وهذا أمر ضروري لمن يعاني
من ترصد عيوون الخلق عليه ...

لكن البلى باللي يجحد كل صغيره وكبيره على أمور لاتستحق ..

وأشوف إن بعض الأطفال يمسحون قاموس الجحادة مسح من بيوت أهاليهم هه!
وأنواع التوهيق ...


حصل لي موقف على طاري الجحاده ...

كنّا مرّه عند ناس نموون عليهم قووه ..
جلسنا نسولف وأخذنا راحتنا .. وأنا إندلقت بالكلام وأخذت راحتي لأني غالباً ماأعترف بإسلوب الجحاده في أمورنا الشخصيه عند الناس المقربين لي حيل " مثل الخالات مثلاً "

وأنا أتكلم .. مادريت إلا جوالي يدق .. وأطالع من هو !! إلا هذا رقم أختي.. وأختي معنا بالجلسه .. ناظرته بعيوني وآثاريها تغمز لي وتعض شفتها يعني إسكتي هههههه

ودائماً ماأستنكر عليها الجحاده بأشياء أرى إنها لاتستحق ..



دمت بود ..

[الرأي الأول]

اسرع طرق الوصول للتخريف تمر عن طريق اخفاء مايعانيه او يبطنه المرء

من امور حياته وعدم البوح بها

[شموخ العز]

الجحاده زينه بعض الاحيان اما شيئ خرابيط ومايسوى يجحد !!وشووله؟
مير ذكرتن بعمتي تقوول دائما مااخلي بنتي ذات الخمسه سنين ترد على التلفون تقول اذا ردت تعطي المتصل اخبارنا وش سوينا وين رحنا وش اكلنا وكل شيئ

[وحده من الوحدات]

بصراحه انا مع التحفظ وضد الجحاده

بعضهم الله لا يبلان وصلت به الجحاده للمرض ... والجلسه معهم تجيب الهم

اذكر مره اختي نكبتنا وجحدت جيته لمنا والله تقل موزين بيتنا حرامي
كان عندنا عزيمه ولا نزلت وياربيييه تقل ع قلوينا وخرته يصيح ولده وهي تصلي وتنزله الشغاله لم الحريم !!

عقبه حرجته امي عمره تجحد روحه
لازم نفهم ان الناس ما يخفاهم شي وبلعكس بجحادتنا نقلل من مكانتا في نفوسهم

وشي اكيييد الاشياااء الخاصه من الغباء الاخبار عنه

[محاور]

جبل عمر

إذا كان أمر خاص الأفضل أن ( يجحد )

قال الرسول صلى الله عليه وسلم ( اقضوا حوائجكم بالكتمان )

ويقولون العامة ( كلمة ما أدري ماله عاقبه )


أما الأمور العامة ما أعتقد هناك حاجة للجحادة

[فانتازيا إعلامي]

^جبل عمر^
اعتقد .....
ظهرت الجحاده مقابل العين (ألنحاته )
فتطوره إلى أن صارت عاده بكل شيء واختلط الكذب معها
وعاداتنا أعمت الكثير من تعاملاتنا ………..

شكرا لك …..

[الأمواج الباردة]

اعتقد ان هناك فرق شاسع مابين الكتمان والجحاده !


(( الكتمان ))
فيما يختص بأموري الشخصيه ـ الخاصه ـ والعائليه اجده مطلب اساسي لكل فرد منا، لأنها تزيد من هيبته ومكانته الأجتماعيه ،وعيب علينا ان نتحدث ونثرثر بكل صغيره وكبيره من حياتنا، لربما البعض من اصحاب النفوس الضعيفه قد ينتهز الفرص في وقت الضيق لنيل منا بالطريقه القذره التي يفضلها هو .



ام (( الجحاده ))
بعض الناس يسوي فيها ثقله على الفاضي ،بحيث ترجع لأسباب نفسيه عنده يحاول أن يرسم لنفسه رونق وهمي امام الناس ، أو انه انسان ثقيل طينه من اساسه متكبر متغطرس مايحب يتحدث مع الناس .
هذا عندما يسأل عن اشياء عامه جدا لا تتصل بشخصه او حياته << مثل عندما يسأل عن نتيجة حدث او قرار سريع على باله راح يحثو بماله حثو على الناس بالرد .




ولا اظن طفل يعرف للجحاده باب في زمننا الحاضر فكم من اسر تمزق سترها وشملها من خلال سحب الأسرار العائليه من افوه الصغار على قوله المثل ( خذ أسرارهم من أغرارهم ) .


وخذ على يسارك النساء من سابع المستحيلات أن تكتم لك سر أو حتى ولو ابره قد شيكت تخبر سابع جاره بها << كأن أحد حالف عليهن يمين مغلظه .

وفيه مثل يقول لو ترد ان يشع لك خبر اعطه امرأه فقط !! وكالات أهم الأنباء الفوريه .

اقتباس: هل استفدت من الجحادة؟؟

نعم وبكل قوه ، لأني املكها وهي لا تملكني .

[ابوعابد الدعيسة]

والله انك صادق

واذكر مرة كنا مسافرين وحنا مجموعة عاد لما اخذنا استراحة والسالفة هذي بالحفر كتبنا العقد

عاد صاحب العقار قال لواحد من خوينا وش اسمك

فكر وقال

طبعا مدير الرحلة اسمه صالح واللي بيكتب العقد اسمه عبدالله واللي حاضر معهم اسمه احمد

قالوا صاخب الاستراحة وش اسمك علشان نكتبه بالعقد
طبعا هو جحد اسمه وقال
اسمي

عبدالله احمد الصالح

يعني جاب كل خوياه بالعقد

والله حلوة هذا فيها عدل

ولا وش رايكم

[ﬡ REEMA ﬡ]

والله يا انا ماطيق الجحاده

وبلان الله باقرب جحودين من اكثر

واحد يجحد عن الثاني

تصدقون عاد ان مرة جدي جاحدتن عرس خالي < ولده

وحنا كل اسبوع ولا اسبوعين نشوفهم

ومادرين الا من الناس !



الله لا يبلانا بس

[ابوقش]

طبعا بما اننا بمجتمع قصيمي ( شبه ) حسود

اتوقع ان الكتمان مطلوب في بعض الأمور وخصوصا

المواضيع الحساسة والعائلية ..

اما بعض الأمور فلا تحتاج لأي كتمان واعتقد ان الخوف

من العاقبة له دور في الكتمان والجحادة ..

[Queen of buraydh]

تناقشت صباح اليوم مع صاحباتي عن هذا الموضوع ..

بالنسبه لرأيي الشخصي .. لا احبذا نقد ( جحادة ) احدهما .. ولدي ديمقراطيه بهذا الموضوع ,

اقصد بأن كل فرد حُر بما يخبئ من اموره وبما يفصح ايضاً .. تعتبر حريه شخصيه

ايضاً اخ جبل البعض (حتى اقرب الاقراب ) يكون فيهم ( شفاحه زايده ) مثلاً تجدهم انعم الله عليهم وحالتهم الماديه من اروع مايكون لكن (الشفاحه ) مسيطره هنا ..

بمجرد ماتسافر يبدون برمي الكلمات بأنك سعيد وطلباتك مُنفذه وتمتلك مادّه .. بالرغم انهم يمتلكون افضل من مادّتك ..
مثال آخر .. ( ايييييه .. فلانه ؟ على كيفها متروكه تروح وتجي مع هالسواق وطلباتها أوامر !! ) بالرغم ان لديهم من يُلبّي طلباتهم ..لكن ارجع واقول ( الشفـــاحَه تلعب دورها ) افضل حل هنا الجحاده

شكراً لك