دتسن غمارتين ومخبونة عليكم !!

[امرؤ القيس]

تحية للكل


كنا في استراحة جالسين وشابين النار ( فاكهة الشتاء )

الجلسة كانت حلوة رغم ان فيها اختلافات وخلافات في وجهات نظر لكن تعتبر حلوة لانها جامعة الاحباب كلهم

عددنا كثير يعني لو يجون عشرة خمس طعش كل ساعة مو مشكلة لاننا نلقى مواضيع نفتحها مع بعض

مرة من المراريت حاولوا خمسة يطلعون باستراحة جميع لحالهم وخططوا ونفذوا تخطيطاتهم من ورانا طبعا , صحيح انهم شايفين انفسهم ومتكبرين بس برضه روحتهم مالها داعي لانهم سيفشلون ورايح يرجعون وهم يعضون اصابع الندم على روحتهم !!

المهم هذولا راحوا واخذوا استراحة جميع بس الغريب كل يوم اشوف واحد لحاله بالاستراحة وكانهم اغراب , فاقترحت عليهم اقتراح انهم يشترون دتسن غمارتين ويبدون يروحون ويجون جميع عليها !

حتى اقل شيء يتشاوفون بالاستراحة ومو كل ماجاء واحد لقى ورقة مكتوب عليها حضرت ولم اجد احدا ثم يرد عليه رفيقة بعد وانا جيت بعدك ولقيتك رايح !


صحيح فيه ناس يسيرون عليهم من استراحتنا بس مايجلسوا عندهم كثير لان استراحتهم موحشة وبرد وبين اثل الله يكفينا شرها


فياليت شباب استراحتنا يبنون لهم غرفة بطرف الاستراحة يتجمعون فيها ويمدون لهم سلك تلفون ودش حتى ما يتوحشون ولا يجيهم حارش مارش !


الا وش ورايكم بجمعة الاستراحات هل هي حلوة ام لا ؟ وهل كثرتها مفيدة ام برضه لا؟

ولو خلاكم احد من استراحتكم وبغى يرجع هل تفرحون فيه ام برضه لا ؟



الصراحة سمعت طرف خبر انهم ملوا من الاستراحة بس كل واحد يجزم الثاني ويقول فشيلة والله ماكملنا شهرنا الثاني !!!!!!!!!!

الحظيظ اللي يبي يحضر بيع الاثاث حقهم !!


امرؤ القيس

[عاشق ديرتي بريده]

ددسن غمارتين !

[هامة حاسوبية]

[align=center]

اقتباس:  المشاركة الأصلية كتبت بواسطة امرؤ القيس     الا وش ورايكم بجمعة الاستراحات هل هي حلوة ام لا ؟ وهل كثرتها مفيدة ام برضه لا؟

أدري داخله عرض ، بس معليش


كثرة الاستراحات وارتباط الشباب فيها أظنه غير جيد

فهو يلهيهم عن أهلهم ومشاغلهم

فلو كان هناك يوماً أو يومين من كل أسبوع يكون فيها الاجتماع بين الشباب وتناول وجبة العشاء مع بعض (كنزهة) لكان الوضع أفضل بكثير من جميع النواحي





[/align]

[&نجدية كووول&]

أصلا ماضيع الرجال إلا الأستراحات..

تقل أحد غاصبهم إلا لازم أستراحه وراه كل مايرتز ببيته أستراحه وبالاخير مايجتمعون

مير علمنا لاباعو أثاثهم أستراحتنا ودنا أناثثه ....

[علشانك بس]

الأستراحات حلووه وتجنن ,, لكنها ماتصلح بالبرد أبدا ,, الشتاء يبي بر وضوية وسوالف ترد الروووح ,, يالله من فضلك بس ,, طبعا هذا بالنسبة للعوائل ,, والشباب لابغو يطلعون مااخذو راينا ,, ولا لو بياجذون رايي كان حجرتهم بغرفة وخليتهم يعرفون ان الله حق ,, ويحسون فينا وفي حجرتنا 24 ساعه بالبيت ,,
<< يوم سمعت طاري الددسن ماتت برررررد ,,,
فوووتـّـك بعافيـة ,,,

[جلوي العتيبي]

امرؤ القيس

المجموعه الواحده تجد لهم جلسات وإستراحات أخرى .

لكن الأهم هو إختيار المجموعه والمكان المناسب فلانقبل الواشي ولا النمام ولا الحاقد الذي يرمي بقذارته في مجلسهم ويرحل .

ماسمعت بمقولة (جلسه محترمه ) هذه لاتحكمها أماكن ولا أزمنه وإنما يحكمها أشخاص لايجعلون للحاقدين فرصه ولا مجال للإساءه فتبقى جلساتهم محترمه.


شكراً لك

[بنت البدائع]

اقتباس: الا وش ورايكم بجمعة الاستراحات هل هي حلوة ام لا ؟ وهل كثرتها مفيدة ام برضه لا؟ ولو خلاكم احد من استراحتكم وبغى يرجع هل تفرحون فيه ام برضه لا ؟

سؤال أبخش عرررض فيه المعذررره

- رأينا بالإستراحات ؟

والله زينة شينه ..
زينه أنه تضف الرجل لاصارت الحرمه مجتمعه مع خواته عند أهله

وشينه إنه تلهيه عن زوجته وعيالهـ

للأسف بوقتنا هذا مافيه أحد يوازن بين الإستراحه والبيت والأهل
<<< ماجربت لكنـ أسمع شكواي وبلاوي من الحريمـ ..

((طبعاً هذا بخصوص الرجل المتزوج))

؛

,

أما بالنسبه للشباب العزابي
لا تعــــــــــــــــــليق !!
الكلام يطــــــــــــــــــــــــوووول في هذا !!


آسفييييين على الخطمه ...

[الطاحونة]

امرؤ القيس...
طيب ممكن سؤال بخصوص خروج اصدقائك باستراحة
س / ما أسباب خروجهم وانعزالهم باستراحة خاصة عنك...؟؟!!
هل بسبب لسانك وطباعك التي نراها في ردودك...!!!
أرجو أن تتقبلهم في الانضمام من جديد وتفتش في نفسك وتتهمها...


سيووووووووووووووووو

[قرناس]

[align=center]

قيل في المثل


(( من احب شيئاً اكثر من ذكره ))[/align]

[جليدان]

[align=center]أخي الغالي امرؤالقيس
كل عام وأنت بألف خير
ربما من الصعوبة الحكم على استراحتهم وهي التي لم يمض
على افتتاحها سوى أشهر ..
وحتى الإستراحة الأولى هل أصبحت بهذه المكانة
وهذا الحضور من شهر أو شهرين ؟؟!!
أخي ابو عدي
نحن كأعضاء نحضر هنا وهناك ولا يهمنا سوى من
يدير الجلسة والإستراحة بكفاءة ولمن يحفظ لكل عضو
في الاستراحة مكانته ورأيه بعيداً عن
(ما أريكم إلا ما أرى )
أو
(إن لم تكن معي فأنت ضدي وارحل غير مأسوف عليك)
فبما أنه فتح الاستراحة للجميع لذلك عليه أن يحفظ
توازنها ونقاشاتها
وحتى القسم النسائي عليه الحفاظ عليه ومتابعته
لا إهماله بحجة أن الباب مفتوح
وعليه المحاولة بإغلاق جميع المنافذ المطلة عليه من قبل
ضعاف النفوس من رواد الاستراحة ..
خلاصة الكلام
لا يمكن الحكم من شهر أو شهرين أو حتى سنة فمن
سيدير الاستراحة بفن وحكمة هو من سيكسب الرهان
وسيظطر الآخر لشراء الداتسون ...

لعلي أكون وفقت في فهم ماترمي إليه ....
تقبل تحياتي[/align]

[The Free Man]

الإستراحة اصبحت جزء من حياتي

ولازم يومياً اروح لها

لو فيها مافيها

اعتقد اني بواجه مشكلة كبيرة بعد الزواج



الله يعين





بيس

[ملاك الحبر]

مرحباً:
احلى شيء سمعته عن الاستراحات هي الجمعه كل اسبوعين مثلا التي يقوم بها شخص او شخصان
يعني مافيه اسراف بطلعة الإستراحة فقط مرة للعائلة ومرة للشباب ..

تحيتي

[xmax7]

هلا أخوي ابو عدي

والله جمعة الإستراحة حلوه خاصة بوجودك

لكن الحضور للأستراحة في وقت الفراغ يكون أحسن

لوخلاكم احد من استراحتكم وبغى يرجع هل تفرحون فيه ام برضه لا ؟
على حسب الوجه

[قلب الأسد]

حلوه ددسن غمارتين بس يمكن اللي طلعو ملو من شي بس اتوقع بيرجعون لأن الاستراحه
الاصليه هي التي تبقى اساس ,,لاتستعجل يرجعون انشاء الله واذا رجعو الله يحيهم لأنهم
رجعو لأستراحتهم الاصليه ,,
شكرا القيس,ودمت بود

[امرؤ القيس]

اقتباس: قيل في المثل (( من احب شيئاً اكثر من ذكره ))

ماعليش اخي قرناس

المثل عليه كثير من الملاحظات ولا ينطبق على شلتنا ياعزيزي

اقتباس: امرؤ القيس... طيب ممكن سؤال بخصوص خروج اصدقائك باستراحة س / ما أسباب خروجهم وانعزالهم باستراحة خاصة عنك...؟؟!! هل بسبب لسانك وطباعك التي نراها في ردودك...!!!

اصلا انا ما اسولف الا على اللي بجنبي ولا لي شغل باحد

واذا لساني مو عاجبك انصحني ولا تفضحني