معلمات الحاسب يطلبنكم الحل .. تعازيكم هنا ..

[الذاهبة]

[align=center][/align]

[align=center]بسم الله الرحمن الرحيم [/align]

أحبتي .. لله ما أخذ و لله ما ترك .. و لله دركن يا معلمات الحاسب ..
قصة اليوم قصة مؤلمة .. بجميع تفاصيلها واقعية بكل أبطالها .. لن اطيل عليكم .. تابعوا وقائع القصة و استمتعوا بأحداثها ..

المشهد الأول : في رحاب الجامعة .. تحت المظلات أول طاولة على اليمين .. قروب الدلوعات ..

أميرة : يا الله يابنات .. ماني مصدقة نفسي .. معقولة حنا بنتخرج بعد شهر و ثلاثة أيام بالضبط .. !
منال : أقول ، خليك بس بمشروع التخرج ليته يخلص على خير .. والله غثونا بهالمشاريع اللي ما تخلص .. و المواد اللي ما تخش الراس إلا بالواسطات ..
أميرة : ياحبيبتي .. هونيها و تهون .. و كلش يهون عند هاك الدكتور الحقنة .. اللي ما عنده غير التريقة علينا .. أجل حنا نوازي بالأفق سنة رابع ابتدائي .. !؟ حسبي الله عليك من طعمية ..!
منال : عاد تتوقعين لامن تخرجنا على خير ان شاء الله يارب و حنا على قيد الحياة و فينا روح .. بعد هالعذاب .. وين نبي نتعين ؟؟
أميرة : نعم ؟! يا ماما فتحي عيونك .. ترى حنا ( بكالوريوس علوم حاسب آلي ) عرفتي ؟! يعني الله يعيننا على تقطيع العالم لنا .. كلن يبي يقول لنا
تعالن توظفن عندنا .. بالرواتب و المغريات اللي تبون .. !!
منال : ياهوووووو .. يعني أتخير من الحين ؟ ممممممم والله مالي خلق وظائف مختلطة .. أبي اتوظف بشركة قسم حريمي .. و أبي دوامي العصر بس .. مممممم براتب عشرة آلاف ريال ..
أميرة : تأملي اللي تبين يا حياتي .. ترى حنا غير ..! " مثل جدة غير ..!" هههههههاي

براءة .. أحلام العصافير .. تفاؤل .. بلا حدود .. هه !

المشهد الثاني : بعد فترة تزيد عن السنة بشهرين .. و بعدما نسيت أغلب الخريجات أساسيات البرمجة .. و أقتربت أشكالهن من الدحرجة .. هاهي الحياة تنبض في عروقهن .. من جديد :

أميرة : آلوووووووووووه
منال : هالا و الله و غالااا .. يا دبة يا شينة يا القطوع .. !
أميرة : شفتي المهزلة ؟
منال : أعوذ بالله ! الواحد يسلم بالأول .. يسأل كيف الحال .. كيف الطبخات كيف الطفش .. كيف نوم النهار و سربتة الليل .. وش بك كذا تقول
كابخٍ عليك بس أجرب .. ؟!! هاهاهاها
أميرة : يالدلخة .. مانيب فاضية لمصالتك .. شفتي الديوان فتح .. و طارحين وظائف ( معلمات ) للحاسب .. تدرين كم طالبين ؟
منال : كم ؟ و متى ؟ و وين التقديم ؟ و ليه طيب كذا تدريس ( بس ! ) يا كسلي ..!
أميرة : طالبين 13 معلمة بس ..! و سبع منهن بقرى خارج المنطقة .. و دفعتنا تذكرين كم طالبة ؟ أكثر من 70 خريجة .. دفعتنا بس ! و التعيين بالأفضلية طبعاً ..
منال : أجل نلحق نقدم .. أو فاتنا التقديم ؟ يالله مو مشكلة .. باكر بقدم على شركة أو مؤسسة أو دائرة أو مربع أو أي شيء ، بس اهم شيء حكومي .. الله يعز الحكومة .. و تعرفين الدنيا مالها أمان يخيتي ..
أميرة : الله يرحم ضعفك !!! أقول : كملي نوم و احلمي .. و مالك إلا اللي يبشرك لا فتحت هالمجالات اللي تقولين ..
منال : هاهاهاهاها ، تيب صدقيني يا أميرة بيجي يوم و تعذرين من ( عمتك ) منال ..

المشهد الثالث : تعينت أميرة أبشكركم ، و منال .. مازالت تقشر بصل و تطحن قهوة .. أميرة تردد يومياً على قريتها .. اللي تبعد 120 كم عن بيتهم .. القرية هادئة و جوها ممتاز .. و مليئة بالآثار .. و الغزلان بعد .. ! تذكرون تخصص أميرة ؟ حاسب آلي صحيح ؟!
لكن نظراً لأن القرية مافيها معامل حاسوب و أهل القرية لم يؤمنوا بماهية الكمبيوطر و أهميته .. بقيت المعلمة بلا مادة تدرسها .. بعد فترة .. اختاروا لها مادة الرياضيات .. أخت الحاسب .. ولا أنا غلطانة ؟! هه !

أميرة : صباح الخيرات و النورات .. و الله يانا تعبانة و بادية اخبط .. واو أعتقد أحتاج فورمات ..! هاهاها
معلمة 1 : تيش !! يعنني عاد ؟! ترى مادتكم خرطي .. حاسب غير رسمي .. ولا لكن أهمية بس تضييق علينا .. و ترى أبي آخذ حصصك .. مالك حاجة ..
أميرة : خذي اللي تبين .. و الله يخلي لك تخصصك .. اللي ما يتغير و لا يتبدل و يعشعش بالمخ .. !
معلمة 2 : أقول يا عمري ، تقدرين تكتبين لي بالكمبيوتر ؟ ما اعرف له و زوجي يمنعني أكتب بحقوه .. أبي دعايات لحفل المصلى .. و أبيك تجيبين لي بروجكتر و تشغلينه .. ميخاليف ؟؟
أميرة : أبشري يا غلاي .. من عيوني .. * و بقلبها تقول : يلعن يومك بلى أنا وين و هالمجاملات وين *
المديرة : أميرة اسمعيني ، بما أنك ماعندك معمل ، و لا تدرسين مادتك الأم ( يخزي الثقافة بعد ! ) نبيك تمسكين بعض الأعمال الإدارية ، و لا ترى مالك مكان عندنا و نبي نقلعك ورا الشمس !! ( على بالها وزيرة التعليم و التربية و الترفيس ) ؟
أميرة : أبشري يا استاذة مستديرة .. أنتم تأمرون ما تطلبون ..
المديرة : خذي هذه لائحة أعمالك :
*تمسكين مادة الرياضيات كاملة شرحاً و جملةً و تفصيلاً
*تمسكين المقصف بيع و طلبيات و حسابات .. مو أنتي حاسب ؟ يعني تعرفين تحسبين قروس بدقة ..
*تمسكين برنامج معارف و ادخال درجات الطالبات و بياناتهم
*تسوين لنا احصائيات شاملة للمدرسة و المباني و الأجهزة و الرؤوس
*تمسكين البريد الإلكتروني و أنت المسئولة عن الوارد و الصادر
*تعملين لنا منشورات و مطويات كلما احتجنا الى ذلك ..
* تسوين لنا الجدول بالكمبيوتر ما نبي شغل مطاريس ! و تسوين لنا تصميم للمجلدات و الملفات حقت الإدارة ..
* تطلعين ندب .. نعم ندب لمدرسة في منطقة أخرى قريبة من مدرستنا و به معمل حاسب يالله افرحي .. و انا بصراحة أشوف انه من مصلحة العمل أنك تطلعين ندب لمدرستين بعد .. أنتي بصراحة مدلعة و ماعندك شيء تزينينه ..
* أنت مسئولة عن جميع الاجهزة بالمدرسة .. و آلات التصوير و مسئولة عن اصلاح المعطوب منها ..
*مممممممم وقت الفراغ تقدرين تطلعين فوق تلعبين البزارين ... عيالنا تضيق صدورهم من الهندية بالحضانة ..
أكيد موافقة على كل ماسبق ..
أميرة : بس يا استاذة أنــ..
المديرة : يالله بس أكتبي علم معلمة الحاسب ،
أميرة : حاضر ، بس ماودك أسوي شي يسوى ؟ كل ما ذكر لعب بزارين .. ما اشوف أي كرف ؟!

المشهد الأخير : بعد مرور أشهر و سنوات و الحال كما هو الحال .. أميرة الحبوبة اللطيفة العبقرية .. على آخر حياتها .. شغالة بالبران .. !!
كان وزنها فوق الستين .. بعد شهر من الدوام خفضت 30 كغ .. و الله ريجيم طيب !
راقبوا معي أحبتي آخر مشهد و آخر لحظات حياة تلك الاميرة .. التي لم تتعدى العتبة الاولى من الحياة ..
دارت هذه الأحاديث بينها و بين زميلاتها .. من بنات تلك القرية التي تدرس فيها ..

أميرة : الله .. ما بقى غير اسبوع و نعطل .. !! يارب تمم على خير ..
سفطة : أميرأ .. يا سفابس .. صز أنتي مقدمة نقل ؟!
عفطة : لااااا .. ما تسوينها يا أميرأ ... تكفين قولي لأ ما قدمت و مانيب ..
أميرة : هاهاهاها .. يا حبي لكم بعد .. وش تبوني أزين بذا البران ؟ أوووه قصدي هي مدينة تجنن .. بس ودي أقرب لم بيتنا و أشبع من شوفة اهلي ..
و بعدين وراي زواج و بيت بعد .. ! أدعوا لي بالتيسير ..
شفطة : الله يوفقس .. و تاخذين اللي يستاهلس .. و أنا عقبس .. ياااارب زوجني .. !
الجميع : هاهاهاهاهاها

و في هذه اللحظات .. فارقت أميرة الحياة .. قد تكون عين قوية أصابتها من صاحبتها شفطة .. حسبنا الله عليها .. أو قد تكون ماتت من القهر .. أو قد تكون ماتت من التعب .. أو أنها ماتت .. و بلا سبب .. !
الله وحده العالم .. رحمك الله يا أميرة ...

[align=center]أناشدكم .. يامن في قلوبكم ذرة من رحمة .. ارحموا من في الأرض .. يرحمكم ربكم في السماء .. معلمات الحاسب .. حسرة و ألم
نرجو إعادة النظر في أوضاعنا .. رسموا مادتنا ..أكملوا معاملنا .. قدرونا .. قننوا أعمالنا .. نحن مبرمجات لسنا طقاقات
ولسنا حاضنات أو كاتبات و مراقبات .. ! ولا يهون الجميع ..
بس ربكم خلق و فرق .. و لكل مجتهد نصيب .. [/align]

@ صورة مع التحية للمسئولين من وزراء و رؤساء و مدراء
@ صورة لمكتب المومياءات أو المشرفات التربويات
@ صورة للديناصورات أو مديرات المدارس
@ صورة للشغالات الأندونيسيات و الفلبينيات .. أو المعلمات

[align=left]القصة من نسج خيالي .. أرجو عدم التأثر بقوة ![/align]