تـحـذيـر صـحـي : الـمـوضـوع طـويـل , ويضر بصحتك , ننصحك بالامتناع عنه !
أحداث هذي الروايه حقيقيه , لكن مع بعض التغيرات اللا منهجيه , وقد حدثت في مدينة عفارم عليك في حي شلبيه النمراوي
شارع خمس طعشر شئة ميتين وخمسين على يدك الشمال , وهي تحكي قصة عن شاب وسيم في مقتبل عمره يدعى حنفي
كان طويلا , عريض المنكبين , أسمرا مشربا باللون النفسجي ضارب الى الخضره , لديه القدره الهائله في الاقناع والتهرب
من المسؤوليات , وهو يعمل في أحد الدوائر الحكوميه براتب معقول , ويعيش مع أمه وأبيه و أخواته الثلاث .......
فتعالوا للنتعرف على قصته :
دخل حنفي الى البيت عند الساعه 2ونص – كالعادة - , واتجه مباشرة الى غرفته , وطب سباحه الى منامه بالشماغ والزبيريات
في هذا الاثناء فتحت أمه الباب – كالعادة - , وسألت : ماتبي تتغدى ؟؟؟
فالتفت عليها حنفي وهومغمض عيونه , وقال : هـاه , لالا ما أبي , بقوا لي اذا قمت أكله ....
واستقيض حنفي – كالعادة - على صراخ أبوه : ليش ماصليت العصر بالمسجد فشلتنا عند الجماعة , قسمن بالله
لا ...... ,,, فقام حنفي وهو مبرطم : ( ألعن أم الحالة , ماصارت ماخلانا هالشايب ننام , أذانا , بس ميب الشرهه
عليه الشرهه علي جالس ومقابله .....) .
وبعد صلاة المغرب شغل حنفي سيارته – كالعادة - واتجه الى اخوياه سهر لوجه الفجر , وعند الفجر يرجع
وقد تورمت شفايفه من الشيشه وطق راسه منها , واحمرت عيناه من مقابل الدشوش , ثم يطب سكيتي في منامه
ولا يستيقظ إلا بعد ماتطلع الساعه مصارينها من كثر ماترن وتترجاه بس يطفيها وإلا طقاق يطقه لايروح للدوام ...
هذا هو روتين حنفي اليومي , روتين ممل ومكرر يومه زي شهره وشهره زي سنته وسنته زي عمره اللي مضى
منه ثلاثين سنه من الدجه والفشل اللامحدود .................... لكن هناك جزئيه مهمه في روتينه وهو
مهم لدى حنفي لم يتم التطرق اليه إلا وهو :
في كل يوم جمعه عصرا يقف حنفي عند الشباك ويراقب بنت الجيران ( نبويه ) وهي تغسل حوشهم مع أختها
الصغيرة , وكان حنفي يستلذ بمشاهدة نبويه وقد شمرت عن رجلينها وايدينها وتنظف وتعمل بكل جد خوفا
من الهيد مارستر ( أمها ) , وكان يستمع لكل مايدور بينها وبين اختها الصغيره من هواش ونقاشات وسوالف
خاصه وعامه , وافضل جزئيه عند حنفي لما يجون اخوان نبويه الصغار ويوصخون المكان للي توها كارفه
فيه , عندئذ تبدأ نبويه بملاحقتهم ولعن سلسفيلهم ويتاقذفون المعايير ألف مره بالدقيقه ...
لما يكن يعرف حنفي مدى أهمية هذا الجزء إلا عندما انقطعت نبويه في أحد الجمعات عن الخروج ,
عندها تعجب حنفي ودار في دميجته ألف فكرة وفكرة عن سبب التغيب المفاجأ لنبويه , وبعد تفكير دام
عدة قرون بلياليهن توصل الفطين بالحيل انه هذي ايام اختبارات واكيد جالسه تذاكر مو فاضيه للحوش
وبعد ما خلصت الاختبارات ( رجعت ريما لعادتها القديمه ) تغسل الحوش كل جمعة , وقد فرح حنفي
بهذا العوده .
خلاص خلصت القصه , وش تنتظرون ؟؟؟؟؟!!!!!!!!!!!!!
لاعاد امزح تونا
وفي احد الايام , واثناء خروج حنفي من بيتهم , شاهد حركه غير معهوده في بيت اهل نبويه فهم يستعدون
للخروج وهم لابسين افضل مالديهم ( ثوب شتوي رصاصي من بسطات العبدات + جزمه لماعه من محل
كل شىء بريالين ) , فتعجب حنفي لهذه الكشخه اللانمطيه , اقترب لمعرفة السبب من دافع – الفضول واللقافه
وحب الاستطلاع - , وسأل أصغر أخوان نبويه ( عشانه فضيحه ويخر المنخل ) : وش الكشخه هذي ؟؟
وين بترحون له ؟؟؟؟؟
عاد اخو نبويه ماصدق خبر أحد يسأله , فرد قائلا : نبي نروح لعرس بنت خال جدة بنت عم امي .....
فقال حنفي وهو فاتح خشته : آه فهمت , ووين عرسها فيه ؟؟
فرد الولد : مهوب هنا عند ديرة جدتي !!
فقاطعه حنفي قائلا : ومتى تبي ترجعون ؟؟
فقال له والولد : نبي نحضر العرس وثمن نروح لمزرعه جدتي ونرجع بعد يومين .
وأثناء هذا التحقيق سمع حنفي صوتا مدويا , ( يـــــــا حـــنــفـــي )
فرجع الى البيت وقد تغيرت ملامح خشته وطق العرق اللي بجبهته , وهو يقول : خير انشاالله وش جاتس
تزعقين فشيلتينا قدام الجيران كانك طقاقه ؟؟!!!
فقالت امه : وش اسوي ابي أمتسنك قبل لاتروح وتخلينا ......
فقاطعها قائلا : ايه وش تبين اخلصي , مو فاضي للقرق ( احلى يالبزنس اللي مقطع بعضه )
فقالت : ابيك تودينا بيت أمي ابي اجلس عندها انا وخواتك دام ابوك مسافر , وانت ماتجلس بالبيت ....
فقال : خلي الشايب يوديكن , مو فاضي لكم
فقالت : اقولك ابوك مسافر !!!! ومافيه غيرك
قال : معصي مافيه روحه .
فقالت : خلاص بنروح على تاكسي . ( هنا الام ضربت على الوتر الحساس )
فقال : خلاص , خلاص , ابنتظركن بالسياره خمس دقايق اذا مايجتو مافيه روحه ( العم يهدد !!! )
وفي السياره , قال حنفي : شفتي جارنا بيسافر وياخذ عياله ومرته مو زي ابوي يهج بلحاله ويتركن نشبين
في حلقي !!!!!
فقاطعته الاخته الصغيرة وهي تقول : لا مهب كلهم , نبويه تقول ........ وفجأة سكتت البنت بسبب قرصه
تلقتها من اختها الكبرى لاسكاتها
فقال حنفي : ايه كملي ؟؟؟
فقاطعته امه قائله : ايه الله يوصلهم بالسلامه وش علينا منهم الاجواد ...............
وصل حنفي اهله وراح لربعه , وحينما وصل تذكر حنفي انه نسي الشريط بالبيت , وعلى هذا عاد حنفي
وصعد الى غرفته لاحضاره وبينما هو في هذا , سمع اصواتا في بيت نبويه , فلما فتح شباكه لمح
ظل شخص يمشي في المطبخ , فتاكد حنفي بوجود حراميه يسرقون منزل الحبيبه .......
عندئذ احمر وجهه غضبا وقرر ان يقبض عليهم بالجرم المشهود , فاخذ العجره من سيارته وطب على
بيت نبويه وهو في قمة الحماس لمواجهة الاشرار والدفاع عن اراضي الوطن هذا وقد كان في استقباله حفظه الله
وزير الدفاع .......
عفوا , خطأ مطبعي !!
نكمل : وعندما اقترب من شباك المطبخ ليرى الحرامي عن كثب واذا به يسمع صوتا عذبا يقول :
وانا المولع على ناااااري هييييييييه بعد المحبه والموده صرتو ............
فلم يتمالك حنفي نفسه لان هذا الصوت صوت نبويه وهي تغني اغنيتها المفضله اثناء صنعها للاكل
فجلس ليستمع لصوتها ويراقبها وهي تاكل ..... , وفي هذا الوقت رن جوال حنفي , فختبص حنفي
وسقطت العجرة من يده وأقفله , ولكن نبويه سمعت هذي الاصوات وتجمدت في مكانها من الرعب
ثم قالت وهي تستجمع كل قواها : مين اللي هنا ؟؟؟؟؟؟؟؟؟؟
فلم يعلم حنفي مايصنع هل يخبرها بالحقيقه ام يهرب ويتركها مرعوبه وحدها !!!!!
فقرر وقال : انا حنفي ولد أبو حنفي , انااااااااااااا كنت ,,,,, اناااااا طبيت هنا لما سمعت اصوات بالبيت
وانا شايفن الاهل مسافرين العصر !!!!
فأخذت نبويه نفسا عميقا ( بس مو شيشه ) وقالت : ايه سافرو كلهم ومابقى بالبيت غيري .
فقال حنفي : وليه مارحتي معهم ؟
ولكن نبويه اكتفت بالصمت
فستطرد حنفي قائلا : ليه جالستن بلحالتس ماتخافين ؟؟
عندها قالت : ابوي مانعن اسافر معهم , ومقفله علي البيت يعني محد يقدر يدخله !!!
فقاطعها قائلا : وليه مانعتس ؟
فقالت بتردد : لاني راسبه بمادتين .
فتبسم حنفي وقال ((بقلبه)) : ( ياليتس كل مره ترسبين عشان تجلسين بالبيت ولا انحرم من هالصوت ).
ثم قال (( عاد هالمره مو بقلبه )) طيب لو صار شىء او احتجتي شىء وش تسوين ؟؟
قالت : اكلم على خالي يجي معه مفاتيح لبيتنا .
ففكر بخبث ثم قال : تبين اجيب لتس عشاء , شكلي خربت عليتس عشاتس ؟؟!
قالت وهي مستحيه : لا شكرا ..
ثم قال : لا عادي مابينا شىء يانبويه احنا جيران , واذا محتاجه أي شىء دقي علي وانا اكون عندتس
فلم يسمع أي رد , لان البنت مستحيييييه
فكتب رقمه على ورقه ثم كتب (( المولع حنفي )) , ثم وضعها على الشباك وعاد من حيثو اتى , وجلس
مع اصحابه وهو شارد الذهن ويراقب جواله ,, متى تدق نبويه !!!!!! , وطال الانتظار وطلع الفجر وعاد
حنفي الى البيت وسحبها نومه للظهر , فلما استيقض اخذ جواله لينظر هل نبويه دقت وإلا لا , فلم يجد مايأمله
ففكر حنفي وقلبها يمينا وشمالا , كيف يخلي نبويه تكلمه ؟؟؟!!
فخطرت له ان يشتغل لها بالازرق ثم اخذ رقم اهل نبويه , وكلم عليها , ولما ردت , قال : انا خفت انه مافيه
بيتكم صفر فما تقدرين تكلمين علي لو صار شىء ؟؟
قالت : ايه مافيه صفر ؟؟؟
قال : وليش ماقلتيلي البارح ؟؟؟ طيب مو مشكله انا بدق عليتس كل شوي عشان اطمئن .
قالت نبويه : خلاص ....
وطالت المكالمه واستمر حنفي بالتقرب من نبويه بكل كلمه اعجاب يعرفها , حتى خلها تخش جووو
و اثناء المكالمه اقترح حنفي على نبويه ان يخرجو ليتعشون سوا ,,, لكن نبويه خافت وقالت : لا .
ثم اقترح عليها ان يحضر العشاء للبيت وان يتعشون سويا , واقنعها انها فكرة ناجحه
فوافقت نبويه والفرحه مش سيعاها , ثم ذهبت لتلبس احسن ماعندها وترتب البيت وتستعد لاستقبال
حنفي , وفعلا قفز حنفي الجدار مثل القط ومعه العشاء , وتعشى الاثنان عشاء رومنسيا , وبعد العشاء
قال حنفي : بروح للبيت خمس دقايق وارجع ( بيروح ياخذ له كم سيجاره عشان يررروق )
واثناء ماكان حنفي على الجدار ليقفز على بيتهم , واذا به يسمع صوت رجل كبير في السن قد دخل في
منزل نبويه وهو ينادي : نبويه , نبويه ؟؟
فعلم حنفي انه خال نبويه , وانه جاء ليطمئن عليها , فحط حنفي رجله ولا رده إلا استراحه ربعه
ولكن ماذا حصل لنبويه ؟؟!!
حينما دخل خالها كانت تظنه حنفي قد عاد , فقالت : رجعت بسرعه !!!
ولكن فوجئت بخالها واقف وعيونه طالعه من دميجته !!!
ليه نبويه لابسه وكاشخه ومن جايب هالعشاء !!! ومن تقصد بكلامها رجعت بسرعه !!!!!!!
( عذرا تم حذف هذا المشهد من الرقابه لما يحمل من الرعب والتعذيب !!!! )
فعترفت نبويه بكل ماحصل , فتجه الخال لمنزل حنفي والشياطين بتنطط اداموه , ورن الجرس واحرقه من الرن
ولكن محد يرد , ولما سأل احد الماره عن اهل البيت قال : ابو حنفي مسافر له كم يوم واهله عند اقاربهم !!!
فعاد وهو مكذب لروايه نبويه .... ثم جر نبويه بشعرها لبيته لحد مايجي ابوها يعرف الفضيحه اللي صارت
ولما عاد ابو نبويه , واتبع نفس اسلوب الخال في الاستجواب لم يحصل إلا على نفس الحكايه !!!
فقرر ابو نبويه والخال الذهاب الى حنفي بانفسهم ليسألوه !!
لكن حنفي لما رأى اهل نبويه واقفين قدامه والنار طالعه من عيونهم , خاف و أنكر انه لا علم له باي شىء !!!
وبهذا تم تزويج نبويه لاقرب خاطب تقدم لها ( حتى لو كان مهوب زين المهم شىء يداري اللي صار )
وعاش حنفي يتحسر على انكاره , وخسارته حبيبته التي لم تفارق خياله لحظه واحده ..........
************************************************** **************************
معاني الكلمات
-------------------------------------------------------------------------------------------------------------
| الـكـلمه | مــعــنــاهــا
|-------------------------------------------------------------------------------------------------------------
| الزبيريات | هي نوع من الشبشب الرجالي المطرز , وهي من تصميم ارماني !!
| |
| شمرت | بمعنى اظهرت المستخبي
| |
| المعايير | مفردها معياره وهي لقب خاص يحمل وصفا بشعا للمعّير , مثل ( أبو شوشه – الحول – العبد ..)
| |
| دميجته | قيل أن اصل الكلمه اسباني , وهي بمعنى الراس أو مايحويه من فتات مخ !!
| |
| يخرالمنخل | أي بمعنى يقول الاول والتالي مايبقي عنده شىء
| |
| أمتسنك | أي ألحق عليك
| |
| الاجواد | هي جمع جواد يعني جواد العلي أس عشره
| |
| الشريط | ( الوصول الى هذه المعنى غير مسموح فيه !!! )
| |
| العجره | نوع من العصي اللي لوتطق فيها الكافر أسلم , وغالبا مايضعها الشباب في سيارتهم للمضاربات !!
----------------------------------------------------------------------------------------------------------------
أجيبـ/ي على الاسئله التاليه :
س1 : ما اسم الطقاقه اللي تطق بالعرس اللي راحو له اهل نبويه ؟
س2 : الى أي مدينه سافر أبو حنفي ؟ وماسبب سفره ؟
س3 : اذكر/ي نوع جوال حنفي ( اللون والموديل ونغمه الرنيين ) ؟
س4 : ماهي المادتيين اللي رسبت فيهم نبويه ؟
س5 : اذكر/ي ما استفدته من القصة ؟
************************************************** *****************************
ملاحظات عامة :
1) ليه فيه ناس يخلون النظافه ليوم الجمعه بالتحديد , لو ايش مايصير بالبيت مايتنظف إلا يوم الجمعه !!
2) ليه فيه ناس تعاقب أبنائها بأسلوب خاطىء وهو الحرمان , وكأنها تتجاهل أن الحرمان يولد الانحراف !
3) ليه فيه ناس تستهين بترك بناتهم بالبيت وتظن أن هذا الحل بحق البنت (( الحجر )) , هل بظنهم يحمونها ؟
4) ليه اذا الشاب حب بنت مايوصل لها بالحلال ؟؟ ليه اللف والدوران !!
5) ليه البنت تصدق أي كلام منسق وجميل ؟؟؟ , هل هي فاقده لهذا الاسلوب من اهلها !!
6) ليه فيه اهل مايتفهمون مشاكل أولادهم ويعالجون خطأ أولادهم بحياة زوجيه فاشله وتعيسه !!
العرض العادي
