ليلى زعزوع و حقوق المرأة

[الأسترليني]

لقد اتاني المقال التالي على الايميل وهو منسوب للدكتورة ليلى زعزوع ..

و لأن الايميلات لا تمثل لي مصدر موثوق ذهبت و بحثت و بعد جهد في البحث عن هذا المقال على النت وجدت الايميل صحيح و كاتبته معروفه ..

حقيقة الايميل قديم و قد كتب في عام 2007 و لكنه مقال كتب باللهجة الحجازية و بأسلوب ساخر رأيت من المناسب أن تطلعون عليه و تستمتعوا بقراءته ..


طبعا المقال كتب برؤية ليلى و لم يكتب برؤية الاسترليني ..!!

المقال احتوى على مغازي لمن اراد أن يتدبر ..

طبعا لمن لا يعرف ليلى فهي تكتب و تطلب مشاركة المرأة في كثير من المجالات و لكن مع ذلك كتبت هذا المقال ..!!

لم اتعرف على ليلى إلا بعد بحثي هذا ..!!

حقوق المرأة …
الجميله

‏باللهجه الحجازيه

ما يرفع ضغطي شَي زَي كلمة حقوق المرأة .. وبالذات في السعودية .وهادي المشكلة طلعت متى؟ بعد 11 سبتمبر … سبحان الله .. يعني كانوا من ألف وأربعمية سنه نايمين .. وفجأة كده صحيوا وقالوا: وه ياندامة .. إيش هادا؟ أتْـرِنُّو إحنا لنا حقوق؟! مادام كده … الإنتخابات البلدية ليه ما نشارك فيها؟ وليه ما نروح هناك ونرقع بالصوت؟
يا أختي حلال عليكم البلدية كلها .. يعني إيش تبغوا تسووا؟ تحطوا ضوابط إصدار الرخص لمحلات الحلاقة مثلا؟ والا تناقشوا سفلتة الشارع اللي يودي على بيت أم إبتسام؟ والا ليه الشارع الفلاني ما فيه كوفيرة مغربية وكل اللي فيه مصريات؟ يا أختي ريِّحي راسك .. اذا كثير من الرجال ما سوُّوا حاجه … بالله عليكي حتسيبي بيتك وعيالك وشغلك … عشان تناقشي مشروع إنتخابي؟ هادا من تمام الفضاوه.
طيب قولوا لوحْدَه زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها .. إيش يكون
أما عن حقوق المرأة في السعودية .. فياسيدي الست هنا لها حقوق وواجبات ما تتنازل عنها. مثلا: في بلدان كثير عربيه وأوروبيه تلاقي شحط طويل عريض جالس في الباص ..وقدامه وحده في الشهر التاسع واقفه على رجولها وشايله طفل تاني على كتفها … إن الشحط يتحرك؟ .. أبدا…إن الثور يحس؟ ……لايمكن. لكن هل يمكن يحصل هادا في السعودية؟ أبدا .. واللي يبغى يجرب …. الطريق قدامو …. يا عمي العملية كلها دلع حريم في دلع حريم .. رايح أعطيكم بعض الأمثلة وقولوا لي مين اللي آخِد حقُّو بالكامل وزياده؟ وهل عندنا المرأة متساوية مع الرجل .. والا هي أحسن مِنُّو؟

قال حقوق المرأة .. قال.

منظر عام

رجال محترمين زي الورد واقفين أمام صراف في بنك .. وتِجي أختنا في الله (اللي يقولو إنها مهضومة الحقوق) تتقدم للصراف مباشرة ولا على بالها من الطراطير اللي واقفين من ساعات .. وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي… وثلاثين باكستاني… وخمسين سعودي… واثنين معقبين معاهم شوية فواتير مقاس إكس لارج .. وإذا أحد كلمها وقال لها أتفضلي يا أختي ترد عليه وتقول: لا، معليش. المرأة زَيّ الرجال …. خليني في الطابور … زَيِّي زيكم؟! …. ليش ما تقول كده؟! … والا هي تماحيك وبَس! ونفس المنظر في الجوازات … والأحوال .. والتأمينات .. ويقدر أحد … يقول إنه من ظهر أبوه …. يفتح فمُّه؟ … على طول يسمع العبارة الشهيرة .. ( عيب عليك … إنت ما تستحي؟ .. هذه حرمة…إنت ما عندك أهل!)) ..ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب؟
قال حقوق المرأة … هه!

اقتصاديا

شوف الراجل… السبع… الغضنفر… المفتري…له ثوبين أو ثلاثة في السنة .. يروح بها العمل، ويحضر بها عزايم وزواجات، ويقابل بها كبار المسؤولين، الخ، الخ، الخ. والمرأة بسلامتها .. بقيمة أدوات مكياجها فقط… تقدر تفتح محل خياطة رجالي محترم. ويا ريت تحط من مكياجها في البيت .. لأ. دا بَس للخروج … وقيمة صباع روج والا علبة بودره تساوي قيمة جوال جوزها … وكمان ازيدك من الشعر قصر .. مو بيت … من حقوقها فستان لكل فرح… و مكياج… و كوفيرة…وجزمة ….وشنطه. وكمان خُدوا هادي …. سابع بنت عمي …. ملكة أخت جارتنا .. ولازم هديه … واللطخ يدفع ….. مو مهم الفلوس جات من فين … المهم يدفع … والدنيا ممكن تنقلب على الراجل واللي خَلَّفوه علشان موضوع (مهم وحيوي) زي كده …

قال إيه! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم، ولا يبقى جلف وإبن ستين في سبعين. ويعني إيه عنده مشاكل في العمل؟! والا أقساط متأخره؟! والا فواتير؟! والا مقاضي ما يعرف كيف يجيبها؟! مو مهم .. واجب عليه إنه يرجع من العمل للبيت مروِّق ومبسوط وبَس .. كإنه كان في شرم الشيخ مصيف مع نانسي عجرم .. ((مجرد مثل .. تف .. بره وبعيد)) …. والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك ( لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره … جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه … … … … ومع هادا كُّلو ..لازم يبقى رومانسي.
بينما هي وبكل سهولة تصحى بسلامتها في الضُّهر…وتجد الكارثة الكبرى….يوه …ما عندنا صلصه…وبكل رقة تتصل…ألو ألو ..أبو خالد موجود؟ ممكن أكلمه لو سمحت؟ ألو .. إيوه… أنا .. حتكون مين يعني؟… المهم … جيب معاك غدا … ماهو إنت يا فالح نسيت تجيب صلصه معاك أمس. ولإنه موفاضي.. و قرفان من العمل.. يصدق المسكين إنه هو إللي نسي ويقول بكل شجاعة ….. طيب.
وفوق هذا كله آخر السنه: طفشانه ….فين حتودينا …والله بنت خالتي راحت أمريكا .. وبنت عمي ما تصيف إلا فْ أوروبا… يا عيني علينا إللي ما نروح غير يا مصر … يا سوريا … والسنة اللي غيَّرنا فيها … رحنا ماليزيا.
وفي رمضان: تعبت …أوف ….إنت داري عن حاجه؟ أنا أبغى خدامة… أنا خلااااااااص .. ومن ثالث يوم رمضان ….مقاضي العيد من جده …أختي جابت ملابس لها ولعيالها .. إيش أقولَّك بس … وخُد مشاوير لليييييييييييل … والراجل المسكين لما ينزل السوق مع مرته ما يقدر يشتري ولااااا شَي لنفسو، لأنو طول الوقت ماشي وراها من دكان لدكان، وشايل زنابيل إلين ما كتفو يتخلع. وهي تطالع فيه وهو يتطوَّح من ثقل الزنابيل .. ولا تقول لُو فزعه .. حتى لو بالكِدِب. وآخرتها بعد ما يرجع البيت تقول لو إنها لِسَّه ما أشترت ملابس العيد!!!!!! وإذا فكَّر ينزل السوق لحالو عشان يشتري شي لنفسو … على طول يكون مشبوه .. إيش ينزلك لوحدك وسط الحريم؟ .. طيب إنت مو كنت معايا في السوق .. أحد قال لك لا تشتري؟
قال إيه؟ .. حقوق المرأة.

شرعا

المرأة لها حظ من أبوها … وحظ من زوجها .. هادا غير أمها .. وأخوانها .. وأبناءها .. والراجل مطالب إنو هو اللي يصرف عليها مهما كان عندها فلوس.
وثانيا: الرجال لازم يروحوا للمسجد خمس مرات في اليوم .. جمع وجماعات .. حر وبرد .. ليل وصبح .. لازم يروحوا … بينما الست تصلي تحت المكيف .. في غرفتها .. وأجرها زي الرجال تماما …. ياعيني .. يا عيني .. والله الإسلام أعطاكم كتير …. وياريتو يِبان فيكم.

إجتماعيا

الست كل أسبوع تخرج عند صاحباتها وما ترجع إلا متأخره .. وطبعا جوزها هو اللي يوديها ويجيبها .. (يعني تبغاني أروح مع السواق في هادا الليل؟!) .. وسعادتها ما تبدأ تتمكيج وتسرح شعرها إلا بعد العِشا .. وكل شويه تقول :خلَّصت … وهي ما سوت شي لِسَّه … والراجل الغلبان جالس على أعصابو يستنيها تخلص .. أخيرا تقول لُو: وي! إنت ما نزلت السياره؟ .. وَي .. هيا عشان لا نتأخر. المسكين يجري في الدرج (عشان ما يأخرها) .. ويشغل السياره .. ويستَنِّي بسلامتها مو أقل من ربع ساعة حتى تشَرِّف .. وطبعا ممنوع يقول لها: (إيش أخَّرِك؟) والا يا ويلو .. وبعد ما يوصلها .. يستحيل يغتنم الفرصه ويروح هوَّ كمان لأصحابو إلين هي تخلص سهرتها .. (وَه! كيف تروح؟! ومين يقعد مع البزوره؟) .. والماكياج اللي حطتو للستات يتمسح نصو من الطريق .. والباقي بعد ما توصل البيت … يعني الرجَّال ما يلحق يشوف مِنُّو شي.
وإذا بعد شهر أو شهر ونص جات لو عزيمه في زواج … أو فكر يخرج ليله مع أصحابو .. وبلَّغها من بدري عشان ما ترتبط بموعد مع صاحباتها في نفس الليله وتخرب عليه .. (هو إنت ما تعرف تِقِر في البيت؟ كل ليله معزوم؟ شوفي يختي الراجل .. ما كإنُّو عندو بيت ولا بزوره)


لكن مع دا كُلُّو .. برضهم الستات أحيانا نحس إنهم غلبانين .. يمكن عشان قلبنا طيب!

يا زين الحجاز ليصار فيهم دم اصالة مع ريحة بداوة مع هبوب نجدية

[دِيم]

يسعدها ربي ..


كلامها ماعليه غبار ..

لكن جملتها الأخيرة تبين ليه مايعجبنا العجب .. ^_^

اقتباس: لكن مع دا كُلُّو .. برضهم الستات أحيانا نحس إنهم غلبانين .. يمكن عشان قلبنا طيب!

^^ ضلوع عوج

[مـ ــ ط ــ ـر]

’
’
’
باختصار.. هذه مثال للمرأة الواعية
وأنا معها في كل حرف قالته

شكرا لك أخي الاسترليني على هذا النقل الرائع

[اعقل خبله]

بعد مايرفع ضغطي زي مقولة ظل راجل ولا ظل حيطه
لان ماهو كل الرجال رجالات ولاكل الحيطان حيطات
ولا كل النساء نساءات يستحققن الحقوقات ههه

[ونة خفية]

اعقل خبله

اقتباس: ولا كل النساء نساءات يستحققن الحقوقات ههه

لديك خطأ نحوي فالنساء (النسوه) جمع لا مفرد لها من جنسها

[اعقل خبله]

اقتباس:  المشاركة الأصلية كتبت بواسطة ونة خفية     اعقل خبله لديك خطأ نحوي فالنساء (النسوه) جمع لا مفرد لها من جنسها

ياقلبي انتي خطأ متعمد لموازنة السجع ولزوم اللكع

[ونة خفية]

اقتباس:  المشاركة الأصلية كتبت بواسطة اعقل خبله     ياقلبي انتي خطأ متعمد لموازنة السجع ولزوم اللكع

آجل الشغلة سجع ولكاعة خخخ
بالتوفيق ياشاعرة المستقبل

[جبل السكر]

ياقدمك يااسترليني
هادا المقال نشر واشتهر بوقتها بأكتر من موقع عربي
تعجبني جدا كتابات ليلى (المكاويه) فهي غالبا ماتكتب للإسلام
وللإسلام فقط
وكانت طريقتها بسرد المشكله جدا جميله



تحيتي

[الأسترليني]

طبعا لو سألتوني ليش تعبت و انا ابحث كان قلت لكم ان المقال جاني و عنوانه يقول مقال لليلى عزوز ..!!

اقتباس:  المشاركة الأصلية كتبت بواسطة دِيم     يسعدها ربي .. كلامها ماعليه غبار ..

ديم ..

كلامها صار عليه غبار الشكوى لله ..



مطر ..

الشكر لك لقرائتك



اعقل خبله ..

صح لسانك



ونه خفيه ..

اعرفك لصار بفمك ماء



جبل سكر ..

حياك ربي و العتب عليك اللي المقال من زمان و لا جبتيه هوني

[الأسترليني]

الإسم:
الشريفة ليلى بنت صالح محمد زعزوع.
هاشمية من مواليد مكة المكرمة.

الوظيفة :
أستاذ دكتور ورئيسة قسم الجغرافيا بكلية الآداب والعلوم الإنسانية بجامعة الملك عبد العزيز سابقا، قسم الطالبات بجدة.

التخصص العام : الجغرافيا البشرية .

التخصص الدقيق : جغرافية اجتماعية (المشكلات من المنظور المكاني في المجتمع ).

اهتمامات علمية :
الجغرافية التاريخية ، جغرافية الحج ،المشكلات الاجتماعية، جغرافية الجريمة، جغرافية الحوادث المرورية، النقل، المرأة.

حضرت عدد من الندوات والمؤتمرات والدورات العلمية في داخل المملكة العربية السعودية وخارجها.

كاتبةصحفية . لها مساهمات إعلامية في عدد من المجلات والصحف والإذاعة.

لها عدد من الكتب و الأبحاث المنشورة في المجلات العلمية المتخصصة.

العضويات :
عضو مؤسس في جمعية الإعلام والاتصال في منطقة مكة المكرمة
عضو رابطة الجغرافيين الأمريكيين منذ عام 1988م
Association of American Geographers (AAG)
عضو الجمعية الجغرافية الملكية البريطانية منذ عام1986
Royal Geographical society, Institute Of British Geographers (IBG)
عضو الجمعية الجغرافية السعودية.
عضو شرف الجمعية السعودية للأنف والأذن والحنجرة.

[ونة خفية]

اقتباس: الإسم: الشريفة ليلى بنت صالح محمد زعزوع. هاشمية من مواليد مكة المكرمة.

سبحان الله شدني الأسم وماقبل الأسم (الشريفه ) أذن هي من آل بيت الحبيب محمد صلى الله عليه وسلم رفع الله قدرها وعلا شأنها
على فكره يالأسترليني كان قبل سنوات بسيطه يسمح لهم بتدوين كلمة الشريف/هـ قبل الأسم ولكن فيما بعد جاء قرار بالمنع وكتابته تكون ماقبل اللقب فقط

شكرا لك على هذا الأرفاق الأخير

[زمن الغرباء]

ياأستاذ ..
اسمح لي ..

كل النماذج اللي ذكرت مالها دخل بالحقوق ,,
يعني كل الرجال اللي بالدنيا على نفس الصفات اللي ذكرت بالنماذج ؟؟
وكل الحريم اللي بالدنيا على نفس الصفات اللي ذكرت بالنماذج ؟؟

ياأستاذ حنا لما نتكلم عن حقوق المرأة ماندخل الاسلام بالموضوع
الاسلام أعطى المرأة الحقوق كااااااملة مكملة ..

حنا نتكلم عن الناس أنفسهم والمسلمين على وجه الخصوص هل أعطوا المرأة حقها ؟

رغم ان المرأة عندنا تتمتع الحمدلله بايجابيات _ ولله المنة _
الا انه للأسف تبقى حقوقها ناقصة ..
ولو فصلنا لطال المقام
لكن هذي الحقيقة


نسأل الله أن يحسن الأحوال ,,

تقبل وجهة تظري ,,

احترامي ,,

[الأسترليني]

اقتباس:  المشاركة الأصلية كتبت بواسطة ونة خفية     سبحان الله شدني الأسم وماقبل الأسم (الشريفه ) أذن هي من آل بيت الحبيب محمد صلى الله عليه وسلم رفع الله قدرها وعلا شأنها على فكره يالأسترليني كان قبل سنوات بسيطه يسمح لهم بتدوين كلمة الشريف/هـ قبل الأسم ولكن فيما بعد جاء قرار بالمنع وكتابته تكون ماقبل اللقب فقط شكرا لك على هذا الأرفاق الأخير

مرحبا بك يا ونة ..

الارفاق الاخير تراه تابع للموضوع بالنسبة لي ..!!

علشان لا يجي احد و يقول من هي هالرجعية هالمتخلفة ..

علشان يعرف انها تراها تشارك بمؤتمرات و لها مشاركات بورشات عمل و مع ذلك كتبت هذا المقال ..!!

و للمعلومية موقعها الخاص يا ونة اذا دخلتيه ترحب فيك ترانيم فيروز يعني تراها مهيب مطوعة و مع ذلك كتبت هذا المقال ..!!

[جلوي العتيبي]

اقتباس: شرعا المرأة لها حظ من أبوها … وحظ من زوجها .. هادا غير أمها .. وأخوانها .. وأبناءها .. والراجل مطالب إنو هو اللي يصرف عليها مهما كان عندها فلوس. وثانيا: الرجال لازم يروحوا للمسجد خمس مرات في اليوم .. جمع وجماعات .. حر وبرد .. ليل وصبح .. لازم يروحوا … بينما الست تصلي تحت المكيف .. في غرفتها .. وأجرها زي الرجال تماما …. ياعيني .. يا عيني .. والله الإسلام أعطاكم كتير …. وياريتو يِبان فيكم.

يالله هذا كلام بنات جنسكن .

يعني فما بالكم بالرجل المظلوم وش يبي يصير بحقه من نكران وجحود

[الأسترليني]

اقتباس:  المشاركة الأصلية كتبت بواسطة زمن الغرباء     ياأستاذ .. اسمح لي .. كل النماذج اللي ذكرت مالها دخل بالحقوق ,, يعني كل الرجال اللي بالدنيا على نفس الصفات اللي ذكرت بالنماذج ؟؟ وكل الحريم اللي بالدنيا على نفس الصفات اللي ذكرت بالنماذج ؟؟ ياأستاذ حنا لما نتكلم عن حقوق المرأة ماندخل الاسلام بالموضوع الاسلام أعطى المرأة الحقوق كااااااملة مكملة .. حنا نتكلم عن الناس أنفسهم والمسلمين على وجه الخصوص هل أعطوا المرأة حقها ؟ رغم ان المرأة عندنا تتمتع الحمدلله بايجابيات _ ولله المنة _ الا انه للأسف تبقى حقوقها ناقصة .. ولو فصلنا لطال المقام لكن هذي الحقيقة نسأل الله أن يحسن الأحوال ,, تقبل وجهة تظري ,, احترامي ,,

حياك يا زمن الغرباء ..

قرائتك رائعة ، انتي عرفتي نصف المغازي من المقال ..

و النصف الاخر من المغازي هي المطالب التي ملئت مانشيتت صحفنا ، هل هي مطالب حقوق للمرأة داخل الاطار الاسلامي ام مطالب خارج هذا الاطار ..!!