بصرآحة تهمني الردود .. هل المرأة عدوة المرأة ؟!!

[سَـاكنة القـلب]

من أروع الموآضيع اللي قريتها في حياتي مو في النت بس .. موضوع لوحده في أحد المنتديات النسائية المشهووووورة حيل ..

المهم هي كانت تبي توصل لهدف معين وهذا اللي عرفناه في النهاية !

نزلت الموضوع الأول .. وكتبت إن فيه موقف زعل صار بينها وبين رجلها وإنه ردت عليه وتبادلت معه الهوآش !!

جآت ردود الحريم على رتم وآحد !!
إنتي الغلطانه هذا رجلك والمفروض حشمتيه !
إنتي الغلطانه الواحد يتنازل عشان ع الأقل تمشي الحياة << سبحآآآآآآآآن الله وبحمده والرجال ملائكة مايليق عليهم التنازل لو مرة وحدة !!
انتي الغلطانه مفروض ومفروض

بعد فترة .. نزلت نفس السالفة بصيغة ثانية بس كتبت في ردة فعلها .. إنه راضته يوم رجع ودلعته وتنازلت وبادرت بالاعتذار وسوت وحطت ..

جآت الردود بعد على رتم وآحد !!
انتي الغلطانه .. كذا بيصير يزعلك متى ماطقت براسه لأنك علمتيه إنك باردة ورضاك هين !!
انتي الغلطانه .. أصلاً مفروض مايطلع من البيت زعلان ومهما اعتذرتي انتي متأخرة وخير منه ان قبل اعتذارك !!!
(لاحظوا ان السالفة مشتركة والخطأ من الرجل والمرأة كلهم ) !!!!
انتي الغلطانه مفروض ومفروض !!

بعد فترة .. نزلت نفس السالفة وايضا غيرت صيغتها .. المهم كتبت في ردة الفعل إنها بقت حيادية لا له ولاعليه !!

وجآت الردود إنتي الغلطـــــــآنه !!!
يآليييييييييييييييييييييييل

المهم في الأخير .. جمعت كل هالمواضيع والردود وحطتها بموضوع واحد وفرجته على الصبآيا المحروسآت : (


يآنآس ياجماعه ياعالم والله مب حاله وقسم !!
ليمتى بس هذي غاية أحلامي إني أعرف ليمتي ؟؟
والله العظيم إني إذا مت فهو من الحره !

يعني لما أشوف النصوص القرآنية ألاحظ قمة المساواة بين الرجل والمرأة في الصح والغلط
نلاقي في الأخطاء ( والزانية والزاني ) .. (والسارق والسارقة ) ... والآيات كثيرة
بعد في الصح (من عمل صالحا من ذكر أو أنثى وهو مؤمن فلنحيينه حياة طيبة و لنجزينهم أجرهم)

لكن نجي للحبايب
مهما صارت البنت على صح ماتترس العين!
وخلها بس تقرب للخطأ !!

تأملوها في حياتكم .. تلاقون العائلة كلها بعمانها وخوالها دارين عن هالولد انه مغازلجي ولا راعي سفرات ولاهالبلاوي وعآآآآآآآآآآدي جداً
إلا العذر مولم

صغير وبيكبر ويعقل .. كبير وبيتزوج ويعقل .. متزوج حرمته ماأرضته !!

يآآآآآآآآربي حسيبنا على هالظالمين
لكن لما تغلط البنت لو غلط تآآآآفه مافيه شي اسمه تساهل او تسامح حتى التوبة نازلة بحق الرجال عندهم !!
وبصراحة وضع الجاهلية كان احس منا لأنهم على طول يذبحونها وترتاح عند ربها لكن الحين لآآآآ يعذبونها بالموت البطئ .. نظرات شك وين ماراحت .. ماتروح لمكان إلا احد معها .. لو يعطونها بيجر قعدوا يراقبون من وراها وعلى هالحال !!!!

غير كذا في كل علاقة مع الرجل هي الخسرانه إن خربت العلاقة .. ومع ذلك يحطونها اهي الغلطانه !!
شلوووون أصير أنا الغلطآنه وأنا الخسرآنه أولاً واخيراً ؟!!!

في الحرام إذا خربت العلاقة تنتهي بالابتزاز وتهديدها بالفضيحة ونشر الصور ..والشك الدائم اللي يخليها ماتنام الليل .. أو فقدان العذرية في أسوأ الأحوال !!
والمحروس مافيه ولآآآآشي يخسره !

وإن خربت العلاقة في الحلال .. الطلآآآآآآق وآآآآآآآآآآآآآآآآآآآآآآآآآآآآه من ذل مابعد الطلاق في فلوسها وفي عيالها وفي كل شي !!!

واللي يذبح ويحر ويقهر ويجنن إنها مهما سوت وكافحت وصبرت وصابرت انتي الغلطانه !!
من بنات جنسها قبل غيرهم !!

إذا اعرس حتى لو كانت ملآآآآآآآك مايخطئ .. وتشكت الضعيفة تبي احد يشيل الهم .. وش انك مقصرة بحقه ؟!
إذا طلق .. أكيد إنك ملعوزته !!
يطق .. يصارخ .. يهاوش .. اصبري وحشميه هذا رجلك !!


لا والنكته لو تلاحظون يامكثر مانسمع إن الرسول لو كان بيأمر أحد بالسجود أمر بسجود المرأة لزوجها ، وإن المرأة تدخل الجنة إن طاعته ..

وبقدرة قادر مانسمع .. استوصوا في النساء خيرا .. خيركم خيركم لأهله .. !!

لآآآآآآآآإله إلا الله وبس
حتى في الدين خذوا اللي يبون
وصبر أيوووووووووب !!

أتمنى من جد ردود راقية تمثلكم لجل نفيد ونستفيد .. بموضوعية وهدووووء مهما كان اختلاف الآراء كلكم على راسي والله .

[tootaa]

كلآ عقله في راسه يعرف خلاصه

معك حق ببعض الكلام لكن المراءه بطبعها عاطفيه وتربت على ان الرجال رجال والبنت بنت

فـ مانقدر نلومها لان المجتمع عاوز كده

لكم لو جيت لرئيي الشخصي لو عندي مشاكل الدنيا مارحت ادور حلها بمنتدى لان اللي يده بالنار مو مثل اللي يده بالماء وصعب توصل الفكره 100%

وتشكورات الك

[زمن الغرباء]

والله اني حاسه فيس يالصمت .. بس شوي شوي على عمرك .. لازم تعرفين شي واحد يالصمت .. الزمان اللي مافيه قال الله وقال الرسول يبي يتلخبط وتختل موازينه .. ويصير مثل الغابة القوي يفترس الضعيف .. والانسان ضعيف مايقدر يقاوم الحياة - خاصة الضعيف منهم - بس اذا لجا لله وتوكل عليه هانت عنده المصايب ..

[رواسي]

السلآم عليكم

طبع النسآء المتزوجآت كذآ وأغلب أفكآرهم سيئهـ على النسآء الأخريآت خآصةً
إذآ شكت حآلهآ هي وزوجهآ لبنت مو متزوجهـ
تحس إنهآ هي النذلهـ هي ألي نآويهـ تفرق بيني وبين زوجي وهي وهي .

النسآء المتزوجآت أحسن للوآحد لآيعبر ولآ يسمع لمشآكلهم
أولآً دآيم مآيحكون إلآ عن الأشيآء السيئهـ بينهآ وبين زوجهآ وكأن الزوآج كلهـ مشآكل
أمآ الأيآم الحلوهـ ولآ تفكر نتطق فيهآ على قولهم خوف من العين

يعني تفكير النسآء المتزوجآت لك عليهـ
إذآ حليتي لهم مشكلتهم قآلوآ فيك كلآم مآيجيب إلآ المصآيب .

خليك بنوتهـ ولآ تهتمي إلآ بحآلك


سلآآآآمي

[مدام عبدالله]

والله ضحكيني من العنوان
اختي وانا اقراء موضوعك مع كل جزء يجي في بالي رد
بالاخر
تذكرت كلمة عبدالله زوجي الله يسلمه من كل شر
دايم يقولي رضاء الناس غايه لاتدرك
اذا انا بافكر وش ذي بتقولي وهذي وش رايها بضيع

اولا اشوف تصرفي يرضي الله او لا
ثانيا اشوف هالموقف مر فيه احدى زوجات الرسول وكيف تصرفت
ثالثا انا وش الي يريح قلبي وضميري
اخر شي اشاور الي يخاف الله واهل الثقه
مو موضوع بالنت وازعل من الردود؟
يااختي النت يلم اشكال الوان
يختلفون بالوازع الديني وبالعقل والحكمة وبالعلم والثقافه
فطبيعي تلقين اختلاف وتتذبذب وتعصب غبي

لذا نصيحتي لاي وحده تواجه مشكله لاتعرضها كذا للكل في منتدى
ممكن يكون في استشاريات فاهمات او وحده معينه تحسينها ثقه
بس كذا لكل من هب ودب يدلو بدلوه صعب بتتعبي

ادري طولت عليك وازعجتك
لكن حبيت انتفعك قدر المستطاع

[هلاوين]

كلام حلووووو لوني لم اوفيه حقة من القراءة لكن النساء نوعان

الاول متزوجة وتخاف من الطلاق والمشاكل وكلام الناس

هذه قدر المستطاع تبي تداري زوجها ربما ليس حبا فيه

لكن للمصلحة وكثيرا من الرجال اخذها بالعنوة من المسكينة

لضعفها ولين جانبها على كذا ماراح يتنازل قدر انملة ويظن ان

له الحق بكل شي لكن اقول الصبر جميل وتحمل جهلة الرجال

احسن على كل حال من طلاق ومشاكل.

اما انوع الثاني غير المتزوجة

وهذة تطاططططي بما لم تعرف خذي حقك لاتخلينة يستغلك

ترى الرجال مايعطون وجة وادبيه خليك شديدة علية ومن هالكلام

وبعد مايرزقها ربي زوجا اهااااا عرفة كيف تتعامل معاه

الخلاصة من الكلام حطي ع اذن طينة واذن عجينة كل بيت فية خلاف

وتحملي حتي يفرجها ربي

وبامان الله نلقاكم

[روح لايسعهآ جسـد]

من الغباء الاخذ بمشورت النساء

[فديكا التميمي]

حطي عقلك براسك ولاتشاااورين احد,,ومافيه بيت تخلى من المشاااااااكل,,,الله يعين

[عشق الزعامه]

حنا من يوم طلع عندنا ها المنتديات ما رجينا خير ،،

بصراحه أستحقر المرأه اللي كل مشكله في بيتها تروح وتكتب عنها بالمنتديات

ناهيك عن البهارات لزوم حتى تهيض الحريم اللي بالمنتدى ،،

وتلقى العالم كله تستخدم الفيسات

وإذا رجع رجله من شغله طلعت معه للسوق أو لمطعم

لكن المساكين اللي بالمنتدى تشكل براسهم أن الرجال وحوش ينتظرون

فريسه والله يستر لا تنفجر من الضغط في أول ليلة عرس لها ،،

الحريم كائن غريب بإمكانه تخليك ملك وبإمكانه تخليك صعلوك وكل

هذا يصير في ثانيتين ،،

تحياتي .

[مدام عبدالله]

يااخ رومانسي هناك نوع اخر من النساء
ماادري انت غافل عنه ولا ماتعرفه اصلا
وهي المراة التي تصبر على زوجها ابغاء مرضات الله
فالزوج حقوق كثيره واجر الصبر عليه عظيم
فالرسول الكريم يقول لو كنت امر احد ان يسجد لبشر لكن امرت المراة ان تسجد لزوجها
او كما قال عليه الصلاة والسلام

فيااخي في حريم تقدر ماتسكت عن حقها وتاخذه من الرجال الت ومتلت على قولة المصريين
لكن هي تصبر على زوجها لانه سندها بهالدنيا ونصفها الثاني
لانه ابو اولادها

ياليت يارومنسي تراجع فكرتك عن النساء

[سَـاكنة القـلب]

[align=center]
صرآحة بديت أشك بنفسي وقدرتي على توصيل المعلومة !!
يعني صح في ردود حلوة بس مالها دخل بالموضوع !!

أنا قصدت إن في كل موقف في الحياة وخصوصاً الزوجية يعتبرون خطأ البنت أفضع بكثير من خطأ الولد كذا من أنفسهم ، وبالتالي اتكون معاملة خطأ البنت غير معاملتهم لخطأ الولد !!
وأيضاً في كل موقف يجمعهم (الرجل والمرأة) يعتبرونها هي الغطانة مهما كانت ملاك ماتخطأ ومستحيل يتصورون إن الخطأ من الرجل !!
وتطالب بالتنازل أولاً لتمشي الحياة بينما لا يحق ولايليق للرجل ذلك !!!

فليه العدل المتناهي والتقديس هذا ليه ؟!!!وليمتى بس !!

والأهم .. إن المرأة هي أسبق من الرجل في اتهام أختها المرأة بأنها المخطئة !! فعشان كذا حطيت العنوان مثل مايقولون إن المرأة عدوة المرأة واللي صرآحة بديت أصدقه !!!
لكن بصراحة أناظر في واقع الرجال ومشاكلهم .. بالعكس واقف مع خويه مهما كانت المشكلة واضحة وإن الخطأ من الرجل نفسه .. هذا إن ماعطاه حل ظالم لزوجته !!




tootaa

اقتباس: فـ مانقدر نلومها لان المجتمع عاوز كده

اقتباس: لكم لو جيت لرئيي الشخصي لو عندي مشاكل الدنيا مارحت ادور حلها بمنتدى لان اللي يده بالنار مو مثل اللي يده بالماء وصعب توصل الفكره 100%

صآدقة ومن زمآن أدري إن المجتمع عاوز كده ،، بس لازم يتغير تفكيره ودوام الحال من المحال ، بيجي انفجار يخليه يتغير غصب عليه !

ومن ناحية المشاكل طبعاً واكيد ومن جد اللي ايده بالماء مو مثل اللي ايده بالنار وتلاحظين أصلا بعض الردود في المشاكل الاجتماعية يامثالية بزيادة يامطنشة يامدري كيف .. لكن بعد في ناس مجربة وحاسة بك وع الأقل تفيدك ..

عندك مشكلة مكدرة عليك الدنيا وخاصة وتبين تفضفضين من تروحين له ؟؟
لأقاربك عشان يدرون بأسرار بيتك !!
ولا يتشمتون فيك .. ولايشفقون عليك وتصير لك معاملة خاصة !!
بالعكس أنا أشوف النت أحسن شي .


شكراً الغآلية والله يرضى عليك ع المرور ..
[/align]

[مخاوي القايله]

اقتباس: في كل موقف في الحياة وخصوصاً الزوجية يعتبرون خطأ البنت أفضع بكثير من خطأ الولد كذا من أنفسهم ، وبالتالي اتكون معاملة خطأ البنت غير معاملتهم لخطأ الولد !!

هذا الوآآآقع وانا اخوتس ..

[جوهرة بريدة]

هذه الآراء تعبر عن رأي أصحابها ولايعني مخالفة الرأي عداوة

المشكلة الحقيقيةعندما تكون المرأة عدوة نفسها

[منتهي علاجه]

^^^


من الذكاء انك تسوي نفسك غبي 0

[هلاوين]

اقتباس:  المشاركة الأصلية كتبت بواسطة مدام عبدالله     يااخ رومانسي هناك نوع اخر من النساء ماادري انت غافل عنه ولا ماتعرفه اصلا وهي المراة التي تصبر على زوجها ابغاء مرضات الله فالزوج حقوق كثيره واجر الصبر عليه عظيم فالرسول الكريم يقول لو كنت امر احد ان يسجد لبشر لكن امرت المراة ان تسجد لزوجها او كما قال عليه الصلاة والسلام فيااخي في حريم تقدر ماتسكت عن حقها وتاخذه من الرجال الت ومتلت على قولة المصريين لكن هي تصبر على زوجها لانه سندها بهالدنيا ونصفها الثاني لانه ابو اولادها ياليت يارومنسي تراجع فكرتك عن النساء

حياك ربي مدام

لكن ماتكلمت عن هذا النوع لانه افضل واحسن

مما اقول فيه وإلاانا اعرف انها موجودة وبكثرة

في النساء وتحملي زلتي

وتشكرين مدام انك تقبلين