[فهد الطويان]

اللي يقول بهفـت مقيـط ورشـاه
اقول له في حفـظ ربـي وعونـه
واللي هنتني لقمـة العيـش ويـاه
ماياصلـه منـي كـلام المهـونـه
قلته وانا مصدوم باللـي وصلنـاه
لا واعسـى الخـلان ماياصلونـه
ظنيتنـي روحـه وحبـه وملجـاه
اهلـه وخلانـه وقلبـه ونـونـه
واثري صفر من ايسر الرقم خـلاه
ماصـان قلـبٍ بالمـوده يصونـه
يبشـر بسعـده دام عـزم بفرقـاه
من يطرد المقفيـن تكثـر غبونـه
لو ان عيني تسرب الدم مـع مـاه
ماقلت أنا وينه لـو امـوت دونـه
خلـه يولـي يـوم هـذي نوايـاه
والله يعينـه دام سـاءت ظنـونـه
ياهاتفـي كـز التحـيـه مثـنـاه
للي عن دروبي نحت بـه ظعونـه
قل له انا محتاج لـه ويـن ابلقـاه
ماشفت من عقبـه قلـوبٍ حنونـه
وجدي على شوفه وصوته ولامـاه
وجد الخلـوج حوارهـا يذبحونـه
ووجدي على هزله وجـده ولقيـاه
وجـد الغريـق اللابتـه يطلعونـه
بشكي عليها الحال مااظـن تخفـاه
وانا ادري اني بالغلا فـي عيونـه
فطـوم لـي قلبـن تعـذب بدنيـاه
ماعاد لـه مـن خـوةٍ يرحمونـه
اللي خطف قلبي نوا اليـوم يسـلاه
وزود كلامه فـي خفوقـي طعونـه
لاعـاده الله ليتـنـا ماعرفـنـاه
مادام ماحافظ علـى اللـي يبونـه
لااتفه سبب!! في هفت مقيط ورشاه!
لكـن عليـه الله وحفظـه وعونـه

ــــــــــــــــــــــــــــــــــــــــــــ

هنا الشعر على أصوله وإكتماله .
.
شجون وجنون وفنون الشعر النبطي الأصيل .
.
التميز والروعه الشعرية بكل معانيها.
.
الشعر النبطي محظوظ بوجود أساتذه أمثالك تعطيه مايستحق من متطلبات إستكماله وروعته دون إسهاب ممل ولا قصر مُخِلْ.
.
سلمتي للشعر ومتابعيه ومتذوقي روعة معانيه من مبدعيه...
.
تقبلي إشادتي الدائمة بروائعك التي هي أكبر بكثير من كل قواميس الإشاده والإعجاب .
.
دمتي بخير وعافيه وإبداع