[امرؤ القيس]

هنا شاعر يصف شيئا من هذه الحاله


المال والدرهم وزين المعاويش
أصبح بيدين العجز والخمع واللاش

مادام بيدك قرش وعندك محاويش
لو تخيس المجلس على زل وفراش

قالو مسامح عمنا فيه تطريش
راع الدراهم عم لو كان غشاش

يوم الشنب بالوجه يفتل على ويش
ماهوب لأكل الرز أو للبس الاقماش

يفتل إلا جن الركايب معاطيش
وجلبت عصي المرجله يشريه كاش

يعل رجل ما براسه نغاميش
يعل تبكيه الحليله وتنحاش

لا صار مابه خير والطيب مافيش
مغير يجمع مال والصيت مهناش

عنده ملايين القضى مير حتى أيش
يأكل ويشرب والهدف بس يعتاش

مهوب لا يقنص ولا له مطاريش
ما همه إلا عيشته مثل الادباش

يعل تلدغه البثن حية الهيش
وإلا فلا يداوى به السم لا فاش

الكلب عايش والنمل والخفافيش
ما هو كثير الكل بدنياه معتاش

مير الحكي لا جاء المحطات تشويش
يبين فعل الطيب بعايش وعياش

تمت وصلى الله على صفوة قريش
على النبي ما تبصر العين برماش