كنت قد نشرت هذا الموضوع في ( الساحه العربيه) يوم الثلاثاء قبل ان اعرف ( صحة ) الخبر وكنت بالفعل مستعجلا
------------------------------------------------------------------
سيدي خادم الحرمين الشريفين أطال الله في عمرك أمدك بالصحة والعافية
تدري انك ( زعلتني ) والله زعلتنا بهذا القرار ! !
ليه .. ليه .. ليه ..بس ؟؟
ليه كذا ؟ والله ضيقت صدري يوم قلت نبي نرفع أسعار البنزين على المواطنين
يعني ما لقيت إلا البنزين ترفعه ؟؟ فيه ألف حل وحل غير البنزين ! !
أنت طال عمرك ( واعدتنا ) قبل عشر سنوات يوم رفعت البنزين وقلت هي فترة بسيطة ويرجع كل شيء على وضعه .. وما دريت أن قصدك ترفع أسعار البنزين بعد الفترة البسيطة نحسبك تبي تحفظه للنصف .. لكن الحمد لله أن الفترة البسيطة ( طولت ) شوي واستفدنا منها نوعا ما ..
والله يا خادم الحرمين ما قصرنا معاكم كقيادة وكحكومة تقودنا .. وقفنا معكم بالسراء والضراء
وقفنا يداَ واحدة ضد كل من حاول ويحاول النيل أو المساس بجزء من هذا الوطن .. وقفنا معكم وساعدنا بحفظ الأمن أيام حرب الخليج الأولى والثانية والثالثة وقفنا معكم آيام التفجيرات التخريبية التي حصلت في الخبر والعليا ومؤخرا في الرياض
لا ..لا .. اصبر لا تقاطعني ... خلني اكمل كلامي ...
وقفنا معكم في كل مصيبة تحل بهذا البلد ولا قلنا شيء .. رفعتوا أسعار بعض الخدمات الأساسية وقلنا يمكن علشان الحرب أخذت منا فلوس كثيرة ولازم نضحي في سبيل الوطن ..
بقي عليكم ( تكريم ) المواطن ( بمكرمة ) ننتظرها في كل عشر أواخر من رمضان .. ومرت عشرات الأواخر من عدة رمضانات ولا شفنا شيء .... قلنا مو مشكله لو ما استفدنا من هذه المكرمة ( حتماَ ) ستأتي يوما ما ويستفيد منها أولادنا ! !
لكنك فاجأتنا ونويت ترفع البنزين .. شف يا طويل العمر حفظك الله ..
أنا أتكلم نيابة عن الشعب المسكين واسمع كلامي واترك كلام المرتزقة اللي عندك .. ترى والله نحن المواطنين اللي سننفعك – بعد الله – في ما لو حصل للبلد مكروه.. اما بقيه الوزراء فكل سيذهب ويهرب للخارج ..
خادم الحرمين الشريفين أطال الله في عمرك
فيه ألف ألف طريقه لرفع دخل الميزانية غير ارتفاع البنزين على المواطن المسكين مثلي ومنها :
1 – ارتفاع أسعار تذاكر الطيران لخارج السعود يه .. خل العالم تقضب الأرض وتسافر داخليا .ونكسب سياحة داخليه وفلوسنا تكون بأرضنا.
2 – ارتفاع أسعار ( الدخان ) ثلاثة أضعاف السعر الحالي .. ولك اجر في ذلك .. علشان الناس تبطل شرب سجائر
3 – رفع أسعار مكالمات الجوال ونسمح بأن تكون الدقيقة بعشره ريال علشان الناس تترك القرق على الفاضي وتبطل ( معاكسات ) اللي دهورت بنات المسلمين ولك اجر بذلك .
4 – تخفيض رواتب ( الضباط ) من رائد إلى فريق أول أصحاب الكروش اللي ما نفعوا ولا بحرب ويستلموا رواتب خيالية وقرب تقاعدهم .
5 – تخفيض رواتب الأمراء وامراء المناطق .. حتى لو كان راتبه الحالي حوالي ( 70.000 ) شهريا خله يستلم ( 40.000 ) شهريا .. يعني إذا نزلت من راتبه الشهري ( 30.000 ) ريال يبي يزعل ؟؟ بالطقاق خله يزعل وفيه الف واحد و واحد بداله وبأقل من راتبه ..
6 - تخفيض رواتب الوزراء اللي والله ما غير أوامر و نواهي وسرقات وكأن الدولة ملكهم .. وبدلا من تعطيه راتب ( 50.000 ) شهريا ومنزل وسيارة وطيارة .. خفض راتبه إلى ( 30.000 ) شهريا .. ليه خائف يزعل ويرفض الوظيفة .. فيه المئات يتمنوا يكونوا وزراء بأقل من ذلك .. وأنا على استعداد تام ( يا خادم الحرمين ) أن أكون (( وزيرا ) في أي وزارة تريدها وبراتب ( 10.000 ) ريال شهريا واشتغل الليل والنهار .. ولا تعطوني لا سيارة ولا منزل .. وش تبي بعد ؟
يا خادم الحرمين..
والله ثم والله ترانا زعلانيين على صدور هذا القرار .. ونتمنى أن يكون هناك ( مكرمة ) وان يتم إلغاء هذا القرار ..
فيه عدة أشياء لا يريد الشعب أن ترفع أسعارها ومنها :
1 – البنزين .
2 - الغاز .
3 - المياه .
4 - الهاتف الثابت .
5 – الكهرباء .
وعندي حل وسط يرضي الحكومة والشعب وهو ( تخفيض الأسعار للخمسة أشياء اللي ذكرتها إلى مستوى بلاش وعليك برفع ما تريد من الخدمات إلى ثلاث أضعاف ) ..... ايش رائك ؟ نحن راضون بهذا ..
أخيرا يا خادم الحرمين
والله ثم والله نحبك ونحب ولي العهد وندعوا لكم بالصحة والعافيه ولا نرضى بغيركم ..
أما آنت يا ( وزير البترول ) .. والله إذا كان هذا القرار طالعة ( فكرته ) من رأسك ولا اجبرك أحد على قوله فأنتظر دعوات ( الشيبان والعجز ) عليك تالي عمرك حسبي الله عليك ..
--------------------------------------------------------------------------------