قصيدتي الجديدة : ناحت الرَّاعبيه فوق غُصْنٍ رطيب .."
 

..



ناحت الرَّاعبية فوق غُصْن رطيب
سَجَّعَت صوتها الباكي .. وجاريتها

ياحمامه على هونك : تراني غريب
شوفي دموع عيني .. كيف هلّيتها

كان تشكين فَقْد ، أنا اللي فاقد حبيب
أخذو روح روحي .. غصب من بيتها

أخذوها وراحوا ، جعلهم للذّهيب
يم أراضيٍ بعيده .. ما بعد جيتها

بحّ صوتي من العَبْرة .. وكثر النحيب
وابطت جروحي بصدري ، ماداويتها

لو تهيّا اللقى .. يمكن جروحي تطيب
( ماتطيب الجروح إلا .. لا لاقيتها )

كل ما ميّلت شمس العصر للمغيب
[ إلتفتّ لجهتها .. ثم / ناديتها ]

بس عزِّي لحالي ، ما لصوتي مجيب
[( ليتها وادعتني .. آه ياليتها )]


#قصيدة / عبدالرحمن العوض .."

سبحان الله والحمد لله
ولا اله الا الله والله اكبر