|
ــــــــــــ > رأيكم ومشورتكم ياحبايبنا .... أنا مقبل على الزواج قريباً بإذن الله؟!!!
[align=center]
كتبت هذا الموضوع في منتدى بريدة الشقيق فأردت أن آخذ مشورة أحبابنا في هذا المنتدى الرائع ---------- أبخش بالموضوع : أبشركم أنا متخرج من الكلية وتم ترشيحي ضمن الدفعة السابقة وياما كرفونا الأهليات بتدريس صفوف البزارين ويعاملوننا مثل المعلمين الرسميين وبانتظار التعيين وربك يعين :) وعسى التعيين يكون في مدينة مناسبة إن شاء الله ،،، وكلش ولا القرى أو الهجر اللي مافيها لاخدمات ولاشيء ..!:e6: ما أطول عليكم أنا أقدمت على الخطبة من إحدى العوائل الكريمة وأهلي أثنوا على البنت في جمالها :a5: وأنا ولله الحمد أحب المرأة العاقلة الرزينة والملتزمة بدينها ،،،، ولكن أهلي ذكروا من أوصافها الشيء الذي جعلني أقتنع ،، ولكن ذكرت لي أختي الكبيرة على انفراد حينما ألححت عليها ببعض الأمور: فقالت الفتاة ماعليها وووو الخ .... لكن من ناحية اهتمامها بالدين أنا ما لاحظت عليها إلا أنها في بعض المناسبات تلبس العاري وتضع العباءة على الكتف وتلبس النقاب بحكم وضع الأسرة المهمل مع أكثر أخواتها ... ماعدا الأصغر منها فهي الملتزمة الوحيدة في الأسرة ..وووفقلت لها : قفي ولاتكملي سأستخير وأذكر لك النتيجة والقرار بعد يومين أو ثلاثة.... وهذا الكلام يوم الجمعة 26/9 وما لكم بطول الهرج ... من المصادفات لقيت لي صديق عزيز علي وغالي لم أره منذ سنتين ،،، وأخذنا في السواليف والتخرج والتعيين والزواج فأخبرني أنه تزوج من إحدى الفتيات وكانت عن طريق إحدى قريباته وهي مشرفة على إحدى الدور النسائية وأنه يعيش في سعادة وراحة بال فزوجته حافظة لكتاب الله وملتزمة .... فبدأت بضرب الهواجيس وإعادة الحسابات فأنا صراحة لا أريد أن أخذ البنت وأقوم بتربيتها وندخل في نقاشات ومشاكل ماله أول ولا تالي :c4: وسأتخذ قراري يوم الاثنين أو الثلاثاءالقادم بمشيئة الله وعطوني رأيكم الله يفرج عنكم ويسعدكم دنيا وأخرى ................. فأنا محتااااااااااااااااااااااااااااار[/align] |
احسن لك تاخذ وحده ملتزمه اذا انت تحب الستايل هذا بدل ما تاخذ وحده هذا مو مودها
وتبيها تصير ملزمه صح والله يوفقك |
ترا الجمال مو كل شي وبعدين كيف بتتزوج وحده ماتعرفها
بتعيش مع وحده كل حيانك وانت ماعرفتها قبل شلوون ؟؟ |
والله أنا أقول لكـ : إستخر ربكـ
ومالكـ غير النصيب .. لأنه يخيل لنا أننا نختار .. وفي الحقيقة أننا غير ذلك .. تحديدا في أمر الزواج ولاتأخذ بكلام غيركـ .. أنت أكثر إنسان تعرف نفسكـ وتعرف هي تناسبكـ أو لا .. الله يوفقكـ وينير دربكـ ولاتتحمس بالحيل (مثل محاكيكـ) يمكن بعد ماتخطب مايوافقون الناس عليهم شروط عجيبة غريبة :) |
اقتباس:
هو صحيح إن الجمال مو كل شيء لكن مطلوب ...... 2- ما هو لازم إنك تتزوج وحده تقربلك أو بنت الجيران وتعرفها جيدا .... أحيانا سؤال الأقربين والعارفين يكفي وشكراً لمرورك |
اقتباس:
وبالنسبة لقضية الشروط وما الشروط ..... هم تقريباً موافقين وراغبين بمصاهرتهم كما بلغني ............. لكن حيرني هالموضوع وخايف من العواقب مستقبلاً ... وشكراً لمرورك أخي الغالي |
أعتقد أن الأمر لايدعو للقلق .
فلبسها بين مجتمع النساء ليس مخالفه شرعيه كبيره . أسأل الله أن يوفقك لما فيه الخير |
طالما موافقين ياخوي ..
استخر ربكـ مرة ثانية .. وإذا مازلت متردد .. إطلب شوفتها ( شوفة شرعية ) وبعدها إرجع إستخر وإسأل ربكـ الإستعانة .. وثق أن الله سيبعث في قلبك اليقين سواء بالرفض أو القبول .. وإسأل ربكـ إن كان في زواجكـ منها خيراً أن ييسرها لكـ أو أن يصرفها عنكـ ويصرفكـ عنها بقي أن أقول لكـ عزيزي أن الإستخارة هي دعاء وطلب للمعونة من الله لاأكثر .. فلا تنتظر مَلكاً يأخذ بيدكـ أو صوتاً يدلّكـ ويرشدكـ هي طلب للمعونة .. وإحسبها صح وربي يوفقكـ |
عليك بالإستخاره والله الكل بيقول رأيه بس محد يقدر يثبت إنه الأفضل لك إستخر والله يكتب لك الخير وين ماكان |
الله يوفقك يا أخوي ويكتب لك الخير ويسعدك
شوف أنا راح أتكلّم معاك بصدق وصراحة لأن مثل هالموضوع لازم نصدق فيه ونفكر زين حرام تحكم على البنت كذا ، طيب يمكن هذا طبعها في اللبس وبعدين كل السوق على هالشاكله ومسألة العبايه على الكتف ، أنا سامعه الشيخ الدكتور سلمان العوده يجيزها مافيها شي وبعدين لاتحكم على السرائر من مظاهر الناس ياما منافقات يدّعوا الدين بلبسهم وهم من الداخل اللهم يا حافظ عقوق والدين وعقوق زوج وكره لأهل الزوج والتخلّي عن الدين عند أبسط الامور وياما مماشيات للجيد من الموضه ومافي اخلص ولا أطهر من قلوبهن مع ربهن ومع الناس أقول لك حادثه بسيطه وحده من معارف ستّي ملتزمه مررررررره وماأحد يعرف عليها العيبه تتوقع إيش انصدمنا فيها ؟؟؟؟؟ إنصدمنا إنها تعاملت مع ساحر والعياذ بالله !! أنا ماأقول لك خذ وحدة صايعه لكن دام البنت مافيها عيب يذكر من ناحية أخلاقها ولا دينها ماعليك من شي تاني هي مالبست لبسها العاري عند رجال كمان تسترت ولبست العبايه ، وترا عهد الرسول مافي عبايات على الراس لونها أسود !!!!!!! كان فيه جلباب يعني ماأنزل نص يجبر الحريم على عبايات الراس وينهاها عن عبايات الكتف أهم شي تكون ساتره محتشمه بعبايتها ولا تبدي زينتها للرجال بالتوفيييييييييييييييييييييييق |
[align=center]
مثل ماقال أخوي العريف ... استخر ربك ... وإذا لم يتبين لك شئ أنصحك بترك هذه الفتاة والبحث عن أفضل منها !!! ( فاظفر بذات الدين تربت يداك ) ... عموما اللي كاتبها الله زوجة لك في الدنيا راح تاخذها لا محالة !!! وكل ماعليك هو فعل الأسباب مع التوكل على الله .... وفقك الله أخي ! تحياتي[/align] |
والله ياسيد نصيحة لك إذا ماتحب البنت المش حريصة لاتتزوجها لأنك بتشقى ., أتكلم من واقع البنات قليل منهن ينتصحن بعد الزواج يعني لاتعتقد أنك بتغييرها ترى صعبة ., وحدة من قريباتي كذا مقصرة من ناحية المظهر مش حريصة أبد أبد أبد ., وخطبها شيخ ولامثله ., طبعاً اللحين أم عيال بس ماتغيرت أبد لدرجة مرة بزواج أتكلم على زميلة لي قلت شفتي اللي تو معي ترى زوجة الشيخ فلان ((لبسها جداً عاري)) قالت وجع وشلون ؟!! قلت تمر و لون طبعاً هو داعية عايش في الخارج وتجي بين كل فترة وفترة للسعودية عند أهلها ., وبعدين وش تبينه يسوي هو مايعلم الغيب !! المفروض هي تكون حريصة على سمعت زوجها ., ودااارت الأيام وأكيد وصله خبر عن ملبس زوجته في المناسبات لأنه ملفت الله يصلحها وتزوج عليها زوجه ثانية مثله داعية تبارك الله ., صدقني هو شخصية مشهورة بشكل وإنسان يمتلك أسلوب روعة ومع ذلك مامشت زوجته على مايبي ., والشكوى لله ., لاتنسى تستخير وربك يختار لك الخيرة الحسنة ., والله يوفق الجميع ., أهذب تاهيه’ |
شف أخ سعود بداية أهنيك بالتخرج وأدعو لك بالتوفيق بالدنيا والاخرة ثانيا / في رأيي أن الفتاة اللي تلبس العباية على الكتف والنقاب تركض بين الرجال بلاحياء وكما ذكرت تلبس العاري هذي الله يسلمك تصلح لواحد مثله وعلى شاكلته والغيرة لك عليه أما إذا كنت رجال مستقيم فانفذ بجلدك ترى بنات الوقت مهب زي أول تقدر تأثر عليها وتقنعها باللي ما ترغبه مثل ماذكرت ولا تقول آخذها وأقنعها بعدين لأني قرأت موضوعك وجلسنا نسولف مع الست بتاعتي ( المدام ) وقالت لي أعرف وحده نفس أسلوب البنت اللي تقول عنها وتزوجها رجال ملتزم وتكسّف معها كسافة يحاول يقنعها وفشلته عند الناس بلبسها وبدا ما يطلع للسوق وهي معه وبدوا الناس يقولون هذي مرة فلان اللي أشغلنا وينه عن مرته وبالاخير انتهت السالفة بعد عدم اقتناع البنت الطايشة بما يريد زوجها بالطلاق مع الأسف وتقول المدام إنه خطب له وحده عاقله وتبي تريحه وتحفظ بيته وتربي عياله صح وأغلق تلك المسرحية الكابوس أعيد هذا /////// رايي أنا وأنت حر والبيوت مليئة بالفتيات العاقلات الثقيلات والمزيونات |
عزيزي
اتمنى ان تكون اقرب لمعرفتها من الجهل بها مثلا لو ارسلت اهلك لكي يروها وتصطحب معك اخواتك الكبار بحكم انهن يعرفن طبائع بعض ويعرفن شخصيات البنات واساليبهن ثم قرر بعد ذلك هناك مثلا يقول تزيل جبل ولاتزيل جبله الجبله هي الطبع والتعود وفقك الباري |
اقتباس:
وبالنسبه للموضوع : الزواج قسمة ونصيب .. وتأكد ياأخي ان نصيبك راح يصيبك .. لكن عليك بالاستخاره قبل كل شئ .. ولا تظلم البنت .. كلن فيه حقه من التقصير .. ولا تعتقد ان هناك فتاة كاملة .. كما ان لا يوجد رجل كامل .. حتى لو اصبحت ملتزمة .. قد ترى منها بعض التقصير في أمور أخرى .. وهناك نقطه غابت عن الجميع بالرغم من أهميتها !!! وهي التفاهم .. برائي ان التفاهم هو الذي يحدد نجاح الزواج من فشله يمكن تتزوج بهذه الفتاة وتنسجما مع بعضكما وتعيش معها سعيد .. ويمكن ان تتزوج من فتاة ملتزمة وينعدم بينكم التفاهم وتصبح الحياة معها مستحيله ...ويمكن العكس .. باختصار أن التفاهم والانسجام لا يشترط ان تكون الفتاة ملتزمه أو جميله أو مثقفه أو حتى آميه .. كل ذلك راجع للتوفيق من الله .. نسأل الله ان يرزقك بالزوجه الصالحه .. |
| الساعة الآن 09:34 pm. |
Powered by vBulletin® Version 3.8.8 Alpha 1
Copyright ©2000 - 2025, vBulletin Solutions, Inc. Trans by
موقع بريدة